ក្រុងប៉ារីស៖ Lionel Messi ចាប់ផ្ដើមក្នុងនាមជាកីឡាករបម្រុង ពេលធ្វើការបង្ហាញខ្លួនលើកដំបូងជាមួយក្រុមថ្មី Paris Saint-Germain (PSG) កាលពីថ្ងៃអាទិត្យ តែខ្សែប្រយុទ្ធ Kylian Mbappe លេចធ្លោយ៉ាងខ្លាំង ជាមួយនឹងការម៉ៅផ្ដាច់ម្នាក់ឯងទាំង ២ គ្រាប់ ក្នុងជ័យជម្នះ ២-០ លើក្រុមម្ចាស់ផ្ទះ Reims ពីការប្រកួតនៅក្របខ័ណ្ឌ Ligue 1។
Messi ដែលពាក់អាវលេខ ៣០ ងើបចេញពីកៅអីកីឡាករបម្រុងនៅនាទីទី៦៦ ដើម្បីចូលលេងជំនួស Neymar ក្នុងហ្គេម នៅឯកីឡដ្ឋាន Auguste-Delaune ដែលអ្នកគាំទ្រចំនួន ២១ ០០០ នាក់ នាំគ្នាស្រែកហៅឈ្មោះខ្សែប្រយុទ្ធអន្តរជាតិអាហ្សង់ទីនមុនហ្នឹង នៅពេលគេចេញមកកម្ដៅសាច់ដុំ។
ស៊ុបភើស្តារវ័យ ៣៤ ឆ្នាំ មិនបានចូលលេងតាំងពីមកដល់ក្រុងប៉ារីស ដោយការចាកចេញពីក្រុម Barcelona ជិត ៣ សប្ដាហ៍កន្លងទៅ ដោយការបង្ហាញវត្តមានក្នុងហ្គេមចុងក្រោយ ឃើញនៅឯព្រឹត្តិការណ៍ Copa America វគ្គផ្ដាច់ព្រ័ត្រ កាលពីថ្ងៃទី ១១ ខែកក្កដា ដែលនៅទីនោះ រូបគេបានរួមចំណែកយ៉ាងធំក្នុងការជួយឱ្យក្រុមជម្រើសជាតិរបស់ខ្លួន ឈ្នះជើងឯកជាមួយនឹងការមានជ័យជម្នះលើក្រុមប្រេស៊ីល។
ម្ចាស់ជយលាភីពាន Ballon d''Or ៦ សម័យ នឹងត្រូវរង់ចាំគ្រាប់បាល់ទី១ ជាមួយក្រុមថ្មី និងការចាប់ផ្ដើមក្នុងជម្រើសដំបូង ដែលអាចកើតមាន ពេលក្រុម PSG បើកទ្វារកីឡដ្ឋាន Parc des Princes ស្វាគមន៍ក្រុម Clermont ក្នុងប្រកួតបន្ទាប់ នាថ្ងៃទី ១១ ខែកញ្ញា។
«ខ្ញុំរីករាយដែលគេបានបង្ហាញខ្លួនលើកដំបូង។ វាជាការសំខាន់ណាស់សម្រាប់រូបគេ»។ នេះជាប្រសាសន៍របស់គ្រូបង្វឹកក្រុម PSG លោក Mauricio Pochettino ដែលបានប្រាប់ទៅប្រព័ន្ធផ្សព្វផ្សាយ Amazon Prime ក្រោយការបង្ហាញខ្លួនលើកទី១ ដែលជាល្អប៉ុន្មានរបស់ Messi ក្នុងឯកសណ្ឋានរបស់ក្រុមអ្នកមាននៅបារាំង។
អ្នកចាត់ការសញ្ជាតិអាហ្សង់ទីន លោក Pochettino បន្ថែមថា៖ «គេនៅឆ្ងាយពីទម្រង់លេងកម្រិតកំពូលរបស់គេណាស់ តែគេធ្វើការហ្វឹកហាត់បានយ៉ាងល្អ ហើយគេនឹងមានភាពពេញបរិបូរណ៍ក្នុង ២ សប្ដាហ៍បន្ទាប់ ពោលគឺក្រោយសម្រាកប្រកួតសម្រាប់ក្រុមជម្រើសជាតិ ហើយប្រាកដណាស់ យើងកំពុងរង់ចាំមើលនូវទម្រង់លេងដ៏ល្អបំផុតរបស់គេ»។
សប្ដាហ៍ដែលជិតមកដល់ហ្គេមនេះ មិនមែនគ្រប់គ្នាចាប់អារម្មណ៍រឿងរ៉ាវរបស់ Messi នោះទេ តែផ្ទុយទៅវិញ គឺគ្រប់គ្នានិយាយពីបញ្ហាអនាគតរបស់កីឡាករ Mbappe ដោយមានសេចក្ដីរាយការណ៍ថា ក្លិបយក្សនៅអេស្ប៉ាញ Real Madrid ត្រូវបានបដិសេធទាំង ២ ដង សម្រាប់ការស្នើ ដើម្បីទិញយកខ្សែប្រយុទ្ធជយលាភីពាន World Cup ជាមួយក្រុមជម្រើសជាតិបារាំងរូបនេះ។
ការស្នើចុងក្រោយបំផុតត្រូវបានដឹងថា ប្រមាណជា ១៨០ លានអឺរ៉ូ ($២១២ លាន) ដែលជាតម្លៃខ្ពស់កប់ពពក សម្រាប់កីឡាករម្នាក់ ដែលកុងត្រារបស់គេ នឹងអស់សុពលភាពនៅដំណាច់រដូវកាលនេះ ហើយដែលនឹងមានសិទ្ធិចរចាដោយសេរីជាមួយក្លិបណាក៏បាន ក្នុងខែមករា ដោយក្លិប PSG មិនទទួលបានសូម្បី ១ សេន ពីការចុះកុងត្រានោះ។
តម្លៃដែលស្នើនោះ គឺស្មើផងដែរនឹងចំនួនទឹកប្រាក់ ដែលក្រុម PSG បានចំណាយឱ្យទៅក្រុមរួមលីគ Monaco កាលពីឆ្នាំ ២០១៧ ដើម្បីទិញយកកីឡាករ Mbappe ដែលបានបង្ហាញចេតនាយ៉ាងច្បាស់លាស់ក្នុងការចង់ចាកចេញទៅក្លិបផ្សេង ដោយនេះអាចជាភាគរយខ្ពស់ ដែលវាជាការលេងលើកចុងក្រោយឱ្យក្រុមក៏ថាបាន។
ជាមួយនឹងទីផ្សារដោះដូរកីឡាករ ត្រូវដល់កាលកំណត់នៅថ្ងៃអង្គារ កីឡាករវ័យ ២២ ឆ្នាំ ហាក់ដូចជាមិនត្រូវបានធ្វើឱ្យវង្វេងវង្វាន់នឹងការនិយាយពីការផ្លាស់ប្ដូរក្លិបនោះឡើយ ខណៈដែលរូបគេនៅតែរកគ្រាប់បាល់បាន ដោយការស៊ុត ២ គ្រាប់ ដែលជួយឱ្យក្រុម PSG ឈរលេខ ១ ក្នុងតារាងពិន្ទុរបស់លីគកំពូលជាមួយនឹងការមាន ១២ ពិន្ទុ ពេញពីការប្រកួតទាំង ៤ ហ្គេមដំបូងនេះ៕ AFP/VN