ញូវយ៉ក៖ Novak Djokovic រាងលំបាកបន្តិច តែបានធ្វើដំណើរចូលទៅក្នុងរង្វង់នៃការប្រកួតតែ ៣ លើកទៀតប៉ុណ្ណោះ ដើម្បីអាចបញ្ចប់សព្វគ្រប់យ៉ាងជោគជ័យសម្រាប់កាលវិភាគនៃប្រកួតប្រជែងវាយកូនបាល់ (តិន្នីស) ដណ្ដើមពានលំដាប់ Grand Slam ប្រចាំឆ្នាំ ផ្នែកបុរសដំបូងគេ ក្នុងរយៈពេល ៥២ ឆ្នាំ បន្ទាប់ពីផ្ដួលកីឡាករអាមេរិក Jenson Brooksby ក្នុងការប្រកួតនៃកម្មវិធី US Open កាលពីថ្ងៃចន្ទ។
កីឡាករលំដាប់លេខ ១ ពិភពលោក Djokovic បានឆ្លងផុតកីឡាករលំដាប់លេខ ៩៩ ពិភពលោក Brooksby ជាមួយនឹងការភ្លាត់ចាញ់សិតដំបូង ក្នុងលទ្ធផលមិនគួរឱ្យជឿ ១-៦ តែអាចវាយបកយកឈ្នះ ៣ សិតជាប់គ្នាវិញ ដោយពិន្ទុ ៦-៣ ៦-២ និង ៦-២ ដើម្បីកក់កៅអីនៅវគ្គ ៨ នាក់ចុងក្រោយ ដោយឡើងទៅប៉ះកីឡាករលំដាប់លេខ ៧ ពិភពលោកសញ្ជាតិអ៊ីតាលី Matteo Berrettini ដែលគេទើបផ្ដួលក្នុងវគ្គផ្ដាច់ព្រ័ត្រនៃកម្មវិធី Wimbledon របស់អង់គ្លេស កាលពីខែកក្កដា។
ស៊ុបភើស្តារសញ្ជាតិស៊ែប៊ីវ័យ ៣៤ ឆ្នាំ នឹងក្លាយជាកីឡាករដំបូងគេ គិតតាំងអតីតកីឡាករអូស្ត្រាលី Rod Laver ក្នុងឆ្នាំ ១៩៦៩ ដែលមានលទ្ធភាពប្រមូលបានទាំងអស់នូវពានរង្វាន់ធំៗ ក្នុងឆ្នាំតែ ១ ដោយការអាចកា្លយជាជើងឯកកម្មវិធី US Open ជាលើកទី៤។
លើសពីនេះទៀត Djokovic ក៏ប្រឹងប្រែង ដើម្បីបានឈ្នះពានលំដាប់ Gand Slam ជាលើកទី២១ ផងដែរ ដែលវានឹងធ្វើឱ្យរូបគេលើស ១ ដង លើកីឡាករស្វ៊ីស Roger Federer និងកីឡាករអេស្ប៉ាញ Rafael Nadal ដែលអត្តពលិកឆ្នើមទាំង ២ អវត្តមានដូចគ្នា ក្នុងកម្មវិធីនេះ ដោយសាររបួស។
រឿងដ៏គួរឱ្យភ្ញាក់ផ្អើលរយៈពេលវែង ទំនងជាអាចនឹងកើតឡើងពេលកីឡាករ Brooksby វ័យ ២០ ឆ្នាំ ដែលមានសិទ្ធិមកចូលរួមព្រឹត្តិការណ៍នេះ ដោយមិនបាច់ឆ្លងកាត់វគ្គជម្រុះ និងដែលមិនធ្លាប់ជួប Djokovic ពីមុនមកធ្វើបានយ៉ាងល្អឥតខ្ចោះនៅសិតទី១ ដោយដណ្ដើមបានជ័យជម្នះជាមួយនឹងការប្រើពេល ២៩ នាទី។
«រូបគេ វាយបានឥតខ្ចោះ ក្នុងសិតទី១។ ខ្ញុំមិនអាចធ្វើអ្វីបានទាំងអស់។ ខ្ញុំនៅតែព្យាយាមរកឱ្យឃើញនូវទំនុកចិត្តរបស់ខ្ញុំនៅទីលាន។ ខ្ញុំត្រូវនិយាយថា វាមិនមែនជាការចាប់ផ្ដើមដ៏ល្អទេ។ Brooksby រៀបចំហ្គេមនេះបានយ៉ាងច្បាស់លាស់។ គេលេងបានល្អ ១ សិត កន្លះ»។ នេះជាសម្ដីរបស់ Djokovic។
កីឡាករ Djokovic បានបន្ថែមថា៖ «បន្ទាប់ពីនោះ ខ្ញុំចាប់ផ្ដើមវាយបានច្បាស់ជាង។ នៅពេលណាក៏ដោយដែលខ្ញុំត្រូវវាយសឺវីស ខ្ញុំបានរកឃើញទីតាំងបានយ៉ាងល្អ។ តែវាពាក់ព័ន្ធនឹងរាងកាយ ព្រោះរាងអស់កម្លាំងបន្តិច ដោយសារធ្វើការប្រកួតយូរពេក»៕ AFP/VN