.jpg)
Griezmann ព្រមព្រៀងវិលទៅចូលរួមនឹងក្រុមAtletico វិញ។ AFP
ទីក្រុងម៉ាឌ្រីដ៖ ខ្សែប្រយុទ្ធសញ្ជាតិបារាំង Antoine Griezmann បានធ្វើការវិលត្រឡប់ដ៏គួរឱ្យភ្ញាក់ផ្អើលមួយ នៅថ្ងៃចុងក្រោយនៃទីផ្សារដោះដូរកីឡាករ ដោយការទៅចូលរួមជាមួយក្រុម Atletico Madrid ដែលមានរយៈពេលត្រឹមតែ ២ ឆ្នាំ ក្រោយពីបានចាកចេញមកលេងឱ្យក្រុមគូប្រជែង Barcelona។ នេះបើតាមការប្រកាសឱ្យដឹងពីក្លិបយក្សនៅអេស្ប៉ាញ កាលពីថ្ងៃពុធ។
កីឡាករ Griezmann វ័យ ៣០ ឆ្នាំ ដែលស៊ុតបញ្ចូលទីបាន ១៣៣ គ្រាប់ កាលពីនៅលេងជាមួយក្រុម Atletico នោះ គឺជាលើកទី១ ដែលរូបគេ បានវិលមកទ្រនំចាស់ក្នុងកិច្ចសន្យាខ្ចីជើង ១ ឆ្នាំ ជាមួយនឹងជម្រើសបន្តថែម ១ ឆ្នាំទៀត។ ក្រុមប្រចាំក្របខ័ណ្ឌ La Liga បានប្រាប់ឱ្យដឹង។
នៅលើវេបសាយផ្លូវការរបស់ខ្លួន ក្លិប Atletico បានសរសេរប្រយោគយ៉ាងខ្លីថា៖ «សូមធ្វើការស្វាគមន៍ក្នុងការត្រឡប់មកវិញ Griezmann!»។
ក្រុម Barca បាននិងកំពុងតស៊ូយ៉ាងខ្លាំងក្នុងការដោះស្រាយបញ្ហាហិរញ្ញវត្ថុ រហូតត្រូវព្រមដោះលែងឱ្យម្ចាស់ជយលាភីពាន Ballon d''Or ៦ សម័យ Lionel Messi ទៅចូលរួមជាមួយក្រុមនៅបារាំង Paris Saint-Germain កាលពីខែមុន ហើយ Griezmann ក៏ជាម្នាក់ក្នុងចំណោមកីឡាករមានប្រាក់ខែខ្ពស់បំផុតរបស់ក្លិបដែរ តាំងពីចុះហត្ថលេខាយកមកក្នុងឆ្នាំ ២០១៩ ជាមួយនឹងតម្លៃ ១២០ លានអឺរ៉ូ ($១៤១,៦ លាន)។
ក្លិបយក្សនៅតំបន់កាតាឡាន់បានអះអាងពីការចាកចេញនេះ ដោយឱ្យដឹងថា ក្លិប Atletico នឹងក្លាយជាអ្នកចំណាយប្រាក់ខែឱ្យកីឡាកររូបនេះ ហើយបញ្ជាក់បន្ថែមថា កិច្ចព្រមព្រៀងនេះ មានរួមបញ្ចូលទាំងការផ្ទេរជាអចិន្រ្តៃយ៍ផងដែរ នៅពេលកិច្ចសន្យាខ្ចីជើងត្រូវបានបញ្ចប់។
មិនមានក្លិបណាមួយបានបង្ហើបឱ្យដឹង ពីតម្លៃនៃកិច្ចសន្យានេះឡើយ តែមានសេចក្ដីរាយការណ៍ថា ស្ថិតក្នុងតម្លៃប្រមាណជា ៤០ លានអឺរ៉ូ ($៤៧,២ លាន)។ ក្នុងសេចក្ដីប្រកាសរបស់ខ្លួន ក្លិប Barca បានឱ្យដឹងថា៖ «ក្លិប FC Barcelona សូមអរគុណដល់កីឡាករ Antoine Griezmann សម្រាប់ការប្ដូរផ្ដាច់ និងការលះបង់របស់គេចំពោះក្លិប ហើយសូមជូនពរឱ្យគេជួបនូវភាពជោគជ័យនាពេលអនាគត»។
ការវិលមកកាន់ក្លិបចាស់របស់ខ្លួនវិញនេះ មានន័យថា កីឡាករ Griezmann ក៏បានរួមលេងជាថ្មីម្ដងទៀតដែរ ជាមួយអតីតមិត្តរួមក្រុម គឺខ្សែប្រយុទ្ធអន្តរជាតិអ៊ុយរូហ្គាយ Luis Suarez ដែលចែកផ្លូវពីក្រុម Barca មករួមរស់ជាមួយ Atletico កាលពី ១២ ខែកន្លងទៅ។
ជាមួយគ្នានេះ ក៏មានសេចក្ដីរាយការណ៍ដែរថា ក្រុម Barca របស់លោក Ronald Koeman កំពុងរៀបចំស្នើទិញខ្សែប្រយុទ្ធសញ្ជាតិហូឡង់ Luuk de Jong របស់ក្រុមរួមលីគ Sevilla ដើម្បីយកមកជំនួស Griezmann។
ការចាកចេញរបស់ Griezmann គឺជារឿងនឹកស្មានមិនដល់ ព្រោះរូបគេបានចូលលេងរហូត ក្នុងចំណោមការប្រកួតទាំង ៣ លើកដំបូងរបស់ក្រុម Barca នៅរដូវកាលថ្មីនេះ ហើយនេះអាចចាត់ទុកថា ជាការផ្ទេរដ៏ធំមួយដែរ ប្រចាំរដូវក្ដៅនេះ បន្ទាប់ពី Messi ផ្លាស់ទៅក្រុម PSG និង Cristiano Ronaldo ចេញពី Juventus ត្រឡប់ទៅប្រកបអាជីពនឹងក្រុម Man United ម្ដងទៀត៕ AFP/VN
