.jpg)
ខ្សែការពារជប៉ុន TakehiroTomiyasu លេងអោយក្រុមជម្រើសជាតិក្នុងព្រឹត្តិការណ៍កីឡាអូឡាំពិក Tokyo Games 2020 នៅក្រុងតូក្យូ។ រូបថត AFP
ក្រុងឡុងដ៍៖ ក្រុមកាំភ្លើងធំ Arsenal បាននាំយកខ្សែការពារជប៉ុន TakehiroTomiyasu ពីក្រុមនៅអ៊ីតាលី Bologna ជាមួយនឹងតម្លៃ ១៩ លានផោន ($២៧,២ លាន) កាលពីថ្ងៃអង្គារ។
ក្លិបនៅក្របខ័ណ្ឌ Premier League អង់គ្លេសបានឱ្យដឹងថា កីឡាករ Tomiyasu បានព្រមព្រៀងចុះហត្ថលេខាក្នុងកុងត្រាជាមួយក្លិប ដែលត្រូវគេជឿថា កិច្ចសន្យាដំបូងមានរយៈពេល ៤ ឆ្នាំ និងជម្រើសបន្ត ១ រដូវកាលទៀត។
កីឡាករវ័យ ២២ ឆ្នាំ TakehiroTomiyasu អាចលេងទាំងតំណែងការពារកណ្ដាល និងការពារស្លាបខាងស្ដាំ ដែលវាជាការផ្ដល់ឱ្យអ្នកចាត់ការក្រុមលោក Mikel Arteta នូវជម្រើសថ្មីមួយបន្ថែមទៀត បន្ទាប់ពីកីឡាករ Hector Bellerin ត្រូវបានក្រុមនៅអេស្ប៉ាញ Real Betis ខ្ចីជើង។
លោក Arteta បានប្រាប់ថា៖ «កីឡាករ Takehiro គឺជាខ្សែការពារដ៏រឹងមាំម្នាក់ ដោយមានបទពិសោធយ៉ាងល្អ នៅក្របខ័ណ្ឌ Serie A និងក្នុងកម្រិតជាមួយក្រុមជម្រើសជាតិ។ គេជាខ្សែការពារមានភាពបត់បែន រហ័សរហួន ដោយមានគុណភាពការពារយ៉ាងល្អ បច្ចេកទេសខ្ពស់ និងមានភាពនឹងនរក្នុងការគ្រប់គ្រងបាល់»។
កីឡាករ Tomiyasu ធ្វើការបង្ហាញខ្លួនបាន ៦៣ ដង នៅ Serie A ជាមួយក្រុម Bologna ក្នុងរយៈពេល ២ រដូវកាលនេះ។ គេចូលលេងឱ្យក្រុមជម្រើសជាតិជប៉ុន ២៣ លើក ហើយរូបគេក៏ជាសមាជិករបស់ក្រុមសាមូរ៉ៃដែរ សម្រាប់ការប្រកួតក្នុងព្រឹត្តិការណ៍កីឡាអូឡាំពិក Tokyo Games 2020 នៅក្រុងតូក្យូ ដែលទើបបញ្ចប់ទៅថ្មីៗនេះ។
ក្រុម Arsenal បច្ចុប្បន្ន កំពុងស្ថិតក្នុងបាតតារាងនៃក្របខ័ណ្ឌ Premier League បន្ទាប់ពីចាញ់ទាំងអស់ពីការប្រកួត ៣ លើកដំបូង ដោយក្នុងនោះត្រូវគេស៊ុតបញ្ចូលទីដល់ទៅ ៩ គ្រាប់ និងមិនអាចទម្លុះសំណាញ់ទីក្រុមគូប្រជែងបានសូម្បី ១ គ្រាប់៕ AFP/VN
