ភ្នំពេញ៖ បងប្អូនរួមក្លិបត្រកូល «ខាំ» គឺ ខាំ ខ្លានាង និង ខាំ កូនខ្លា មិនអាចយកឈ្នះលើជើងខ្លាំង សែន រ៉ាដេត និង ធន់ អៀនឡៃ សម្រាប់ការប្រកួតលក្ខណៈម៉ាសហ្វៃ ១ ទឹក មាន ៩ នាទី ដើម្បីសម្រេចបំណង ចំពោះភាពខកចិត្តលើការចាញ់ទាំងមិនអស់ចិត្តកន្លងមកនោះទេ គឺការប្រកួតនេះ បានបញ្ចប់ដោយលទ្ធផលស្មើគ្នា ទាំង ២ គូ ទៅតាមច្បាប់កំណត់របស់ Mas Fight។
តែទោះជាលទ្ធផលស្មើគ្នាយ៉ាងនេះក្តី ក៏អ្នករៀបចំ និងផ្គូផ្គងកម្មវិធីប្រកួតប្រចាំនៅសង្វៀនប្រដាល់ថោនអះអាងថា ការប្រកួតសងសឹកទាំង ២ នេះ កាលពីថ្ងៃអាទិត្យនោះ ជាពិសេសការប្រកួតរបស់ ខាំ ខ្លានាង និង សែន រ៉ាដេត ជាការប្រកួតដ៏អស្ចារ្យ ដែលទទួលការគាំទ្រខ្លាំង និងមានអ្នកចូលទស្សនាតាមផេចហ្វេសប៊ុកកើនឡើង ២ ដង ពោលគឺល្អជាងគូដណ្តើមប្រាក់លានប្រចាំសប្តាហ៍ទៅទៀត។
តាមពិត ខាំ ខ្លានាង របស់ក្លិបស្វាយប៉ាក មិនធ្លាប់ឈ្នះ សែន រ៉ាដេត របស់ក្លិបនាយកដ្ឋានអង្គរក្សនោះទេ គឺជំនួប ៣ លើក កន្លងមកបានត្រឹមស្មើ ១ និងចាញ់ ២ ដង តែរូបគេនៅមិនទាន់អស់ចិត្ត ចំណែកការប្រកួតតាមលក្ខណៈប្រដាល់ម៉ាសហ្វៃនេះ លើកនេះ ខ្លានាង មានការជឿជាក់ពីដំបូងថា អាចនឹងយកឈ្នះ រ៉ាដេត ប៉ុន្តែនៅតែស្មើគ្នា តាមច្បាប់ម៉ាសហ្វៃ គឺគ្មានអ្នកសន្លប់ ឬសុំចុះចាញ់ ត្រូវកំណត់ស្មើគ្នា។
យ៉ាងណាក្ដី ខាំ ខ្លានាង សប្បាយចិត្តខ្លាំងពេលបានស្មើ ហើយអ្វីដែលអស្ចារ្យ គឺមានពេល ៩ នាទី បញ្ចេញសមត្ថភាព ទោះមិនអាចផ្តួល សែន រ៉ាដេត បាន និងចង់ជួបគ្នាម្តងទៀត។ ខ្លានាង បានបញ្ជាក់ថា៖ «ខ្ញុំនៅតែចង់ប្រកួតជាមួយ សែន រ៉ាដេត ទៀត នៅសង្វៀននេះ ដើម្បីសាងប្រវត្តិឈ្នះឱ្យបាន ហើយជាលើកទី១ ដែលខ្ញុំបានប្រកួតក្នុងម៉ាសហ្វៃ ដែលមានការគាំទ្រច្រើន និងបានប្រាក់តម្លៃខ្លួនខ្ពស់ជាងពេលមុនៗ»។
ចំណែក សែន រ៉ាដេត ក៏បានសរសើរពីភាពខ្លាំងរបស់ ខាំ ខ្លានាង ផងដែរ ហើយរូបគេរីករាយជានិច្ច បើមានការជួបគ្នា ជាលើកទី៤ ជាមួយ ខ្លានាង។ រ៉ាដេត បានបញ្ជាក់ថា៖ «ខាំ ខ្លានាង ពិតជាខ្លាំងមែន ខ្ញុំមិនអាចមើលរំលងគាត់បានទេ តែប្រសិនបើមានជំនួបលើកទី៥ ខ្ញុំនៅតែស្វាគមន៍ជានិច្ច»។
ដោយឡែក ការប្រកួតសងសឹករបស់ ខាំ កូនខ្លា ទៅលើ ធន់ អៀនឡេង ដើម្បីបញ្ចប់មន្ទិលពីភាពចម្រូងចម្រាសនៅពេលចៅក្រមសម្រេចឱ្យ អៀនឡេង ឈ្នះពិន្ទុ កូនខ្លា កាលប្រកួតដណ្តើមប្រាក់លាននោះ គឺបានទាក់ទាញនូវការចាប់អារម្មណ៍ពីមហាជនខ្លាំង សម្រាប់ការប្រកួតយ៉ាងស្វិតស្វាញ ៩ នាទីពេញ តែអ្នកទាំង ២ ត្រូវប្រកាសឱ្យស្មើគ្នា តាមច្បាប់ម៉ាសហ្វៃ ក្រោយគ្មានអ្នកសន្លប់ ដូចគូ ខាំ ខ្លានាង និង សែន រ៉ាដេត ដែរ។
លោក ជួប វុត្ថា អ្នកផ្គូផ្គង និងជាអ្នកសម្របសម្រួលកម្មវិធីនៅសង្វៀនថោនបាននិយាយថា៖ «សម្រាប់គូប្រកួតសងសឹកនេះ ប្រកួតគ្នាល្អដូចក្តីរំពឹងមែន គឺល្អជាងគូដណ្តើមប្រាក់លានប្រចាំសប្តាហ៍ទៅទៀត ហើយអ្វីដែលទទួលបានការកោតសរសើរ គឺមានអ្នកចូលមើល តាមផេចហ្វេសប៊ុករបស់ថោន ដែលកំពុងផ្សាយផ្ទាល់ក្នុងគូនេះ ចំនួន 9.3K ហើយពេលប្រកួតចប់ មានអ្នកចូលមើលដល់ទៅចំនួន 163K ឯណោះ គឺក្នុងចំណោមកម្មវិធីប្រដាល់កន្លងមក មិនធ្លាប់ទទួលបានអ្នកចូលមើលដល់ចំនួននេះទេ ហេតុនេះ គឺជាការប្រកួតដ៏អស្ចារ្យ និងពេញនិយម ដែលគាំទ្រពេញទំហឹងពីមហាជន និងខាងស្ប៉នស័រ»៕