.jpg)
Kimpembe (អាវស) របស់បារាំង និង Sikan របស់អ៊ុយក្រែន លោតតែតដណ្ដើមបាល់។ AFP
ក្រុងប៉ារីស៖ ក្រុមម្ចាស់ជើងឯកពាន World Cup (WC) បារាំងចាប់ផ្ដើមមានដំណើរទ្រេតទ្រោតជាថ្មីម្ដងទៀត ក្នុងយុទ្ធនាការទាត់វគ្គជម្រុះនៅតំបន់អឺរ៉ុប ដើម្បីដណ្ដើមសិទ្ធិទៅលេងជុំចុងក្រោយ ក្នុងឆ្នាំ ២០២២ នៅប្រទេសកាតា ក្រោយប្រកួតស្មើ ១-១ ជាមួយក្រុមម្ចាស់ផ្ទះអ៊ុយក្រែន ខណៈដែលខ្សែប្រយុទ្ធ Memphis Depay ជាកម្លាំងជំរុញដ៏សំខាន់ ក្នុងការជួយហូឡង់បំបាក់ម៉ុងតេណេហ្គ្រោ កាលពីថ្ងៃសៅរ៍។
នេះជាការប្រកួតស្មើ ៥ ដងជាប់ៗគ្នារបស់ក្រុមមាន់គកបារាំង ខណៈដែលខ្សែប្រយុទ្ធ Anthony Martial ស៊ុតបញ្ចូលទីគ្រាប់បាល់ឱ្យក្រុមជម្រើសជាតិជាលើកដំបូង ក្នុងរយៈពេល ៥ ឆ្នាំ ដើម្បីជួយឱ្យក្រុមរបស់លោក Didier Deschamps ដណ្ដើមបានពិន្ទុពីហ្គេមនៅក្រុងកៀវនេះ។
កីឡាករ Martial របស់ក្រុមបិសាចក្រហម Manchester United ដែលអវត្តមានក្នុងព្រឹត្តិការណ៍ Euro 2020 ដោយសារមានរបួស ទើបតែបានរកឃើញគ្រាប់បាល់ទី២ ពីការបង្ហាញខ្លួន ២៩ ដង ឱ្យក្រុមជម្រើសជាតិ ដើម្បីបដិសេធគ្រាប់បាល់នាំមុខរបស់ក្រុមអ៊ុយក្រែន ដែលស៊ុតដោយខ្សែបម្រើ Mykola Shaparenko នៅនាទីចុងក្រោយនៃវគ្គទី១។
ក្រុមបារាំង ដែលមានរហស្សនាមជាភាសាបារាំង «Les Bleus» (ពណ៌ខៀវ) នៅតែឈរទី១ ក្នុងពូល D ជាមួយនឹងការនាំមុខដាច់ ៤ ពិន្ទុ តែប្រកួតច្រើនជាង ២ ហ្គេម លើសក្រុមលេខ ២ ហ្វាំងឡង់ ដែលនឹងត្រូវជួបជាមួយពួកគេនៅក្រុងលីយ៉ុង នាថ្ងៃអង្គារនេះ។ ១ គ្រាប់របស់កីឡាករ Joel Pohjanpalo នៅវគ្គទី២ ជួយឱ្យក្រុមហ្វាំងឡង់ឈ្នះកាហ្សាក់ស្ថាន ១-០។
«ពួកយើងប្រហែលជាមិនមានស្ថានភាពប្រសើរជាងមុនពួកយើងធ្វើការប្រកួតនេះ តែវាក៏មិនជាអាក្រក់ពេកនោះឡើយ។ វាគ្រាន់តែជាការដណ្ដើមបាន ១ ពិន្ទុបន្ថែមទៀត ខណៈដែលជាក់ស្ដែង គោលដៅរបស់យើង គឺយក ៣ ពិន្ទុ»។ គ្រូបង្វឹករបស់ក្រុមបារាំង លោក Deschamps បានប្រាប់ទៅកាន់ប្រព័ន្ធផ្សព្វផ្សាយនៅបារាំង M6។
ដោយឡែក ក្រុមអ៊ុយក្រែនដែលនៅលេខ ៣ មកទល់ពេលនេះ មិនឈ្នះ ហើយក៏មិនចាញ់ដែរ ក្នុងចំណោមការប្រកួតទាំង ៥ ដង ពោលគឺស្មើទាំងអស់ ដោយក្នុងនោះរួមទាំងការស្មើ ២ លើកទល់នឹងក្រុមបារាំងដែរ។
ចំណែកឯកីឡាករ Depay មានភាពលេចធ្លោយ៉ាងខ្លាំងក្នុងការប្រកួតជម្រុះ WC នៅឯក្រុង Eindhoven ដែលក្រុមហូឡង់ បំបាក់ក្រុមម៉ុងតេណេហ្គ្រោ ៤-០ ដើម្បីជួយឱ្យក្រុមរបស់លោក Louis van Gaal តាមកាន់តែកៀកនឹងក្រុមលេខ ១ ក្នុងពូល G គឺតួកគី ដែលឈ្នះហ្ស៊ីប្រាល់តា ៣-០ ដែរ។
កីឡាករឆ្នើម Depay របស់ក្រុមអ្នកមានបុណ្យ Barcelona ស៊ុតគ្រាប់បាល់បើកឆាក (ប៉េណាល់ទី) នៅនាទីទី៣៨ ហើយបន្ទាប់មកថែមគ្រាប់ទី២ នៅនាទីទី៦២។ កីឡាករប្រធានក្រុម Georginio Wijnaldum ជាអ្នកបន្ថែមគ្រាប់ទី៣ នៅនាទីទី៧០ ហើយខ្សែប្រយុទ្ធ Cody Gakpo ស៊ុតគ្រាប់ទី៤ ដែលជាគ្រាប់ដំបូងរបស់ខ្លួន សម្រាប់ក្រុមជម្រើសជាតិ នៅនាទីទី៧៦។
«នៅពេលដែលមានគ្រាប់បាល់ទី១ យើងក៏ចាប់ផ្ដើមលេងដោយមានភាពធូរស្រាលជាងមុន ហើយបង្កើតបាននូវការប្រកួតបាល់ទាត់ដ៏ល្អណាស់។ កីឡាករ Memphis (Depay) ធ្វើឱ្យមាននូវហ្គេមដ៏ពិសេសមិនធម្មតាមួយ ហើយមិនបាច់សង្ស័យនោះឡើយ គេគឺជាអ្នកលេងដ៏ល្អបំផុតប្រចាំការប្រកួតនេះ»។ នេះជាប្រសាសន៍របស់លោក Van Gaal ដែលត្រឡប់មកដឹកនាំក្រុមពណ៌ទឹកក្រូចហូឡង់ជាលើកទី៣៕ AFP/VN
