.jpg)
ខ្សែប្រយុទ្ធ Leonardo Mancuso ស៊ុតបញ្ចូលទី អំឡុងពេលប្រកួតជាមួយក្រុម Juventus។ រូបថត AFP
ក្រុងទូរីន៖ ក្រុមសេះបង្កង់ Juventus ភ្លាត់រងបរាជ័យដ៏គួរឱ្យភ្ញាក់ផ្អើលក្នុងលទ្ធផល ១-០ ក្រោមថ្វីជើងរបស់ក្រុមភ្ញៀវ Empoli ក្នុងការប្រកួតនៅក្របខ័ណ្ឌ Serie A កាលពីថ្ងៃសៅរ៍ ដោយនេះជាហ្គេមដំបូង ដែលធ្វើឡើង ដោយចប់យុគសម័យរបស់ខ្សែប្រយុទ្ធឆ្នើម Cristiano Ronaldo។
១ គ្រាប់របស់ខ្សែប្រយុទ្ធ Leonardo Mancuso នៅពាក់កណ្ដាលផ្លូវនៃវគ្គទី១ សម្រាប់ការប្រកួតនាកីឡដ្ឋាន Allianz ល្មមគ្រប់គ្រាន់ជួយឱ្យក្រុមភ្ញៀវ Empoli មានជ័យជម្នះ ហើយធ្វើឱ្យក្រុម Juve មានតែ ១ ពិន្ទុ ពីការចាប់ផ្ដើមយុទ្ធនាការបើកឆាក ២ ហ្គេមដំបូង។
ស៊ុបភើស្តារ Ronaldo បានសម្រេចចិត្តសុំចែកផ្លូវជាមួយក្រុមយក្សអ៊ីតាលី កាលពីថ្ងៃសុក្រ មុននឹងមានការព្រមព្រៀងវិលទៅចូលរួមជាមួយក្រុមចាស់ Manchester United ដែលជាការផ្ទេរមួយធ្វើឱ្យបាល់ទាត់អឺរ៉ុបស្រឡាំងកាំង។
គ្រូបង្វឹករបស់ក្រុមសេះបង្កង់ លោក Massimiliano Allegri បានលើកស្មារបស់គាត់ ហើយនិយាយថា ជីវិតត្រូវដំណើរទៅមុខ នៅពេលដែលគាត់បានបង្ហើបប្រាប់ កាលពីថ្ងៃសុក្រថា ខ្សែប្រយុទ្ធដ៏ឆ្នើមរបស់ក្រុម Ronaldo ប្រាប់គាត់ថា រូបគេចង់ចាកចេញ។
ក្រុម Juve បាត់នូវភាពមុតស្រួច នៅចំពោះមុខទី ដែលនេះ អាចជាអ្វីដ៏អាក្រក់បំផុតក្នុងការចាប់ផ្ដើមជីវិតដោយគ្មានវត្តមានរបស់កីឡាករអន្តរជាតិព័រទុយហ្គាល់វ័យ ៣៦ ឆ្នាំ ដែលកាលពីរដូវកាលមុន គឺជាអ្នកស៊ុតបញ្ចូលទីបានច្រើនជាងគេនៅ Serie A និងដែលទម្លុះសំណាញ់ទីបានជាង ១០០ គ្រាប់ ឱ្យក្រុមដែលមានរហស្សនាមថា «Old Lady»(ស្ត្រីវ័យចំណាស់) ក្នុងរយៈពេល ៣ រដូវកាល។
ក្រុម Juve បានបញ្ចប់ការប្រកួតជាមួយនឹងការមិនពេញចិត្តរបស់អ្នកគាំទ្រ ដែលស៊ាំនឹងការមើលក្រុមរបស់ខ្លួន ដែលមានភាពក្លៀវក្លានៅ Serie A តិចជាងមុន ហើយកំពុងបារម្ភពីឱកាសក្នុងការដណ្ដើមជើងឯកលីគកំពូលពីក្រុមគូប្រជែង Inter Milan។
លោក Allegri បានប្រាប់ប្រព័ន្ធផ្សព្វផ្សាយ DAZN ថា៖ «យប់នេះ ក្រុមចាប់ផ្ដើមបានល្អ ក្រោយមានការស៊ុតបញ្ចូលទី ពួកយើងចាប់ផ្ដើមបែកបាក់ ហើយយើងធ្វើឱ្យខ្លួនឯងស្ថិតក្នុងដៃរបស់ Empoli។ វាជារឿងចាំបាច់ ក្នុងការមានភាពអត់ធ្មត់ជាងនេះ លេងជាក្រុម និងមិនមែនលេងតែឯងទេ។ កីឡាករជាច្រើនបានបង្កើតកំហុស»៕ AFP/VN
