.jpg)
ក្រុមជម្រើសជាតិកង់គួកកម្ពុជា ក្នុងអំឡុងពេលហ្វឹកហាត់ នៅប្រទេសបារាំង តែពេលនេះពួកគេបានបញ្ចប់គម្រោងទី១នេះហើយ។ រូបថត សហការី
ភ្នំពេញ៖ ក្រុមអត្តពលិកជម្រើសជាតិកង់គួកកម្ពុជា រួមមានកីឡាករ គឹម ចាន់ធូ, សាន ណាម៉ា, កីឡាករ សាន ណាម៉ាវ ក្រោមការដឹកនាំផ្ទាល់ ពីគ្រូបង្វឹកលោក ខ្លូត ករណី ដែលបានទៅហ្វឹកហាត់ នៅប្រទេសបារាំង តាមកម្មវិធីសហប្រតិបត្តិការរវាងសហព័ន្ធកីឡាទោចក្រយានកម្ពុជា ជាមួយសមាគមកីឡាកង់កម្ពុជា ឈ្មោះថា Cambodia Cycling Academy (CCA) នោះ បានបញ្ចប់បេសកកម្មរបស់ខ្លួនហើយ។
នៅក្នុងអំឡុងនៃការហ្វឹកហាត់រយៈពេល ៣ ខែ នៅប្រទេសបារាំង ដែលទទួលបានការរាប់រង លើការហូបចុក និងស្នាក់នៅ ក្រោមការជួយជ្រោមជ្រែងពីលោកស្រី ប៉ែន ស្រីមុំ នោះ ក្រុមកង់គួកកម្ពុជា ក៏បានចូលរួមក្នុងបណ្តាព្រឹត្តិការណ៍ធំៗចំនួន៤លើកផងដែរ ដើម្បីពង្រឹងសមត្ថភាព ត្រៀមការប្រកួតអន្តរជាតិនានា ពិសេសហ្គេម នាពេលខាងមុខនេះ ហើយក្រុមប្រតិភូកីឡាកម្ពុជាមួយនេះ នឹងត្រូវចេញដំណើរពីប្រទេសបារាំង នៅថ្ងៃចន្ទនេះ និងមកដល់កម្ពុជា នៅថ្ងៃអង្គារស្អែកនេះ។
លោកស្រី ប៉ែន ស្រីមុំ ប្រធានសមាគមកីឡាកង់កម្ពុជា (CCA) ប្រចាំនៅប្រទេសបារាំង បានប្រាប់ ភ្នំពេញ ប៉ុស្តិ៍ តាមប្រព័ន្ធតេឡេក្រាម កាលពីថ្ងៃអាទិត្យថា ក្រុមអត្តពលិកកម្ពុជា និងគ្រូបង្វឹក បានបញ្ចប់កម្មវិធីហ្វឹកហាត់ ទៅតាមគម្រោងហើយ ហើយពេលនេះពួកគាត់ កំពុងតែពិនិត្យសុខភាព ពិសេសតេស្តកូវីដ ១៩ សិន មុននឹងចេញដំណើរទៅមាតុប្រទេសវិញ នៅថ្ងៃចន្ទ ទី ៦ ខែ កញ្ញា ឆ្នាំ ២០២១។
លោកស្រីបន្ថែមថា៖ «ដោយបញ្ហាកូវីដ ១៩ វាយលុកខ្លាំង ខាងសមាគម Cambodia Cycling Academy រងផលប៉ះពាល់ជីវភាពខ្លាំងណាស់ គឺរកប្រាក់ផ្គត់ផ្គង់ឱ្យកីឡាករកម្ពុជាទាំងលំបាកលំបិនបំផុត។ ទោះយ៉ាងណា យើងនៅតែបានបញ្ជូនអត្តពលិកយើងចូលរួមប្រកួតបានចំនួន ៤ ព្រឹត្តិការណ៍ធំៗ ដើម្បីពង្រឹងកម្លាំង និងបច្ចេកទេសជែង បច្ចេកទេសបត់ និងបច្វេទេសបន្ថែមល្បឿនផងដែរ»។
ក្រុមកីឡាករជម្រើសជាតិកង់គួកកម្ពុជា និងគ្រូបង្វឹក ពេលថតជាមួយលោកស្រី ប៉ែន ស្រីមុំ នៅលើទឹកដីប្រទេសបារាំង។ រូប សហការី
«ជាមួយគ្នានេះ ខ្ញុំសូមអរគុណ ដល់សហព័ន្ធ គ្រូបង្វឹក នៅឯស្រុកខ្មែរ មេត្តាជួយគាំទ្របន្ត ព្រោះគម្រោងហ្វឹកហាត់លើកនេះ គឺមិនបានរលូន ដោយបញ្ហាកូវីដ ១៩ ខណៈក្រុមឧបត្ថម្ភកម្មវិធីប្រណាំងកង់ នៅប្រទេសបារាំង ជាប់គាំងសឹងតែទាំងអស់»។ លោកស្រី ប៉ែន ស្រីមុំ បានបញ្ជាក់។
ចំណែកលោក នូ ចំរើន អគ្គលេខាធិការសហព័ន្ធកីឡាទោចក្រយានកម្ពុជា បានប្រាប់ថា ខាង សហព័ន្ធ គាំទ្រនូវសកម្មភាពរបស់ Cambodia Cycling Academy ដែលបានប្រឹងប្រែងក្នុងសម័យកាលកូវីដនេះ ពិតជាលំបាកមែន ប៉ុន្តែយើងសហការគ្នាបានល្អ ហើយតាមរយៈការហ្វឹកហាត់ នៅប្រទេសបារាំងលើកនេះ អត្តពិករបស់យើង បានទៅចូលរួមប្រកួតចំនួន ៤ លើក ផ្សេងពីគ្នា ក្នុងនោះនៅប្រទេសបារាំង បាន ២ លើក នៅប្រទេសប៉ូឡូញ ១ លើក និងប្រទេសរ៉ូម៉ានី ១ លើក។
លោក នូ ចំរើន បានបន្តថា៖ «កីឡាករប្រណាំងកង់ជម្រើសជាតិកម្ពុជា ដែលមកពីប្រទេសបារាំងទាំងនេះ គឺពេលមកដល់កម្ពុជា គឺទាំងគ្រូបង្វឹក និងកីឡាករ យើងនឹងឱ្យពួកគាត់ ធ្វើចត្ដាឡីស័ក តាមគោលការណ៍របស់ក្រសួងសុខាភិបាលសិន ហើយបន្ទាប់មក យើងនឹងបញ្ជូនពួកគាត់ ឱ្យទៅប្រមូលផ្តុំហ្វឹកហាត់ នៅទីលានស្រុកបន្ទាយស្រី ខេត្តសៀមរាប ជាមួយក្រុមជម្រើសជាតិកង់ភ្នំ ដែលជាទីលានស្តង់ដារ ដើម្បីត្រៀមសម្រាប់ការប្រកួតអន្តរជាតិនានាខាងមុខ»។
ឆ្លងកាត់បទពិសោធហ្វឹកហាត់ និងការប្រកួតកន្លងមកនេះ លោក ខ្លូត ករណី គ្រូបង្វឹកក្រុមប្រណាំងកង់ជម្រើសជាតិកម្ពុជា ដែលចុះជាប់ជាមួយកីឡាករផ្ទាល់ បានអះអាងថា៖«កីឡាករយើង ហាត់បានជាង ៣ ខែនេះ គឺបានដកស្រង់បច្ចេកទេសបានល្អ ក្នុងនោះការប្រជែង ការបត់ តាមផ្លូវកោង និងរក្សាកម្លាំង ដើម្បីបន្ថែមល្បឿន គឺនៅប្រទេសបារាំងនេះ ល្អជាងហាត់នៅក្នុងស្រុកយើងឆ្ងាយណាស់ គឺកម្រិតបច្ចេកទេសល្អជាងមុន»៕
