ក្រុងសៅប៉ូឡូ៖ ការប្រកួតវគ្គជម្រុះ World Cup របស់ក្រុមប្រេស៊ីល ទល់នឹងក្រុមអាហ្សង់ទីន ត្រូវបានផ្អាកភ្លាមៗជាបណ្ដោះអាសន្ន កាលពីថ្ងៃអាទិត្យ បន្ទាប់ពីចាប់ផ្ដើមបានប៉ុន្មាននាទី ដោយសារមានការចម្រូងចម្រាស ជុំវិញនឹងនីតិវិធីការពារការឆ្លងជំងឺកូវីដ ១៩ បានផ្ទុះឡើង។
ក្នុងអំឡុងពេលមានទិដ្ឋភាពដ៏មិនគួរឱ្យជឿ នៅឯកីឡដ្ឋាន Neo Quimica Arena ក្នុងក្រុងសៅប៉ូឡូនេះ ការប្រកួតរវាងក្រុមយក្សទាំង ២ ប្រចាំតំបន់អាមេរិកឡាទីន ត្រូវបានបញ្ឈប់ភ្លាម នៅពេលដែលមន្ត្រីសុខាភិបាលប្រេស៊ីល បានរត់ចូលទីលាន ដោយបង្កឱ្យមាននូវការប្រទាញប្រទង់គ្នា រវាងមន្រ្តី និងកីឡាកររបស់ក្រុមទាំង ២។
ការចូលមកកាត់ចង្វាក់នៃការលេងដ៏គួរឱ្យស្រឡាំងកាំងនេះ កើតឡើងតែប៉ុន្មានម៉ោង ក្រោយពីអាជ្ញាធរសុខាភិបាលក្នុងប្រទេសប្រេស៊ីល បានឱ្យដឹងថា កីឡាករប្រកបអាជីពនៅអង់គ្លេស ៤ រូប ក្នុងក្រុមជម្រើសជាតិអាហ្សង់ទីន គួរតែត្រូវធ្វើចត្តាឡីស័កជាបន្ទាន់ ដោយសារបានរំលោភលើនីតិវិធីទប់ស្កាត់ជំងឺកូវីដ ១៩។
យោងតាមភ្នាក់ងារត្រួតពិនិត្យសុខភាពជាតិ (ANVISA) របស់ប្រេស៊ីល កីឡាករលេងនៅក្របខ័ណ្ឌ Premier League អង់គ្លេស គឺ Giovani Lo Celso (Tottenham), Emiliano Martinez (Aston Villa), Emiliano Buendia (Aston Villa) និង Cristian Romero (Tottenham) បានផ្ដល់នូវព័ត៌មានក្លែងក្លាយ ពេលចូលមកប្រទេសប្រេស៊ីល។
កីឡាករ Romero, Lo Celso និង Martinez សុទ្ធតែបានចូលលេងក្នុងជម្រើសដំបូងក្នុងហ្គេម កាលពីថ្ងៃអាទិត្យ ទើបនាំឱ្យមានការចូលមករំខានខុសប្រក្រតីនេះ ពីសំណាក់មន្ត្រី ANVISA។
កីឡាករទាំង ៤ រូប ត្រូវចោទប្រកាន់ពីការមិនបានបង្ហាញថា ពួកគេបានចំណាយពេល ១៤ ថ្ងៃ នៅអង់គ្លេស មុនការធ្វើដំណើរមកប្រទេសប្រេស៊ីល ជាកន្លែងដែលជំងឺកូវីដ ១៩ បានឆក់យកជីវិតមនុស្សជាង ៥៨០ ០០០ នាក់។
ប្រធានក្រុមអាហ្សង់ទីន Lionel Messi និងមិត្តរួមក្រុមរបស់គេបាននាំគ្នាដើរចេញពីទីលាន ខណៈដែលភាពងឿងឆ្ងល់បានគ្របដណ្ដប់លើជោគវាសនារបស់ហ្គេម។ កីឡាករ Messi ក្រោយមកបានរិះគន់យ៉ាងខ្លាំងចំពោះអន្តរាគមន៍របស់មន្ត្រីប្រេស៊ីល។
«ពួកយើងបានមកដល់ទីនេះ រយៈពេល ៣ ថ្ងៃ ហេតុអ្វីបានជាអ្នកទើបធ្វើរឿងហ្នឹង នៅពេលនេះ?»។ នេះជាការលើកឡើងពីកីឡាករ Messi តាមរយៈប្រព័ន្ធផ្សព្វផ្សាយ TyC នៅអាហ្សង់ទីន។
គ្រូបង្វឹករបស់ក្រុមអាហ្សង់ទីន លោក Lionel Scaloni ក៏បានបង្ហាញនូវការមិនពេញចិត្តស្រដៀងគ្នាដែរ ដោយបានប្រាប់ទៅបណ្ដាញសារព័ត៌មានថា៖ «ពួកយើងមិនត្រូវបានប្រាប់ថា ពួកគេ (កីឡាករទាំង ៤ រូប) មិនអាចចូលលេងបាននោះឡើយ»។
ជាមួយគ្នានេះដែរ ប្រធានសហព័ន្ធបាល់ទាត់អាហ្សង់ទីន លោក Claudio Tapia បានថ្លែងថា សហព័ន្ធអនុវត្តតាមវិធានការរបស់សហព័ន្ធបាល់ទាត់អន្តរជាតិទាំងអស់ ដោយបដិសេធចំពោះការអះអាងដែលថា កីឡាករបានធ្វើឯកសារក្លែងក្លាយ ដើម្បីចូលប្រទេសប្រេស៊ីល។
ប្រធាន ANVISA លោក Antonio Barra Torres បានថ្លែងប្រាប់ស្ថានីយទូរទស្សន៍នៅប្រេស៊ីលថា៖ «យើងឈានដល់ចំណុចនេះ ព្រោះអ្វីៗ ដែល ANVISA ណែនាំ តាំងពីដើមដំបូង មិនត្រូវបានបំពេញគ្រប់យ៉ាងឡើយ។ កីឡាករទាំង ៤ រូប ត្រូវបានប្រាប់ឱ្យនៅដាច់ដោយឡែក ខណៈពេលដែលរង់ចាំការនាំខ្លួនចេញ តែពួកគេមិនអនុវត្តតាម។ ពួកគេនៅតែបានធ្វើដំណើរទៅកាន់កីឡដ្ឋាន ហើយពួកគេដើរចូលទីលានទៀត»។ AFP/VN