.jpg)
Ronaldo (ឆ្វេង) របស់ព័រទុយហ្គាល់ លោតតែតបាល់ ដោយមានការទាញពី Egan (កណ្ដាល) របស់អៀរឡង់ អំឡុងការប្រកួត កាលពីថ្ងៃពុធ។ រូបថត AFP
ក្រុងហ្វារ៉ូ៖ ខ្សែប្រយុទ្ធ Cristiano Ronaldo បំបែកកំណត់ត្រាគ្រាប់បាល់ក្នុងក្រុមជម្រើសជាតិបានហើយ ជាមួយនឹងគ្រាប់ទី១១០ ហើយបន្ទាប់មកក៏ស៊ុតគ្រាប់ទី១១១ ក្នុងម៉ោងបន្ថែមមានរបួស ដើម្បីជួយឱ្យក្រុមព័រទុយហ្គាល់ឈ្នះក្រុមសា.អៀរឡង់ ២-១ ពីការប្រកួតវគ្គជម្រុះ World Cup ប្រចាំទ្វីបអឺរ៉ុប ដែលធ្វើឡើងក្នុងក្រុងហ្វារ៉ូ (Faro) កាលពីយប់ថ្ងៃពុធ។
កីឡាករ Ronaldo វ័យ ៣៦ ឆ្នាំ ដែលទើបវិលត្រឡប់ទៅកាន់ក្រុមបិសាចក្រហម Manchester United វិញ ក្រោយចាកចេញពីក្រុម Juventus នោះ ត្រូវបានអះអាងផ្លូវការកាលពីថ្ងៃអង្គារថា មានឱកាសជួយឱ្យក្រុមម្ចាស់ផ្ទះព័រទុយហ្គាល់នាំមុខដែរ នៅដើមវគ្គទី១ តែគួរឱ្យស្ដាយ ដែលគេស៊ុតបាល់ពិន័យ ១១ម៉ែត្រអត់ចូល។
ក្រុមភ្ញៀវអៀរឡង់ គឺជាអ្នកនាំមុខមុន ជាមួយនឹងគ្រាប់បាល់ ដែលបានមកពីការតែតរបស់ខ្សែការពារ John Egan នៅចុងម៉ោងនៃវគ្គទី១ តែការតែត ២ គ្រាប់របស់កីឡាករ Ronaldo នៅចុងម៉ោងនៃវគ្គទី២ ពោល គឺក្នុងនាទីទី៨៩ និង ៩០+៧ មិនត្រឹមតែជួយឱ្យក្រុមព័រទុយហ្គាល់ មានជ័យជម្នះប៉ុណ្ណោះទេ ប៉ុន្តែថែមនទាំងជួយឱ្យគេ បំបែកកំណត់ត្រាទៀតផង។
កីឡាករ Ronaldo ស៊ុតបញ្ចូលទីលើសកីឡាករ Ali Daei ដែលទម្លុះសំណាញ់ទីបាន ១០៩គ្រាប់ ក្នុវក្រុមជម្រើសជាតិ បន្ទាប់ពីរូបគេ អាចធ្វើបានស្មើនឹងចំនួនគ្រាប់បាល់សរុបរបស់អតីតកីឡាករឆ្នើមអ៊ីរ៉ង់រូបនោះ នៅឯព្រឹត្តិការណ៍ Euro 2020 ដែលក្រុមជម្រើសជាតិអ៊ីតាលីជាជើងឯក។
ក្រោយជួយឱ្យក្រុមឈ្នះ និងខ្លួនឯងបំបែកកំណត់ត្រាបាន កីឡាករ Ronaldo បាននិយាយប្រាប់ទូរទស្សន៍ Sky Sports ថា៖ «ខ្ញុំសប្បាយចិត្តណាស់ ដោយមិនត្រឹមព្រោះតែខ្ញុំបានបំបែកកំណត់ត្រាប៉ុណ្ណោះទេ តែថែមទាំងសម្រាប់ឱកាសពេលវេលាដ៏ពិសេស ដែលពួកយើងមានទៀតផង។ ខ្ញុំត្រូវតែសរសើរនូវអ្វី ដែលក្រុមបានធ្វើ ដោយពួកយើងមានការជឿជាក់រហូតដល់ទីបញ្ចប់។ ខ្ញុំរីករាយខ្លាំងណាស់»។
ក្រុមព័រទុយហ្គាល់ ឈរនៅលើគេ ក្នុងពូល ដោយមាន ១០ ពិន្ទុ ក្រោយបញ្ចប់ ៤ ហ្គេម ខណៈដែលក្រុមលេខ ២ ស៊ែប៊ី តាមពីក្រោយតែ ៣ ពិន្ទុ ជាមួយនឹងការលេងតិចជាង ១ លើក។
ក្រុមអៀរឡង់ នៅលើតែក្រុមបាតតារាង អាស៊ែបៃហ្សង់ ប៉ុណ្ណោះ ក្រោយចាញ់ទាំង ៣ការប្រកួត ក្នុងនោះរួមទាំងបរាជ័យដ៏គួរឱ្យអាម៉ាស់ ១-០ នៅផ្ទះខ្លួនឯង កាលពីខែមីនា ក្រោមថ្វីជើងរបស់ក្រុមលុចសំបួ ដែលទើបឈ្នះហ្គេមទី២ ក្នុងវគ្គជម្រុះWorld Cup នេះ ជាលើកដំបូង ក្នុងប្រវត្តិសាស្ត្រ ដោយការមានជ័យជម្នះលើក្រុមអាស៊ែបៃហ្សង់ ២-១។
ក្រុមលេខ ១ ក្នុងពូល នឹងបានសិទ្ធិស្វ័យប្រវត្តិ ក្នុងការធ្វើដំណើរទៅចូលរួមប្រកួតប្រជែង សម្រាប់ជុំចុងក្រោយនៃព្រឹត្តិការណ៍ World Cup 2022 នាប្រទេសកាតា រីឯក្រុមលេខ ២ ត្រូវធ្វើការប្រកួតវគ្គចាញ់ធ្លាក់(Play-off)៕ AFP/VN
