.jpg)
ប្រធាន FIFA លោក Infantino (ស្ដាំ) ឆ្លើយតបនឹងអ្នកសារព័ត៌មាន កន្លងមក។ AFP
ក្រុងប៉ារីស៖ ក្រសួងយុត្តិធម៌សហរដ្ឋអាមេរិកបានព្រមព្រៀងប្រគល់ឱ្យសហព័ន្ធបាល់ទាត់ពិភពលោក (FIFA) នូវទឹកប្រាក់ចំនួន ១៧១ លានអឺរ៉ូ ($២០១លាន) ដែលរឹបអូសបានពីក្រុមមន្ត្រីបាល់ទាត់ពុករលួយ។ នេះបើយោងតាមការប្រកាសរបស់ស្ថាប័នគ្រប់គ្រងបាល់ទាត់អន្តរជាតិមួយនេះ កាលពីថ្ងៃអង្គារ។
ភាគច្រើននៃសាច់ប្រាក់នោះ បានមកពីការមានចំណាត់ការផ្លូវច្បាប់របស់សហរដ្ឋអាមេរិក ក្រោយកើតមានរឿងអាស្រូវ ដែលមានឈ្មោះថា «FIFAgate» ដែលបានផ្ទុះឡើង ក្នុងខែឧសភា ឆ្នាំ ២០១៥ រហូតដល់មានការចាប់ខ្លួនជាប្រវត្តិសាស្ត្រចំពោះនាយកប្រតិបត្តិបាល់កីឡាបាល់ទាត់ពិភពលោក ៧ រូប ក្នុងក្រុងហ៊្សូរិច ហើយ ២-៣ ខែក្រោយមក នាំឱ្យមានការចាកចេញពីតំណែងរបស់លោក Sepp Blatter ដែលជាប្រធាន FIFA តាំងពីឆ្នាំ ១៩៩៨។
«ប្រាក់នេះ ត្រូវបានរឹបអូសពីគណនីធនាគាររបស់អតីតមន្ត្រី ដែលមានពាក់ព័ន្ធ ហើយក្រោយមកត្រូវបានកាត់ទោសជាច្រើនឆ្នាំនៃគម្រោងពុករលួយ ក្នុងវិស័យកីឡាបាល់ទាត់»។ នេះជាការឱ្យដឹងពី FIFA ក្នុងសេចក្ដីប្រកាស ដែលផូស្តតាមរយៈវេបសាយរបស់ខ្លួន។
ជាមួយគ្នានេះ សហព័ន្ធបានឱ្យដឹងថា ស្ថាប័នបានបង្កើតមូលនិធិមួយឈ្មោះ «World Football Remission Fund» (មូលនិធិអនុគ្រោះវិស័យកីឡាបាល់ទាត់ពិភពលោក) ក្រោមការត្រួតពិនិត្យតាមដានពីមូលនិធិរបស់ FIFA ដើម្បីប្រើប្រាស់ប្រាក់នេះ ជួយគាំទ្រជាហិរញ្ញវត្ថុដល់គម្រោងពាក់ព័ន្ធនឹងបាល់ទាត់ ដែលជះឥទ្ធិពលវិជ្ជមានដល់សហគមន៍នៅទូទាំងពិភពលោកទាំងមូល។
លោក Gianni Infantino ដែលមកជំនួសតំណែងលោក Blatter ដើម្បីធ្វើជាប្រធានរបស់ FIFA ស្វាគមន៍ចំពោះការព្រមព្រៀងនេះ។
«ខ្ញុំមានក្ដីរីករាយក្នុងការបានឃើញលុយទាំងនោះ ដែលត្រូវបានផ្ទេរយកទាំងខុសច្បាប់ពីវិស័យបាល់ទាត់ ឥឡូវនេះ កំពុងវិលត្រឡប់មក ដើម្បីយកទៅប្រើប្រាស់សម្រាប់វត្ថុបំណងដ៏ត្រឹមត្រូវវិញហើយ ដូចដែលវាត្រូវតែបែបហ្នឹងតាំងពីដំបូង»។ នេះជាប្រសាសន៍របស់លោក Infantino។
លោក Infantino បានបន្ថែមថា៖ «វាជារឿងពិសេសណាស់ក្នុងការបានឃើញនូវជំនួយទឹកប្រាក់ដ៏ច្រើនសន្ធឹកសន្ធាប់ ដែលត្រូវបានយកមកប្រើប្រាស់តាមរយៈមូលនិធិរបស់ FIFA ដែលអាចជះឥទ្ធិពលជាវិជ្ជមានដល់មនុស្សជាច្រើន ក្នុងរង្វង់ពិភពនៃកីឡាបាល់ទាត់ ដោយជាពិសេសតាមរយៈកម្មវិធីយុវជន និងសហគមន៍»។
លើសពីនេះទៀត ប្រព័ន្ធយុត្តិធម៌របស់អាមេរិកនៅបន្តស៊ើបអង្កេតវិស័យបាល់ទាត់ពិភពលោកដដែល ជាពិសេសនោះ ការផ្ដល់សិទ្ធិឱ្យប្រទេសកាតា ធ្វើជាម្ចាស់ផ្ទះដើម្បីរៀបចំព្រឹត្តិការណ៍ World Cup 2022 ដោយមានការសង្ស័យថា អាចនឹងមានទិញសំឡេងឆ្នោត៕ AFP/VN
