ក្រុងគូឡាឡាំពួ៖ គណៈកម្មាធិការប៉ារ៉ាឡាំពិកអន្តរជាតិ (IPC) ពីថ្ងៃពុធ បាននិយាយការពារចំពោះការសម្រេចរបស់ខ្លួនក្នុងការដកសិទ្ធិអត្តពលិកចោលដុំដែករបស់ម៉ាឡេស៊ី ព្រោះមកបង្ហាញខ្លួនយឺត ហើយការសម្រេចនេះ ឈានទៅដល់ការដកមេដាយមាស ដែលបង្កឱ្យមានការខឹងសម្បាយ៉ាងខ្លាំងនៅប្រទេសកំណើតរបស់អត្តពលិក។
កីឡាករ Muhammad ZiyadZolkefli ត្រូវបានអនុញ្ញាតឱ្យចូលប្រកួតចោលដុំដែកវគ្គចុងក្រោយ ដែលធ្វើឡើងនៅក្រុងតូក្យូ កាលពីថ្ងៃអង្គារ ទោះបីជាមកយឺត ហើយបានបន្តរហូតដល់ឈ្នះមេដាយមាស និងបំបែកកំណត់ត្រាពិភពលោក។ តែក្រោយមក អត្តពលិកវ័យ ៣១ ឆ្នាំរូបនេះ ត្រូវបានដកសិទ្ធិ រួមជាមួយអត្តពលិក ២ រូបផ្សេងទៀត ដោយមន្ត្រីទទួលខុសត្រូវការប្រកួតអះអាងបញ្ជាក់ថា អត្តពលិកទាំងនោះ មិនមានហេតុផលគ្រប់គ្រាន់ក្នុងការមកយឺតរបស់ពួកគេ។
មេដាយមាសនោះ ត្រូវប្រគល់ឱ្យអត្តពលិក Maksym Koval របស់អ៊ុយក្រែន ហើយអ្នកនាំពាក្យរបស់ IPC លោក Craig Spence បានឱ្យដឹងថា អាជ្ញាកណ្ដាលបានអះអាងថា មិនមានហេតុផលសមរម្យសម្រាប់ការមកយឺតរបស់ Ziyad ហើយក្រោយមកការប្ដឹងតវ៉ាត្រូវបានច្រានចោល។ តែលោក Spence ប្រាប់ថា ពេលនេះ អត្តពលិកអ៊ុយក្រែនកំពុងទទួលរងនូវការប្រើពាក្យប្រមាថយ៉ាងច្រើនពីសំណាក់ប្រជាជនម៉ាឡេស៊ី។
លោក Spence បានថ្លែងថា៖ «មនុស្សជាច្រើននិយាយថា អត្តពលិកអ៊ុយក្រែនបានលួចមេដាយមាសនោះ។ ទេ! ប្រាកដណាស់ មិនមែនបែបហ្នឹងនោះឡើយ។ កីឡាករអ៊ុយក្រែនមិនពាក់ព័ន្ធអ្វីទាំងអស់។ វាជាបញ្ហា ដែលអត្តពលិកមកយឺត»។
«មានការបញ្ចេញអារម្មណ៍បែបកំហឹងយ៉ាងច្រើនពីប្រជាជនម៉ាឡេស៊ី នៅលើបណ្ដាញសង្គម ហើយបានប្រើពាក្យពេចន៍មើលងាយយ៉ាងច្រើន។ សម្រាប់ការយល់ឃើញរបស់ខ្ញុំ ជារឿងឥតប្រយោជន៍»។ លោក Spence បានបន្ថែម។
អ្នកនាំពាក្យរូបនេះ បានឱ្យដឹងថា អត្តពលិកមកយឺតបានធ្វើការតវ៉ាថា ពួកគេមិនបានឮការប្រកាសឱ្យមករួមគ្នា ឬថា ដោយសារពួកគេស្ដាប់ភាសាមិនបាន តែពួកគេបានកត់សម្គាល់ថា អត្តពលិកដទៃអាចទៅដល់ទីនោះបានទាន់ពេល។
តែនៅលើបណ្ដាញសង្គម អ្នករិះគន់បានបង្ហាញសញ្ញាមិនទទួលយកនូវការដកសិទ្ធិរបស់កីឡាករ Ziyad ដែលបានឈ្នះមេដាយមាស នៅ Rio Paralympics 2016 នាប្រទេសប្រស៊ីល ដោយរដ្ឋមន្ត្រីក្រសួងវិទ្យាសាស្ត្ររបស់ប្រទេសម៉ាឡេស៊ី លោក Khairy Jamaluddin បានថ្កោលទោស ចំពោះការសម្រេចនោះថា ជារឿងគួរឱ្យអៀនខ្មាស»។
លោក Jamaluddin បានសរសេរនៅលើបណ្ដាញសង្គម Twitter ថា៖ «ជារឿងគួរឱ្យអាម៉ាស់ទាំងស្រុង ដែលធ្វើផ្ទុយនឹងស្មារតីរបស់កីឡាប៉ារ៉ាឡាំពិក។ មេដាយមាស និងកំណត់ត្រាពិភពលោកត្រូវបានលួច»។
ជាមួយគ្នានេះ ព្រះមហាក្សត្ររបស់ប្រទេសម៉ាឡេស៊ី ក៏បានជំរុញឱ្យអាជ្ញាធរពាក់ព័ន្ធធ្វើការសិក្សាពីហេតុផលនៃការដកសិទ្ធិនេះ ដើម្បីកុំឱ្យវាមានរឿងបែបនេះ កើតឡើង ពេលអនាគតទៀត។
ចំណែក Ziyad បានត្រឹមផូស្តសារខ្លីៗ នៅលើបណ្ដាញសង្គម Instagram ដោយបានធ្វើការសុំទោស ចំពោះហេតុការណ៍នេះ និងអរគុណដល់ការគាំទ្រពីប្រជាជនម៉ាឡេស៊ី៕ AFP/VN