.jpg)
ក្រុងញូវយ៉ក៖ កីឡាការិនីជើងឯកចាស់ Naomi Osaka បានឆ្លងទៅវគ្គបន្តក្នុងព្រឹត្តិការណ៍វាយកូនបាល់ (តិន្នីស) របស់កម្មវិធី US Open 2021 កាលពីថ្ងៃពុធ ដោយមិនបាច់ចេញញើសសូម្បី ១ តំណក់ ខណៈដែលកីឡាករ Daniil Medvedev ត្រូវទម្លាក់គូបដិបក្ខសិន ទើបបានឡើងទៅជុំបន្ទាប់។
កីឡាការិនីលំដាប់លេខ ៣ ពិភពលោកសញ្ជាតិជប៉ុន Osaka ដែលកំពុងប៉ុនប៉ងក្នុងការឈ្នះពាន Grand Slam ជាលើកទី៥ និងពាន US Open ជាលើកទី៣ ក្នុងរយៈពេល ៤ ឆ្នាំនោះ បានធ្វើដំណើរទៅវគ្គទី៣ ដោយស្វ័យប្រវត្តិ ព្រោះគូប្រកួតរបស់នាង កីឡាការិនីសញ្ជាតិស៊ែប៊ី Olga Danilovic សុំដកខ្លួន ដោយសារមានជំងឺ។
«ខ្ញុំមានអារម្មណ៍ថា មិនស្រួលក្នុងខ្លួនសោះ ២-៣ ថ្ងៃហ្នឹង ដោយត្រូវទ្រាំទ្រនឹងជំងឺ ដែលមិនពាក់ព័ន្ធនឹងកូវីដនោះឡើយ»។ នេះជាការសរសេររបស់ Danilovic វ័យ ២០ ឆ្នាំ ដែលបានផូស្តនៅលើបណ្ដាញសង្គម។
កីឡាការិនី Osaka ដែលនៅជុំបន្ទាប់ ត្រូវប្រឈមជាមួយកីឡាការិនីលេខ ៧៣ ពិភពលោករបស់កាណាដា Leylah Fernandez វ័យ ១៨ ឆ្នាំនោះ អាចនឹងក្លាយជាកីឡាការិនីទី១ ដែលឈ្នះពានក្នុង US Open នេះ បន្តបន្ទាប់គ្នា តាំងពីកីឡាការិនីអាមេរិក Serena Williams ដែលអវត្តមាននៅឆ្នាំនេះ ដោយសារមានរបួស ធ្វើបានជាប់ៗគ្នា ៣ ឆ្នាំ ចន្លោះឆ្នាំ ២០១២ ដល់ឆ្នាំ ២០១៤។
ជ័យជម្នះបន្តបន្ទាប់គ្នាពីការប្រកួតលំដាប់ Grand Slam របស់ Osaka នៅតែមានចំនួន ១៦ ដងដដែល ដោយការឈ្នះដោយគូប្រកួតដកខ្លួននេះ មិនរាប់បញ្ចូលឡើយ។
ចំណែកការប្រកួតផ្នែកបុរសវិញ កីឡាករលេខ ២ ពិភពលោក Medvedev របស់រុស្ស៊ី ដែលជាជើងឯករងក្នុងកម្មវិធី Australian Open នៅអូស្ត្រាលីឆ្នាំនេះ ក៏ឆ្លងផុតជុំទី២ នេះដែរ ក្រោយរូបគេបានយកឈ្នះលើកីឡាករអាល្លឺម៉ង់ Dominik Koepfer មិនជាលំបាកប៉ុន្មាន ជាមួយនឹងលទ្ធផល ៣-០ គឺ ៦-៤ ៦-១ និង ៦-២៕ AFP/VN
