ក្រុងញ៉ូវយ៉ក៖ កីឡាករវាយកូនបាល់ (តិន្នីស) អាជីព Novak Djokovic និយាយថា ការនៅជាមួយនឹងពេលវេលាចំពោះមុខ និងការដោះស្រាយបញ្ហាប្រឈមនានា គឺជាអាវុធសម្ងាត់របស់គេ ក្នុងការអត់ធ្មត់ជាមួយអារម្មណ៍ និងសម្ពាធ សម្រាប់ការព្យាយាមបង្កើតប្រវត្តិសាស្ត្រ ក្នុងវិស័យកីឡាតិន្នីស។
កីឡាករសញ្ជាតិស៊ែប៊ី ដែលបច្ចុប្បន្ន មានចំណាត់ថ្នាក់លេខ ១ ពិភពលោក រូបនេះ បានធ្វើដំណើរទៅជុំទី ២ នៃព្រឹត្តិការណ៍ប្រកួតដណ្ដើមពានលំដាប់ Grand Slam ប្រចាំឆ្នាំចុងក្រោយគេ គឺកម្មវិធី US Open 2021 នៅសហរដ្ឋអាមេរិក ដោយការទម្លាក់កីឡាករវ័យក្មេង Holger Rune របស់ដាណឺម៉ាក ជាមួយនឹងជ័យជម្នះ ៣-១ គឺ ៦-១ ៦-៧ ៦-២ និង ៦-១។
កីឡាករ Djokovic វ័យ ៣៤ ឆ្នាំ កំពុងប្រឹងប្រែងឱ្យបានឈ្នះពានពីកម្មវិធី US Open ដើម្បីធ្វើបានឥតខ្ចោះ ក្នុងការក្លាយជាអត្តពលិកបុរសទី១ ដែលឈ្នះពាន Grand Slam ប្រចាំឆ្នាំទាំងអស់ គិតតាំងពីអតីតកីឡាករឆ្នើមសញ្ជាតិអូស្ត្រាលី Rod Laver ធ្វើបានក្នុងឆ្នាំ ១៩៦៩ និងដើម្បីបានកាន់ពានពីព្រឹត្តិការណ៍ធំៗជាកំណត់ត្រា ២១ ដង។
«អ្នកមានទាំងការរំពឹងទុក និងសម្ពាធជាច្រើន មិនត្រឹមតែពីសហគមន៍កីឡាតិន្នីសទាំងមូលនោះទេ តែថែមទាំងខ្លួនខ្ញុំផងដែរ។ ដោយជាក់ស្ដែង ខ្ញុំចង់ឱ្យខ្លួនឯងឈ្នះពានរង្វាន់ និងបង្កើតនូវប្រវត្តិសាស្ត្រ។ គ្មានអ្វីត្រូវសង្ស័យឡើយ នោះហើយជាកម្លាំងជំរុញចិត្តរបស់ខ្ញុំ»។ នេះជាសម្ដីរបស់ Djokovic។
កីឡាករ Djokovic បានបន្តទៀតថា៖ «ខ្ញុំយកចិត្តទុកដាក់លើការខិតខំ ក្នុងការធ្វើឱ្យខ្លួនឯងមាននូវទម្រង់លេងល្អបំផុត ជារៀងរាល់ថ្ងៃ។ វាទទួលបាននូវថាមពលមហាសាល ក្នុងការនៅជាមួយនឹងបច្ចុប្បន្នភាព។ ការធ្វើឱ្យកាន់តែប្រសើរឡើងផ្នែកខាងផ្លូវចិត្ត និងអារម្មណ៍ ឱ្យនៅក្នុងពេលវេលាចំពោះមុខ ហើយព្យាយាមដោះស្រាយវា ក្នុងវិធីបែបនេះ ដែលនឹងផ្ដល់ផលឱ្យអ្នកយ៉ាងអស្ចារ្យ»។
«ខ្ញុំមានទម្លាប់ផ្ទាល់ខ្លួនប្រចាំថ្ងៃរបស់ខ្ញុំ។ ខ្ញុំគ្រាន់តែប្រឹងប្រែងធ្វើរឿងនានា ការហ៊ុំព័ទ្ធទៅដោយមនុស្សម្នាជាច្រើន មានវិធី និងដំណើរផ្លូវ ក្នុងការប្រកួតប្រជែងសមនឹងខ្លួនខ្ញុំ ដែលខ្ញុំដឹងច្បាស់ថា បានធ្វើរួចហើយកាលពីអតីត»។ នេះជាការបន្ថែមរបស់ Djokovic។
កីឡាករ Djokovic មានបទបិសោធលើកពានលំដាប់ Grand Slam ២០ដងរួចហើយ ដោយក្នុងនោះ ៣ដង នៅលើទីលាន នាក្រុងញ៉ូវយ៉កនេះ ហើយមានទម្លាប់ជាច្រើន ក្នុងការធ្វើរឿងអ្វីផ្សេង ពេលជួបនឹងស្ថានភាពតានតឹង។
«មានរឿងជាច្រើន ដែលអ្នកតែងអាចពឹងពាក់បានជានិច្ច សូមត្រឡប់ទៅ ពេលអ្នកកំពុងជួបប្រទះនូវភាពច្របូកច្របល់ផ្នែកផ្លូវផ្លូវអារម្មណ៍។ នៅពេលវាមានច្រើនជ្រុលពេក ខ្ញុំបានអនុវត្តនូវវិធី ដែលខ្ញុំអាចដោះស្រាយជាមួយនឹងភាពច្របូកច្របល់ខាងផ្លូវអារម្មណ៍នោះបាន»។ Djokovic បញ្ជាក់បន្ថែម៕ AFP/VN