.jpg)
Ronaldo (កណ្ដាល) កំពុងចូលរួមហ្វឹកហាត់ជាមួយមិត្តរួមក្រុមជម្រើសជាតិព័រទុយហ្គាល់ កាលពីថ្ងៃចន្ទ។ រូបថត AFP
ក្រុងលីសបោន៖ ខ្សែប្រយុទ្ធឆ្នើម Cristiano Ronaldo បានទៅចូលរួមហ្វឹកហាត់ជាមួយក្រុមជម្រើសជាតិព័រទុយហ្គាល់របស់ខ្លួន កាលពីថ្ងៃចន្ទ ដើម្បីជាការត្រៀមសម្រាប់ការប្រកួតនៅខែក្រោយ បន្ទាប់បានព្រមព្រៀងទៅប្រកបអាជីពជាមួយក្រុមបិសាចក្រហម Manchester United ជាថ្មីម្ដងទៀត។
ស៊ុបភើស្តារវ័យ ៣៦ ឆ្នាំ រូបនេះ អាចបំបែកកំណត់ត្រាគ្រាប់បាល់ជម្រើសជាតិរបស់អតីតកីឡាករអ៊ីរ៉ង់ Ali Daei ចំនួន ១០៩ គ្រាប់បានហើយ ជាមួយនឹងគ្រាប់បាល់ ១ គ្រាប់ បើធ្វើបានពីការប្រកួត ក្នុងជម្រុះ World Cup ទល់នឹងក្រុមសា.អៀរឡង់ នៅថ្ងៃពុធនេះ និងក្រុមអាស៊ែបៃហ្សង់ នាថ្ងៃអង្គា ក្នុងសប្ដាហ៍បន្ទាប់។
កាលពីថ្ងៃសុក្រ សប្ដាហ៍មុន ក្រុម Man United បានប្រកាសថា ពួកគេបានឈានដល់កិច្ចព្រមព្រៀង ក្នុងការចុះហត្ថលេខាយកកីឡាករជយលាភី Ballon d''Or ៥ សម័យ Cristiano Ronaldo ពីក្រុមយក្សអ៊ីតាលី Juventus។
«ពួកយើងនឹងធ្វើគ្រប់យ៉ាង ដែលពួកយើងអាចធ្វើបាន ដើម្បីឱ្យគាត់មានលទ្ធភាពបំបែកកំណត់ត្រានោះ»។ នេះជាការនិយាយពីខ្សែបម្រើ Goncalo Guedes របស់ក្រុមព័រទុយហ្គាល់ ដែលប្រាប់ទៅអ្នកសារព័ត៌មាន កាលពីថ្ងៃចន្ទ។
ជាមួយគ្នានេះ គេរំពឹងថា កីឡាករ Ronaldo ដែលជួយក្លិបយក្សនៅអេស្ប៉ាញ Real Madrid ឈ្នះពានទាំងតូចទាំងធំជាច្រើននោះ នឹងធ្វើការវិលមកមានវត្តមាន ក្នុងក្រុមបិសាចក្រហមវិញ ពេលក្រុមរបស់លោក Ole Gunnar Solskjaer បើកទ្វារកីឡដ្ឋាន Old Trafford ស្វាគមន៍ក្រុម Newcastle នាថ្ងៃទី ១១ ខែកញ្ញានេះ។
សម្រាប់យុទ្ធនាការទាត់ជម្រុះ ប្រចាំតំបន់អឺរ៉ុប ដើម្បីដណ្ដើមសិទ្ធិទៅលេងជុំចុងក្រោយ ក្នុងព្រឹត្តិការណ៍ World Cup 2022 នៅប្រទេសកាតា ក្រុមព័រទុយហ្គាល់ កំពុងឈរលេខ ១ ក្នុងពូល A ក្រោយបញ្ចប់ ៣ ហ្គេម ដោយមាន ៧ ពិន្ទុ ស្មើក្រុមលេខ ២ ស៊ែប៊ី។ រីឯក្រុមលេខ ៣ លុចសំបួ មាន ៣ ពិន្ទុ ហើយក្រុមលេខ ៤ សា.អៀរឡង់ និងលេខ ៥ អាស៊ែបៃហ្សង់ មានសូន្យពិន្ទុដូចគ្នា តែទាំង ៣ ក្រុមក្រោយនេះ ទើបលេងបាន ២ លើកប៉ុណ្ណោះ៕ AFP/VN
