ក្រុងរីយោដឺហ្សេនេរ៉ូ: អ្នកចាត់ការក្រុមមេឃខៀវ Manchester City លោក Pep Guardiola (Pep) បានឱ្យដឹងកាលពីថ្ងៃពុធថា លោកមានគម្រោងចាកចេញពីក្លិបជើងឯកលីគកំពូលអង់គ្លេស នៅពេលដែលកុងត្រាបច្ចុប្បន្ននរបស់គាត់ ត្រូវបញ្ចប់ ក្នុងឆ្នាំ២០២៣ ហើយសង្ឃឹមថា ចុងក្រោយ នឹងបានដឹកនាំក្រុមជម្រើសជាតិ។
លោក Pep បានប្រាប់ថា៖ «ក្រោយរយៈពេល ៧ ឆ្នាំ ជាមួយក្លិបនេះ ខ្ញុំគិតថា ខ្ញុំនឹងសម្រាកបន្តិច។ ខ្ញុំនឹងត្រូវមើលនូវអ្វី ដែលយើងបានធ្វើ និងថ្លឹងថ្លែងនូវកម្លាំងជំរុញចិត្ត សម្រាប់អនាគត។ ហើយក្នុងដំណាក់កាលនេះ ខ្ញុំចង់ធ្វើជាគ្រូបង្វឹក ក្នុងក្រុមជម្រើសជាតិ ដូចជាក្រុមនៅតំបន់អាមេរិកឡាទីន ឬតំបន់អឺរ៉ុប។ ខ្ញុំចង់មានបទពិសោធន៍ ក្នុងការប្រកួតប្រជែង ក្នុងកម្មវិធី Copa America»។
តែយ៉ាងណាក្ដី លោក Pep ដែលបច្ចុប្បន្ន មានវ័យ ៥០ ឆ្នាំ មិនបានមានរំពឹងថា ក្រុមជម្រើសជាតិនោះ គឺប្រេស៊ីលនោះទេ។
«មែនហើយ! ក្រុមជម្រើសជាតិ នឹងក្លាយជាជំហានបន្ទាប់។ ខ្ញុំយល់ថា គ្រូបង្វឹករបស់ក្រុមប្រេស៊ីល នឹងតែងតែជាជនជាតិប្រេស៊ីល។ ខ្ញុំមិនឃើញគ្រូបង្វឹកបរទេស ដឹកនាំក្រុម ដូចប្រេស៊ីលឡើយ»។ នេះជាប្រសាសន៍របស់លោក Pep ក្នុងព្រឹត្តិការណ៍អនឡាញ ដែលរៀបចំដោយក្រុមហ៊ុនហិរញ្ញវត្ថុប្រេស៊ីល XP Investimentos ហើយត្រូវបានស្រង់សម្ដីដោយទូរទស្សន៍ ESPN Brasil។
អតីតកីឡាកររបស់ក្រុមអ្នកបុណ្យ Barcelona រូបនេះ ដឹកនាំក្រុម Man City ឱ្យលើកពានក្របខ័ណ្ឌ Premier League ៣ដង ក្នុងចំណោមការធ្វើតួនាទី ៥ រដូវកាលរបស់លោក ហើយកាលពីរដូវកាលមុន ជួយឱ្យក្រុមយក្សនៃក្រុងមេនឆេស្ទ័រឡើងដល់វគ្គផ្ដាច់ព្រ័ត្រ នៅក្របខ័ណ្ឌ Champions League តែចាញ់ក្រុមរួមលីគ Chelsea ១-០។
នៅមុននោះ លោកឈ្នះពានលំដាប់កំពូលរបស់អឺរ៉ុប ២ដងជាមួយក្រុម Barcelona និងពានក្របខ័ណ្ឌ La Liga ៣ ដងផងដែរ ជាមួយក្លិបយក្សតំបន់កាតាឡាន់ ព្រមទាំងលើកពានរង្វាន់ទាំងតូចទាំងធំជាច្រើនជាមួយក្រុម Bayern Munich នៅអាល្លឺម៉ង់។
តែយ៉ាងណា លោកនៅមិនទាន់ធ្លាប់បានដឹកនាំក្រុមជម្រើសជាតិ ឬក៏ឈ្នះពានរង្វាន់ណាមួយឡើយ ក្នុងកម្រិតអន្តរជាតិ។
ព្រឹត្តិការន៍ជួបគ្នាតាមអនឡាន កាលពីថ្ងៃពុធនេះ ក៏មានផងវដែរនូវវត្តមានរបស់អតីតបេក្ខភាពប្រជែងតំណែងប្រធានាធិបតី អ្នកស្រី Hillary Clinton និងសកម្មជនសិទ្ធិមនុស្សប៉ាគីស្ថាន នាង Malala Yousafzai ដែលជាម្ចាស់ជយលាភីពានរង្វាន់ណូបែលសន្តិភាព៕ AFP/VN