ក្រុងស្ទូតហ្គាត៖ កីឡាករ Serge Gnabry ស៊ុតបញ្ចូលទី ២ គ្រាប់ ខណៈដែលក្រុមអាល្លឺម៉ង់ បំបាក់អាមេនីយ៉ាងចាស់ដៃ ៦-០ អំឡុងការប្រកួតនាក្រុងស្ទូតហ្គាត កាលពីថ្ងៃអាទិត្យ ហើយបានឡើងទៅឈរលេខ ១ ក្នុងពូល ជំនួសក្រុមភ្ញៀវ សម្រាប់យុទ្ធនាការទាត់ជម្រុះ World Cup ប្រចាំតំបន់អឺរ៉ុប។
ខ្សែបម្រើប្រយុទ្ធ Gnabry បានបង្ហាញកាយវិការអបអរដ៏គួរឱ្យរំភើបជាមួយការធ្វើបានសម្រេចគា្រប់បាល់បើកឆាក ២ គ្រាប់ មុននឹងកីឡាករ Marco Reus និង Timo Werner បន្ថែមពីក្រោយម្នាក់ ១ គ្រាប់ ឱ្យក្រុមម្ចាស់ផ្ទះអាល្លឺម៉ង់នាំមុខ ៤-០ នៅវគ្គទី១។
ចូលដល់វគ្គទី២ ខ្សែការពារស្លាប Jonas Hofmann បំប៉ោងសំណាញ់ទីគ្រាប់ទី ៥ ហើយបន្ទាប់មកកីឡាករបម្រុង Karim Adeyemi វ័យ ១៩ ឆ្នាំ មានឱកាសស៊ុតបញ្ចូលទី នៅថ្ងៃបង្ហាញខ្លួនដំបូងឱ្យក្រុមជម្រើសជាតិ ដើម្បីឱ្យក្រុមឥន្ទ្រីដែកមានជ័យជម្នះផ្លូវការ ៦-០ លើអាមេនី ហើយឡើងទៅឈរលេខ ១ ក្នុងពូល J ជាមួយនឹងការនាំមុខដាច់ ២ ពិន្ទុ។
«យើងបានធ្វើការនាំមុខយ៉ាងលឿន ក្រោយធ្វើការគាបសង្កត់។ យើងធ្វើបានយ៉ាងល្អនៅចំពោះមុខទី ហើយយើងគួរណាតែអាចស៊ុតបញ្ចូលទីបានច្រើនគ្រាប់ជាងនេះទៀត។ យើងនឹងយកក្ដីសោមនស្សនេះ តាមពួកយើង ដើម្បីទៅយកពិន្ទុពីក្រុមអ៊ីស្លង់ទៀត»។ កីឡាករ Gnabry បាននិយាយទៅកាន់ទូរទស្សន៍ RTL។
ក្រុមអាល្លឺម៉ង់ ដែលត្រូវធ្វើដំណើរទៅសួរសុខទុក្ខក្រុមជិតបាតពូលអ៊ីស្លង់ នៅថ្ងៃពុធនេះ អាចស្ដារមុខមាត់ពីបរាជ័យគួរឱ្យភ្ញាក់ផ្អើលនៅផ្ទះខ្លួនឯង ក្រោមថ្វីជើងរបស់ក្រុមម៉ាសេដ្វានខាងជើង កាលពីខែមីនា ដោយការអាចដណ្ដើមតំណែងប្រធានពូលមកវិញ។
ក្នុងការដឹកនាំការប្រកួតផ្លូវការជាលើកទី ២ របស់ខ្លួននេះ គ្រូបង្វឹករបស់ក្រុមអាល្លឺម៉ង់ លោក Hansi Flick ធ្វើការផ្លាស់ប្ដូរកីឡាករ ៦ នាក់ ពីក្រុមជម្រើសដំបូង ដែលឈ្នះក្រុមមិនសូវខ្លាំងលិចតិនស្តាញ ២-០ កាលពីថ្ងៃព្រហស្បតិ៍សប្ដាហ៍កន្លងទៅ ហើយឃើញថា ពិតជាមានកម្រិតនៃទម្រង់លេងខុសប្លែកទាំងស្រុង។
ខ្សែបម្រើរបស់ក្រុមអាល្លឺម៉ង់ Leon Goretzka និយាយខ្លីៗថា៖ «នេះពិតជាជាក់ស្ដែងណាស់ថា តើយើងអាចធ្វើការស្រមើស្រមៃយ៉ាងដូចម្ដេចចំពោះក្រុមរបស់យើង ក្រោមការដឹកនាំរបស់លោក Hansi (Flick) នេះ?»។
ដូច្នេះ ជារួមសម្រាប់ការប្រកួតវគ្គជម្រុះ ដើម្បីដណ្ដើមសិទ្ធិទៅលេងជុំចុងក្រោយ ក្នុងព្រឹត្តិការណ៍ World Cup 2022 នៅប្រទេសកាតា ឃើញថា ពូល J នេះ ក្រោយបញ្ចប់ការប្រកួត ៥ ដង ក្រុមអាល្លឺម៉ង់ ជាប្រធានពូល ដោយមាន ១២ ពិន្ទុ ខណៈក្រុមលេខ ២ អាមេនី មាន ១០ ពិន្ទុ ហើយក្រុមរូម៉ានី មាន ៩ ពិន្ទុ នៅលេខ ៣ ដោយនាំមុខក្រុមលេខ ៤ ម៉ាសេដ្វាន ១ ពិន្ទុ។ ចំណែកឯក្រុមបាតពូលទាំង ២ គឺអ៊ីស្លង់ មាន ៤ ពិន្ទុ និងក្រុមលិចតិនស្តាញ គ្មានសូម្បីតែ ១ ពិន្ទុ៕ AFP/VN