ក្រុងហ្សាហ្គ្រេប៖ ខ្សែប្រយុទ្ធរបស់ក្រុមក្រូអាស៊ី កីឡាករ Mario Mandzukic ដែលជាអ្នកស៊ុតបញ្ចូលទីគ្រាប់បាល់ជ័យជម្នះលើក្រុមអង់គ្លេស អំឡុងការប្រកួតវគ្គ ៤ ក្រុមចុងក្រោយក្នុងព្រឹត្តិការណ៍ World Cup 2018 បានសម្រេចចិត្តចូលនិវត្តន៍ពីការប្រកបអាជីពជាកីឡាករបាល់ទាត់ហើយ ដោយមានរយៈពេល ៣ ឆ្នាំ ពីហ្គេមចុងក្រោយ ដែលរូបគេបានលេងឱ្យក្រុមជម្រើសជាតិ។
កីឡាករ Mandzukic វ័យ ៣៥ ឆ្នាំ បានប្រកាសពីការសម្រេចចិត្តនេះ តាមរយៈការផូស្តនៅលើបណ្ដាញសង្គម Instagram ដែលរួមមានទាំងរូបថតស្បែកជើងទាំងគូរបស់គេ តាំងពីយប់ថ្ងៃសុក្រម្ល៉េះ។
«នៅពេលអ្នកពាក់ស្បែកជើង ១ គូនេះ ជាលើកដំបូង អ្នកមិនអាចធ្វើការស្រមើស្រមៃបានទេថា អ្វីដែលអ្នកនឹងត្រូវឆ្លងកាត់ក្នុងវិស័យបាល់ទាត់។ អ្នកនឹងទទួលស្គាល់នូវពេលវេលាក្នុងការចូលនិវត្តន៍ក្នុងការដាក់ស្បែកជើង ១ គូនេះ ចូលទៅក្នុងទូហើយអ្នកនឹងមិនមានការស្ដាយក្រោយអ្វីឡើយ»។ នេះជាការសរសេររបស់ Mandzukic។
Mandzukic បានបង្ហាញខ្លួនជាមួយក្រុមក្រូអាស៊ី ៨៩ ដង ក្នុងនោះស៊ុតបញ្ចូលទីបាន ៣៣ គ្រាប់។ រូបគេប្រកបអាជីពផងដែរជាមួយក្រុម Bayern Munich, Atletico Madrid និង Juventus ហើយបានចូលលេង ១១ ហ្គេម ឱ្យក្រុម AC Milan នៅឆ្នាំនេះ។ ជាមួយនឹងការញាំញី ដោយរបួស រូបគេភាគច្រើនត្រូវអង្គុយជាកីឡាករបម្រុង និងមិនអាចរកគ្រាប់បាល់បានឡើយ។
សមិទ្ធផលធំៗ ដែលគេធ្លាប់មានចំណែករួម គឺឈ្នះពានលីគកំពូលរបស់ក្រូអាស៊ីជាមួយក្រុម Dinamo Zagreb ៣ ដង លើកពានក្របខ័ណ្ឌ Bundesliga ២ ដង និង Champions League ម្ដងជាមួយក្រុម Bayern នៅអាល្លឺម៉ង់ និងឈ្នះពានក្របខ័ណ្ឌ Serie A អ៊ីតាលីជាមួយក្រុម Juve ៤ ដង។
ដោយមានកំណើតក្នុងក្រុង Slavonski Brod អតីតកីឡាករ Mandzukic ចាប់ផ្ដើមអាជីពដំបូង ក្នុងឆ្នាំ ២០០៤ ជាមួយក្លិបនៅស្រុកកំណើត Marsonia។ កុងត្រាធំដំបូងរបស់គេ គឺជាមួយក្រុម Dinamo Zagreb ក្នុងឆ្នាំ ២០០៧។
ក្រោយមកទៀត រូបគេដើរប្រឡូកជាមួយក្លិបផ្សេងៗ ជាបន្ត-បន្ទាប់ មានដូចជា ក្រុម Wolfsburg (២០១០-២០១២), Bayern (២០១២-២០១៤), Atletico Madrid (២០១៤-២០១៥) និង Juve (២០១៥-២០១៩)៕ AFP/VN