ភ្នំពេញ៖ សហព័ន្ធកីឡាទោចក្រយាន និងគណៈកម្មការ CAMSOC បានសម្រេចជ្រើសរើសយកតំបន់មួយកន្លែងនៃជើងភ្នំគូលែន ស្ថិតក្នុងស្រុកបន្ទាយស្រី ខេត្តសៀមរាប សម្រាប់ជាកន្លែងបោះជំរំហ្វឹកហាត់ របស់ក្រុមជម្រើសជាតិកីឡាកង់ភ្នំ ដើម្បីបង្កើននូវកម្លាំងកាយ និងបច្ចេកទេស ហើយទីលាន ដែលមានកម្រិតបច្ចេកទេសល្អនេះ ក៏នឹងប្រើសម្រាប់ត្រៀមបម្រុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ ២០២៣ ពេលកម្ពុជា ធ្វើជាម្ចាស់ផ្ទះ ផងដែរ។
ជាមួយគ្នានេះ ក្រុមកីឡាករ កីឡាការិនីជម្រើសជាតិកីឡាទោចក្រយាន ដែលកំពុងបោះជំរំហ្វឹកហាត់ ត្រៀមព្រឹត្តិការណ៍ស៊ីហ្គេម លើកទី៣១ នៅប្រទេសវៀតណាម ឆ្នាំ ២០២១ ដែលបានលើកពេល ទៅធ្វើនៅឆ្នាំ ២០២២ នោះ ក៏កំពុងតែមានសក្តានុពល ខណៈដែលកម្រិតបច្ចេកទេស បានកើនឡើង។ នេះតាមការឱ្យដឹងពីលោក នូ ចំរើន ជាអគ្គលេខាធិការសហព័ន្ធកីឡាទោចក្រយានកម្ពុជា។
លោក នូ ចំរើន បានប្រាប់ថា ការបោះជំរំនេះ មានក្រុមជម្រើសជាតិកីឡាកកង់ភ្នំ សរុបចំនួន ១១ នាក់ ដែលបានចាប់ផ្តើមតាំងពីថ្ងៃទី ៤ ខែ មេសា ឆ្នាំ ២០២១ មក ក្រោមការផ្គត់ផ្គង់របស់ក្រសួងអប់រំ យុវជន និងកីឡា ដែលមានមជ្ឈមណ្ឌលជាតិហ្វឹកហ្វឺនកីឡា គ្រប់គ្រងជាមួយសហព័ន្ធ ហើយនេះជាយុទ្ធសាស្ត្រដ៏សំខាន់មួយ ដើម្បីពង្រឹងសមត្ថភាពអត្តពលិក ជាមួយនឹងការបន្ថែមនូវការអប់រំផ្លូវចិត្ត គឺជាទីលានស្តង់ដារស្រាប់ ដែលត្រៀមសម្រាប់ស៊ីហ្គេម ឆ្នាំ ២០២៣។
អគ្គលេខាធិការរូបនេះ បានបន្ថែមថា៖ «ជាមួយគ្នានេះ ក្រុមជម្រើសជាតិប្រភេទកង់គក់ ដែលកំពុងតែហ្វឹកហាត់នៅប្រទេសបារាំង ក្រោមការជួយជ្រោមជ្រែងពីសមាគមប្រណាំងកង់កម្ពុជានោះ នឹងវិលត្រឡប់មកមាតុប្រទេសវិញឆាប់ៗ ហើយយើងក៏នឹងត្រូវដាក់ទៅឱ្យបោះជំរំហ្វឹកហាត់ ជាមួយគ្នា ព្រោះទីលាន ដែលគណៈកម្មការ CAMSOC និងសហព័ន្ធអន្តរជាតិ សម្រេចនៅទឹកដីសៀមរាប ជាទីលាននោះ គឺមានសក្តានុពលល្អតាមបច្ចេកទេស»។
ចំណែកលោក អ៊ុច សុខវិបុល គ្រូបង្វឹកជម្រើសរើសជាតិកីឡាទោចក្រយាន បានអះអាងថា ការដាក់ចេញនូវយុទ្ធសាស្រ្ត ការអប់រំសុខភាព ផ្លូវចិត្ត បន្ថែមលើការហ្វឹកហាត់បង្កើនបច្ចេកទេស គឺជាយុទ្ធសាស្រ្តសំខាន់ ជួយជំរុញឱ្យអត្តពលិក ដែលនៅមានបទពិសោធតិច អាចពង្រឹងអភិវឌ្ឍសមត្ថភាពរីកចំរើនខ្លាំង មានកម្រិតបច្ចេកទេស និងសមត្ថភាពចូលរួមប្រកួតប្រជែងនៅលើឆាកអន្តរជាតិ ដោយក្លាហាន។
គ្រូបង្វឹករូបនេះ បានបន្ថែមថា៖ «អត្តពលិក និងគ្រូបង្វឹកសរុប ១១ នាក់ ក្នុងនោះមានកីឡាការិនីជម្រើសជាតិកីឡាទោចក្រយាន ២ រូប ដែលកំពុងទទួលការបណ្តុះបណ្តាលក្នុងជំរំហ្វឹកហាត់ នៅទីលានអន្តរជាតិខេត្តសៀមរាបនេះ នឹងត្រូវត្រៀមចូលរួមស៊ីហ្គេម លើកទី៣១ នៅប្រទេសវៀតណាម ជាលើកដំបូង ហេតុនេះយើងត្រូវបន្ថែមការអប់រំសុខភាពផ្លូវចិត្ត ផ្លូវកាយហ្វឹកហាត់បង្កើនបច្ចេកទេស ដើម្បីសមត្ថភាពឱ្យបានរីកចំរើន ដើម្បីបន្សាំខ្លួនជាមួយទីតាំងធម្មជាតិ ក្នុងតំបន់ដែលជាទីលានស្តង់ដារអន្តរជាតិ គឺល្អជាងការប្រមូលផ្តុំ នៅភ្នំពេញ ដូចឆ្នាំមុនៗកន្លងមកនោះឆ្ងាយណាស់»៕