ក្រុងតូក្យូ៖ អត្តពលិកតេក្វាន់ដូ Zakia Khudadadi បានចូលរួមប្រកួតជាលើកដំបូង ក្នុងព្រឹត្តិការណ៍កីឡាប៉ារ៉ាឡាំពិក Tokyo Paralympic Games 2020 នៅក្រុងតូក្យូ នាថ្ងៃព្រហស្បតិ៍ ដោយបានក្លាយជាស្ត្រីជនជាតិអាហ្វហ្គានីស្ថានដំបូងគេ ដែលធ្វើបែបហ្នឹង គិតតាំងពីព្រឹត្តិការណ៍ Athens 2004 នៅប្រទេសក្រិក។
កីឡាការិនីវ័យ ២២ ឆ្នាំ និងមិត្តរួមជាតិរបស់នាង Hossain Rasouli បានមកដល់ក្រុងតូក្យូ ប្រទេសជប៉ុន កាលពីថ្ងៃសៅរ៍ ដោយឆ្លងកាត់តាមក្រុងប៉ារីស ប្រទេសបារាំង បន្ទាប់ពីកីឡាការិនី Khudadadi បានធ្វើការអំពាវនាវ តាមរយៈខ្សែវីដេអូមួយ ដើម្បីឱ្យមានការជួយជម្លៀសនាង ចេញពីក្រុងកាប៊ូល បន្ទាប់ពីក្រុមតាលីបង់ចូលមកកាន់អំណាច។
កាលពីថ្ងៃព្រហស្បតិ៍ អត្តពលិក Khudadadi បានដើរចូលទីលានប្រកួត នៅ Makuhari Messe ក្នុងក្រុងឈីបា (Chiba) ក្បែររាជធានីតូក្យូ ដោយមានពាក់មួកការពារ ដើម្បីធ្វើការប្រកួតបើកឆាកនៃការបង្ហាញខ្លួនលើកដំបូង ក្នុងប្រភេទកីឡាប្រយុទ្ធរបស់ជនជាតិកូរ៉េ នៅឯព្រឹត្តិការណ៍កីឡាប៉ារ៉ាឡាំពិក។ នាងបានក្លាយជាស្ត្រីអាហ្វហ្គានីស្ថាន ទី២ ដែលបានចូលរួមប្រកួតកីឡា សម្រាប់ជនពិការ ដែលចាប់ផ្ដើមមានឡើង តាំងពីឆ្នាំ១៩៦០ មក។
«ខ្ញុំរីករាយ ដែលនាង (Khudadadi) អាចមកដល់ប្រទេសជប៉ុន»។ នេះជាសម្ដីរបស់កីឡាការិនី Ziyodakhon Isakova ដែលត្រូវបានស្រង់ដោយទីភ្នាក់ងារព័ត៌មាន Kyodo News បន្ទាប់ពីអត្តពលិករបស់អ៊ូសបេគីស្ថានរូបនេះ មានជ័យជម្នះដោយពិន្ទុ ១៧-១២ លើកីឡាការិនី Khudadadi ពីការប្រកួតលើវិញ្ញាសាតេក្វាន់ដូ ក្នុងប្រភេទទម្ងន់ក្រោម ៤៩ គ.ក។
កីឡាការិនី Khudadadi មិនបានឆ្លើយឆ្លងជាមួយនឹងអ្នកយកព័ត៌មាននោះឡើយ។ ទាំងរូបនាង និងមិត្តរួមជាតិ Rasouli ដែលជាអត្តពលិកផ្នែកអត្តពលកម្ម បានសម្ដែងចេតនាយ៉ាងច្បាស់លាស់ ក្នុងការមិនផ្ដល់កិច្ចសម្ភាសន៍ដល់បណ្ដាញសារព័ត៌មាន។
មន្ត្រីរបស់គណៈកម្មាធិការប៉ារ៉ាឡាំពិកអន្តរជាតិ (IPC) បានឱ្យដឹងថា នឹងមិនមានអត្តពលិកអាហ្វហ្គានីស្ថានរូបណា និយាយទៅកាន់បណ្ដាញសារព័ត៌មាន ក្នុងក្រុងតូក្យូនេះឡើយ ដោយពាក់ព័ន្ធនឹងសុវត្ថិភាពរបស់អត្តពលិកជាចម្បង។
អ្នកនាំពាក្យរបស់ IPC លោក Craig Spence បានប្រាប់ឱ្យដឹង នៅថ្ងៃព្រហស្បតិ៍ថា៖ «យើងបានទុកឱ្យពួកគេត្រៀមខ្លួន ២-៣ ថ្ងៃកន្លងទៅនេះ ដោយគិតតែលើការប្រកួតប៉ុណ្ណោះ ព្រោះនេះជាក្ដីស្រមៃរបស់ពួកគេ ក្នុងការបានចូលរួមប្រកួត»។
«ឥឡូវនេះ យើងនឹងចាប់ផ្ដើមធ្វើការពិភាក្សាពីអ្វី នឹងកើតមាន ក្នុងកម្មវិធីបិទ ហើយពីទីកន្លែង ដែលពួកគេត្រូវទៅបន្ទាប់ពីនេះ»។ នេះជាការបន្ថែមរបស់លោក Spence៕ AFP/VN