.jpg)
Aubameyang ស៊ុតបាន ៣ គ្រាប់ រួមចំណែកជួយឱ្យ Arsenal ឈ្នះ West Brom ៦-០ ពីការប្រកួតលីគខាប់ជុំទី២ កាលពីថ្ងៃពុធ។
ក្រុងឡុងដ៍: កីឡាករ Pierre-Emerick Aubameyang ធ្វើបានហ៊ែតទ្រិក (ស៊ុតបញ្ចូលទី ៣ គ្រាប់) ដើម្បីជួយលើកក្រុម Arsenal ឱ្យងើបចេញពីការរុំព័ទ្ធដោយបញ្ហាបានខ្លះ ជាមួយនឹងការបំបាក់ក្រុមម្ចាស់ផ្ទះ West Bromwich Albion យ៉ាងចាស់ដៃ ៦-០ ពីការប្រកួត ក្នុងកម្មវិធីលីគខាប់ (League Cup) ជុំទី២ កាលពីថ្ងៃពុធ។
បរាជ័យក្រោមថ្វីជើងក្រុម Brentford និង Chelsea ក្នុងការប្រកួតបើកឆាក ២ លើកដំបូង នៅក្របខ័ណ្ឌ Premier League ធ្វើឱ្យក្រុមកាំភ្លើងធំ Arsenal ធ្វើដំណើរមកដល់កីឡដ្ឋាន Hawthorns ជាមួយនឹងភាពចលាចល បន្ទាប់ពីមាននូវការចាប់ផ្ដើមរដូវកាលដ៏សែនអាក្រក់បំផុតរបស់ខ្លួន។
ក្រុមរបស់លោក Mikel Arteta ត្រូវបានហ៊ោចំអក ក្រោយពីចាញ់ក្រុម Chelsea ២-០ នៅផ្ទះខ្លួនឯង កាលពីថ្ងៃអាទិត្យ ដោយមានអ្នកគាំទ្រ ១ ក្រុម នាំគ្នាទៅហ៊ុំព័ទ្ធឡានរបស់អ្នកចាត់ក្រុម Arsenal និងស្រែកឱ្យគាត់ចាកចេញពីក្រុម ខណៈដែលគាត់បើកចេញពីកីឡដ្ឋាន។
ដើម្បីទប់ទល់នឹងទិដ្ឋភាពដ៏គួរឱ្យសោកសៅនេះ លោក Arteta មិនអាចបណ្ដោយឱ្យមានការបរាជ័យបានទៀតទេ ក្នុងការប៉ះជាមួយក្រុម West Brom ប្រចាំក្របខ័ណ្ឌទី ២ Championship ដែលទុកឱ្យកីឡាករជម្រើស ១១ នាក់ដំបូងរបស់ខ្លួនសម្រាកទាំងអស់ ហើយបន្ថែមដោយកីឡាករទើបបង្ហាញខ្លួនដំបូងជាមួយក្រុមដល់ទៅ ៧ នាក់។
សំណាងល្អសម្រាប់លោក Arteta កីឡាករ Aubameyang អាចធ្វើការបង្ហាញខ្លួនជាលើកទី នៅរដូវកាលនេះ ក្រោយសះស្បើយពីជំងឺកូវីដ ១៩ ហើយខ្សែប្រយុទ្ធសញ្ជាតិហ្គាបុង ស៊ុត ២ គ្រាប់ដំបូង មុននឹងកីឡាករ Nicolas Pepe និង Bukayo Saka ជួយបន្ថែមម្នាក់ ១ គ្រាប់ពីលើ។
ក្រោយមកទៀត Aubameyang ក៏មានឱកាស ធ្វើបានហ៊ែតទ្រិក មុននឹងដៃគូប្រយុទ្ធ Alexandre Lacazette ជួយឱ្យក្រុមកាំភ្លើងធំឈ្នះផ្លូវការ ៦-០។
«វាពិតជាល្អណាស់។ ការស៊ុតបាន ៦ គ្រាប់ក្រៅផ្ទះ ហើយបិទមិនឱ្យរបូតគ្រាប់បាល់បាន ពិតជាធ្វើឱ្យខ្ញុំរីករាយណាស់»។ នេះជាសម្ដីរបស់លោក Arteta ដែលក្រុមរបស់លោក នឹងត្រូវជួបជាមួយ AFC Wimbledon នៅផ្ទះខ្លួនឯង ក្នុងជុំទី ៣។
អ្នកចាត់ការសញ្ជាតិអេស្ប៉ាញ បានបន្តថា៖ «ឥរិយាបថ ដែលក្រុមមាន តាំងពីចាប់ផ្ដើមដំបូង គឺល្អ។ យើងមានការសោកស្ដាយ ដែលមិនអាចឈ្នះ ២ ហ្គេមដំបូងនៅលីគ។ នៅពេលដែលអ្នកចាញ់ រឿងដ៏សំខាន់បំផុត គឺត្រូវឈ្នះហ្គេមបន្ទាប់ ដើម្បីទទួលបានទំនុកចិត្តមកវិញ»។
តែយ៉ាងណា វាមិនបានធ្វើឱ្យលោក Arteta ដកដង្ហើមបានស្រួលនោះឡើយ ដោយសារនៅចុងសប្ដាហ៍នេះ ពួកគេត្រូវប្រឈមនឹងការធ្វើដំណើរដ៏គួរឱ្យញញើតទៅផ្ទះរបស់ក្រុមជើងឯកលីគកំពូល Manchester City ដែលនៅទីនោះ លោក Arteta ធ្វើតួនាទីជាជំនួយការរបស់លោក Pep Guardiola មុននឹងចាកចេញទៅដឹកនាំក្រុមលំដាប់កំពូលនៅក្រុងឡុងដ៍ Arsenal។
ការប្រកួតចាញ់ក្រុម Man City នឹងធ្វើឱ្យមានកាន់ខ្លាំងបន្ថែមទៀតចំពោះលោក Arteta ដែលបានសុំឱ្យអ្នកគាំទ្ររបស់ Arsenal ជួយជំរុញលើកទឹកចិត្ត ក្នុងកំលុងពេលវេលាដ៏លំបាក ដែលគាត់ពណ៌នាថា ជារឿងមិនធ្លាប់កើតមានមកពីមុន ក្នុងប្រវត្តិសាស្ត្ររបស់ក្លិប។
លោក Arteta បានបន្ថែមថា៖ «យើងមិនដឹងថា អ្វីដែលយើងត្រូវប្រឈមជាមួយនៅចុងសប្ដាហ៍នេះ នឹងក្លាយជាហ្គេមមួយខុសគ្នាដាច់ស្រឡះ។ ខ្ញុំមិនដឹងថា អ្វី ដែលនឹងកើតឡើង ក្នុងទីផ្សារដោះដូរកីឡាករនោះឡើយ។ ប៉ុន្មានថ្ងៃកន្លងទៅ ការចាកចេញខ្លះ ជាការរៀបចំរបស់ក្លិប»៕ AFP/VN
