.jpg)
ក្រុងប៉ារីស៖ កីឡាករ Jorginho ស៊ុតបាល់ពិន័យ ១១ ម៉ែត្រ អត់ចូល ខណៈក្រុមជម្រើសជាតិអ៊ីតាលី បញ្ចប់ត្រឹមស្មើ ០-០ ជាមួយក្រុមស្វ៊ីស ក្នុងការប្រកួតជម្រុះ World Cup ប្រចាំតំបន់អឺរ៉ុប កាលពីថ្ងៃអាទិត្យ តែលទ្ធផលនេះមានន័យថា ក្រុមរបស់លោក Roberto Mancini តាមទាន់កំណត់ត្រាពិភពលោកសម្រាប់ការប្រកួតអន្តរជាតិ ដែលមិនចាញ់សោះបន្តបន្ទាប់គ្នា។
ក្រុមអ៊ីតាលី ពេលនេះមិនទាន់បរាជ័យនៅឡើយទេ ចំនួន ៣៦ ការប្រកួតបន្តបន្ទាប់គ្នា ដោយតាមស្មើនឹងស្ថិតិរបស់ក្រុមប្រេស៊ីល ក្នុងចន្លោះឆ្នាំ ១៩៩៣ និងឆ្នាំ ១៩៩៦។
លទ្ធផលអាចនឹងមានភាពវិជ្ជមានជាងនេះទៀត បើកីឡាករ Jorginho ស៊ុតបាល់ប៉េណាល់ទីអត់ប្លាតនៅនាទីទី៥២ តែគួរឱ្យស្ដាយ ដែលបាល់របស់ខ្សែបម្រើ ក្នុងក្រុមតោខៀវ Chelsea រូបនេះ មិនគេចផុតពីដៃរបស់អ្នកចាំទីរបស់ក្រុមស្វ៊ីស Yann Sommer បាន។
អ៊ីតាលីមានឱកាសជាច្រើន ក្នុងការដណ្ដើមជ័យជម្នះបាន តែចុងក្រោយបានត្រឹមស្មើ ដែល ១ ពិន្ទុនេះ នាំឱ្យពួកគេ នៅតែឈរទី១ ក្នុងពូល C ជាមួយនឹង ១១ ពិន្ទុ ក្រោយបញ្ចប់ ៥ ហ្គេម ពោលគឺនាំមុខ ៤ ពិន្ទុ លើក្រុមលេខ ២ ស្វ៊ីស ដែលប្រកួតតិចជាងក្រុម ២ លើក។
លោក Mancini បានប្រាប់ទូរទស្សន៍ RAI ថា៖ «បាល់មិនចូលក្នុងទីសោះ។ យើងមានឱកាសយ៉ាងច្រើនថ្ងៃនេះ តែអត់ឈ្នះការប្រកួត។ យើងត្រូវតែមានភាពមុតស្រួច និងច្បាស់លាស់ជាងនេះទៀត»។
ក្រុមរបស់លោក Mancini ធ្វើដំណើរមកប្រកួតនេះ ជាមួយខកចិត្តក្នុងលទ្ធផលស្មើ ១-១ ជាមួយប៊ុលហ្គារី កាលពីថ្ងៃព្រហស្បតិ៍ ដែលជាការប្រកួតដំបូងតាំងពីក្លាយជាជើងឯកតំបន់អឺរ៉ុប កាលពី ២ ខែមុន។
អ៊ីតាលីត្រូវប៉ះក្រុមបាតពូលលីទុយអានី នៅផ្ទះខ្លួននាថ្ងៃពុធ ខណៈដែលក្រុមស្វ៊ីស ធ្វើដំណើរទៅផ្ទះក្រុមលេខ ៤ អៀរឡង់ខាងជើង៕ AFP/VN
