.jpg)
ក្រុងប៊ែរឡាំង៖ Wolfsburg ដណ្ដើមបានចំណាត់ថ្នាក់ទី១ ក្នុងតារាងពិន្ទុនៃក្របខ័ណ្ឌ Bundesliga អាល្លឺម៉ង់ កាលពីថ្ងៃអាទិត្យ ជាមួយនឹងជ័យជម្នះ ១-០ លើក្រុម RB Leipzig តែជោគជ័យរបស់ក្រុមម្ចាស់ផ្ទះ ត្រូវបាំងដោយការដួលសន្លប់របស់អ្នកគាំទ្រក្នុងកីឡដ្ឋាន។
ក្រុម Wolfsburg អត់ធ្វើការអបអរឡើយ ក្រោយសំឡេងកញ្ចែចុងក្រោយបន្លឺឡើង ដោយសារមានហេតុការណ៍ ដែលអ្នកគាំទ្រម្នាក់ដួលសន្លប់ ក្នុងអំឡុងពេលប្រកួត ហើយត្រូវបានបញ្ជូនទៅមន្ទីរពេទ្យយ៉ាងប្រញាប់ប្រញាល់ ក្រោយពីបានធ្វើការសង្គ្រោះបន្ទាន់រួច។
«ក្នុងកាលៈទេសៈនេះ វាមិនមែនជារឿងសមរម្យនោះឡើយ ក្នុងការធ្វើការអបអរ។ ក្នុងនាមក្លិបទាំងមូល គំនិតរបស់យើង កំពុងគិតទៅកន្លែងផ្សេងហើយពេលនេះ»។ នេះជាសម្ដីរបស់កីឡាករ Wolfsburg គឺខ្សែបម្រើ Maximilian Arnold។
ក្រុមម្ចាស់ផ្ទះ មានគ្រាប់បាល់ជ័យជម្នះ មិនយូរប៉ុន្មាន បន្ទាប់ពីហ្គេមចាប់ផ្ដើមវិញ ក្រោយសម្រាកតង់ទី១ ដោយខ្សែការពារឆ្វេង Jerome Roussillon ប្រតិកម្មតបយ៉ាងរហ័ស នៅពេលមានឱកាសស៊ុតបាល់ ដែលអ្នកចាំទី Peter Gulacsi របស់ក្រុម Leipzig ផ្ដួលខ្លួនទះ ហើយប្លាតមកត្រូវជើង។
ក្រោមការដឹកនាំរបស់គ្រូបង្វឹកថ្មី លោក Mark van Bommel ឥឡូវនេះ Wolfsburg គឺជាក្រុមតែ ១ គត់ ក្នុងក្របខ័ណ្ឌកំពូលរបស់អាល្លឺម៉ង់ ដែលឈ្នះទាំងអស់ពីការប្រកួតបើកឆាក ៣ ហ្គេមដំបូង នៅរដូវកាលនេះ។
វាជាលទ្ធផលដ៏គួរឱ្យខកចិត្តសម្រាប់គ្រូបង្វឹកលោក Jesse Marsch ដែលក្រុម Leipzig របស់លោក ទើបបំបាក់ក្រុម Stuttgart ៤-០ កាលពីប្រកួតមុន ដើម្បីស្គាល់រសជាតិនៃជ័យជម្នះលើកទី១ ក្រោយពីចាញ់ក្នុងប្រកួតបើកឆាកដំបូង សម្រាប់រដូវកាលថ្មីនៅផ្ទះរបស់ក្រុម Mainz៕ AFP/VN
