ក្រុងញូវយ៉ក៖ កីឡាករ Novak Djokovic បានធ្វើដំណើរចូលទៅក្នុងរង្វង់នៃការប្រកួត ៤ លើកទៀតប៉ុណ្ណោះ ដើម្បីអាចបញ្ចប់ទាំងស្រុងនូវកាលវិភាគនៃការប្រកួតវាយកូនបាល់ (តិន្នីស) ដណ្ដើមពានលំដាប់ Grand Slam ផ្នែកបុរសដំបូងគេ ក្នុងរយៈពេល ៥២ ឆ្នាំ ខណៈដែលកីឡាការិនីលំដាប់កំពូល Ashleigh Barty បានធ្លាក់ពីកម្មវិធី US Open 2021 ហើយ កាលពីថ្ងៃសៅរ៍ ដោយសារបានភ្លាត់ចាញ់កីឡាការិនីអាមេរិក Shelby Rogers។
កីឡាករចំណាត់ថ្នាក់លេខ ១ ពិភពលោក Djokovic បានផ្ដួលកីឡាករ Kei Nishikori ដោយការយកឈ្នះជាមួយនឹងលទ្ធផល ៦-៧ ៦-៣ ៦-៣ និង ៦-២ ដែលនេះជាជ័យជម្នះ ១៧ ដងបន្តបន្ទាប់គ្នារបស់ខ្លួនលើស៊ុបភើស្តាររបស់ជប៉ុន ហើយធ្វើបានល្អជាង ១៨-២ ក្នុងការប៉ះគ្នាជារួមជាមួយគូបដិបក្ខនេះ។
«ខ្ញុំពេញចិត្តជាមួយនឹងការផ្ដោតអារម្មណ៍។ ប្រហែលជាចំណុចខ្លះ ខ្ញុំធ្វើមិនបានល្អបំផុតនោះទេ តែខ្ញុំបានប្ដេជ្ញាចិត្ត និងធ្វើការផ្ដោតអារម្មណ៍ ហើយទាំងអស់នោះ បង្កើតបានភាពខុសប្លែកពិតមែន»។ កីឡាករ Djokovic បានប្រាប់ឱ្យដឹង។
ជាមួយការអាចគ្រងជើងឯកក្នុងកម្មវិធី US Open នៅអាមេរិកនេះ ជាលើកទី៤ នោះនឹងនាំឱ្យកីឡាករសញ្ជាតិស៊ែប៊ី Djokovic ធ្វើបានជោគជ័យដំបូងគេ ក្នុងការប្រមូលបានទាំងអស់ពីការប្រកួតដណ្ដើមពានពីព្រឹត្តិការណ៍ធំៗទាំង ៤ ក្នុងឆ្នាំតែ ១ ផ្នែកបុរស គិតតាំងពីកីឡាករអូស្ត្រាលី Rod Laver ធ្វើបាន កាលពីឆ្នាំ ១៩៦៩។
ជាមួយគ្នានេះ Djokovic វ័យ ៣៤ ឆ្នាំ កំពុងធ្វើដំណើរទៅរកការឈ្នះពានអាជីពលំដាប់ Grand Slam ជាលើកទី២១ ដោយការធ្វើបែបនេះបាន នោះនឹងបំបែកកំណត់ត្រាផ្នែកបុរស ដែលគេគ្រប់គ្រងរួមជាមួយកីឡាករអេស្ប៉ាញ Rafael Nadal និងកីឡាករស្វ៊ីស Roger Federer ដែលទាំង ២ នាក់ អវត្តមានដូចគ្នា ដោយសារមានរបួស។
នៅជុំទី៤ កីឡាករ Djokovic ត្រូវប្រឈមនឹងកីឡាករចំណាត់ថ្នាក់លេខ ៩៩ ពិភពលោកសញ្ជាតិអាមេរិក Jenson Brooksby វ័យ ២០ ឆ្នាំ ដែលបានសិទ្ធិមកចូលរួមក្នុងកម្មវិធីប្រកួតនេះ ដោយមិនចាំបាច់ឆ្លងកាត់ការប្រកួតវគ្គជម្រុះ។
ចំណែកឯផ្នែកនារីវិញ កីឡាការិនីលេខ ១ ពិភពលោកសញ្ជាតិអូស្ត្រាលី Barty វ័យ ២៥ ឆ្នាំ ដែលជាម្ចាស់ជើងឯកពានកម្មវិធី Wimbledon នៅអង់គ្លេស ត្រូវបានបញ្ចប់ដំណើរត្រឹមជុំទី៣ នេះ ក្រោយចាញ់កីឡាការិនី Rogers ២-១សិត គឺ ៦-២ ១-៦ និង ៧-៦។
«ខ្ញុំមិនចង់ធ្លាក់នោះទេ។ ខ្ញុំគ្រាន់តែនិយាយជាមួយខ្លួនឯងថា ត្រូវត្រៀមទទួលកូនបាល់ព្យាយាមឱ្យនៅក្នុងការប្រកួតមិនអាចលេងអន់ជាងនេះទៀតទេ អ្នកបានចាញ់នាងគ្រប់ពេល»។ នេះជាសម្ដីរបស់កីឡាការិនី Rogers វ័យ ២៨ ឆ្នាំ ដែលបាននិយាយ ក្រោយការប្រកួតចប់។
កីឡាការិនី Rogers នៅជុំបន្ទាប់ នឹងត្រូវតទល់ជាមួយកីឡាការិនីចក្រភពអង់គ្លេស Emma Raducanu វ័យ ១៨ ឆ្នាំ បន្ទាប់ពីកីឡាការិនីចំណាត់ថ្នាក់ទី១៥០ ពិភពលោករូបនេះ បានទម្លាក់គូប្រកួតសញ្ជាតិអេស្ប៉ាញ Sara Sorribes Tormo ដោយការយកឈ្នះស្រួលៗ ២ សិតទល់នឹង ០ គឺ ៦-០ និង ៦-១ ក្នុងរយៈពេល ៧០ នាទី៕ AFP/VN