ក្រុងប៉ារីស៖ នៅទូទាំងទ្វីបអឺរ៉ុបជាពេលវេលា ដែលមនុស្សម្នាទាំងឡាយ ត្រូវត្រឡប់មកបំពេញការងាររបស់ខ្លួនវិញហើយ ក្រោយបញ្ចប់វិស្សមកាលរដូវក្ដៅ ហើយសម្រាប់ក្រុមជម្រើសជាតិអ៊ីតាលី ក៏បានវិលមកមានសកម្មភាពលើទីលានវិញ ដែលវាមានរយៈពេលមិនដល់ ៨ សប្ដាហ៍ផង ក្រោយពីបានលើកពាន Euro 2020 នៅឯពហុកីឡដ្ឋាន Wembley របស់ប្រទេសអង់គ្លេស។
៥៣ ថ្ងៃ រាប់ពីថ្ងៃរីករាយនៃការមានជ័យជម្នះលើក្រុមជម្រើសជាតិអង់គ្លេស ដោយការទាត់បាល់ប៉េណាល់ទីកាត់ក្ដី អំឡុងការប្រកួតដ៏ក្ដៅគគុក នាពេលរាត្រីក្នុងទឹកដីនៃក្រុងឡុងដ៍ ក្រុមដែលមានរហស្សនាម «Azzurri» (ពណ៌ខៀវ) អ៊ីតាលីនឹងទទួលបានវត្តមានរបស់អ្នកគាំទ្រផ្ទាល់ខ្លួនមកវិញ ពេលដែលពួកគេ ត្រូវបើកទ្វារផ្ទះស្វាគមន៍ក្រុមប៊ុលហ្គារី ក្នុងក្រុងផ្លូរ៉ង់ សម្រាប់វគ្គជម្រុះ World Cup។
ក្រុមអ៊ីតាលីរបស់លោក Roberto Mancini មិនអាចសម្រាកដោយសារស្កប់ស្កល់នឹងជោគជ័យនេះនោះឡើយ ព្រោះថា ដរាបណាពួកគេមិនទាន់ធានានូវសិទ្ធិក្នុងការបានទៅលេងនៅជុំចុងក្រោយ នៅប្រទេសកាតា ទេនោះ គឺពួកគេនឹងមិនអាចបំភ្លេចចោលទាំងស្រុង នូវការចងចាំនៃការខកខានមិនបានទៅលេង កាលពីព្រឹត្តិការណ៍ World Cup 2018 នោះឡើយ។
ក្រុមអ៊ីតាលីមិនទាន់ស្គាល់ពាក្យថា «ចាញ់» នោះឡើយ រហូតដល់ទៅ ៣៤ ហ្គេម ក្នុងនោះរួមទាំង ជ័យជម្នះពីការប្រកួត ៣ លើកដំបូង ក្នុងវគ្គជម្រុះនេះ ដែលចាប់ផ្ដើមតាំងពីខែមីនា ហើយឥឡូវនេះ ពួកគេកំពុងប្រឈមនឹងការប្រកួត ៣ ដង ក្នុងរយៈពេល ៨ ថ្ងៃ ដោយមានការជួបផងដែរ ជាមួយក្រុមម្ចាស់ផ្ទះស្វ៊ីស និងមកប៉ះក្រុមលីទុយអានីនៅផ្ទះខ្លួនឯង។
«ខ្ញុំចង់ឱ្យក្មេងៗ (កូនក្រុម) ទាំងអស់ ដឹងពីទីកន្លែង ដែលពួកគេត្រូវបញ្ឈប់។ ក្នុងនាមជាក្រុមជម្រើសជាតិមួយ យើងនៅតែអាចអភិវឌ្ឍឱ្យកាន់តែប្រសើរឡើង នៅរវាងពេលនេះ និងដល់ World Cup តែជាដំបូង យើងត្រូវបានសិទ្ធិទៅសិន»។ គ្រូបង្វឹកក្រុមអ៊ីតាលី លោក Mancini បានថ្លែង ក្នុងសប្ដាហ៍នេះ។
ការប្រកួតរបស់ក្រុមអ៊ីតាលី នៅថ្ងៃអាទិត្យ ក្នុងក្រុងបាសែល ទល់នឹងក្រុមស្វ៊ីស ដែលជាគូប្រជែងដ៏ធំបំផុតជាងគេ ប្រចាំពូល C អាចជាជំនួបមួយដ៏សំខាន់ដែរ។ សម្រាប់តំបន់អឺរ៉ុបនេះ មានតែក្រុមទី១ ក្នុងពូលទាំង ១០ ក្រោយបញ្ចប់ការទាត់ជម្រុះប៉ុណ្ណោះ ដែលទទួលបានសិទ្ធិស្វ័យប្រវត្តិទៅលេងនៅជុំចុងក្រោយ ខណៈដែលក្រុមផ្សេងទៀត ជាពិសេសក្រុមលេខ ២ ត្រូវប្រកួតគ្នាតាមរូបមន្តបានកំណត់ ដើម្បីដណ្ដើមកៅអីនៅសល់ ៣ ចុងក្រោយ ដែលនឹងធ្វើការប្រកួតចាញ់ធ្លាក់ (Play-off) ក្នុងខែមីនា៕ AFP/VN