ភ្នំពេញ៖ បន្ទប់ពីត្រឡប់មកពីសហរដ្ឋអាមេរិក ដើម្បីចូលរួមចំណែក ក្នុងវិស័យកីឡាប្រយុទ្ធនៅកម្ពុជា លោកព្រឹទ្ធាចារ្យ សេង ប៊ុនសុង បានឆ្លៀតឱកាសចុះសួរសុខទុកកីឡាករ និងបង្ហាញស្នៀត និងក្បាច់ប្រយុទ្ធគុនចម្រុះ ជូនដល់បណ្តាក្លិបធំៗ ដែលមានកីឡាករល្បីៗ ដោយក្នុងរយៈពេល ៣ ខែមកនេះ លោកបានចុះចែករំលែកក្បាច់គុនប្រយុទ្ធ ដល់ក្លិបចំនួន៤ហើយ ក្នុងនោះ នៅខេត្តចំនួន ២ និងរាជធានី ចំនួន ២ ក្លិប។
ការទៅជួយបង្ហាត់បង្ហាញស្នៀត និងក្បាច់ប្រយុទ្ធគុនចម្រុះ ជូនដល់បណ្តាក្លិបធំៗ នៅកម្ពុជានេះ ជាសកម្មភាពស្ម័គ្រចិត្ត ដែលលោក សេង ប៊ុនសុង អះអាងថា ជាកិច្ចការដែលលោកនិយមចូលចិត្ត និងស្រឡាញ់រាប់អាន ជាមួយកីឡាករ គ្រូបង្វឹក ដើម្បីផ្សារភ្ជាប់ទំនាក់ទំនង រួមសហការបង្វឹកនូវបច្ចេកទេសល្អៗ ថ្មីៗ ជូនដល់អត្តពលិករបស់កម្ពុជាយើង ក្នុងក្បាច់គុនកីឡាប្រយុទ្ធសម្រាប់អនាគត។
ជាមួយគ្នានេះ ដោយមានការសម្របសម្រួលពី លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា (NOCC) ព្រមទាំងក្រសួងអប់រំ យុវជន និងកីឡា គឺបានត្រៀមបង្កើតសមាគមកីឡាគុនចម្រុះកម្ពុជា ឱ្យក្លាយទៅជាសហព័ន្ធកីឡាគុនចម្រុះកម្ពុជា ក្នុងពេលឆាប់ៗ ដែលក្នុងនោះ នឹងផ្តល់ជូនលោកគ្រូ សេង ប៊ុនសុង ជានាយកបច្ចេកទេស និងជាអនុប្រធានសហព័ន្ធកីឡាគុនចម្រុះកម្ពុជាផងដែរ។
លោក វ៉ាត់ ចំរើន ក្នុងនាមប្រធានសមាគមកីឡាគុនចម្រុះកម្ពុជា ផងនោះ បានប្រាប់ថា៖«សហព័ន្ធកីឡាគុនចម្រុះកម្ពុជា (MMAA) នឹងបង្កើតឡើង ដោយយើងបានត្រៀមរួចរាល់ ដើម្បីធ្វើមហាសន្និបាតជាថ្មីឡើងវិញ ព្រោះកន្លងមក យើងមានត្រឹមសមាគមប៉ុណ្ណោះ ក្នុងនោះយើងបានដំណើរការសន្សឹមៗ ជាបន្តបន្ទាប់ តាមលទ្ធភាពទីផ្សារ ហើយឥឡូវយើងបានឯកភាពគ្នាថា នឹងប្រគល់ភារកិច្ចជូន លោកគ្រូ សេង ប៊ុនសុង ដឹកនាំគ្រប់គ្រងខាងបច្ចេកទេសបង្វឹក ដើម្បីធ្វើឱ្យសហព័ន្ធកីឡាមួយនេះ មានប្រជាប្រិយ កាន់តែខ្លាំង ឈានចូលទៅក្នុងកម្រិតអាជីព»។
លោកបានបន្ថែមថា ក្នុងផែនការសម្រាប់កីឡាប្រយុទ្ធមួយនេះ បានត្រៀមទីតាំងហ្វឹកហាត់ ទីលានប្រកួតលើដី ដែលមានទំហំជិត ២ ហិតា នៅឯជាយខាងជើងរាជធានីភ្នំពេញ គឺនៅជិតខាងទំនប់កប់ស្រូវ។ តាមការរៀបចំ គឺក្នុងមួយឆ្នាំ មានការប្រកួតកម្រិតពិភពលោកម្តង និងប្រកួតលក្ខណៈអាជីពកម្រិតអាស៊ី អាស៊ាន ឬថ្នាក់ជាតិ ជាបន្តបន្ទាប់ ទៅតាមជាក់ស្តែង។
«ប៉ុន្តែឥឡូវគម្រោងការងារនេះ មិនទាន់រលូនបានលឿននៅឡើយ ព្រោះបញ្ហាកូវីដ ១៩ វាយលុកខ្លាំងពេក អ៊ីចឹងយើងរក្សាតាមវិធានការរបស់ក្រសួងសុខាភិបាល។ តែយ៉ាងណា ក៏យើងនៅបានកោះប្រជុំតាមអនឡាញ និងរៀបចំជាបណ្តើរៗ»។ លោក វ៉ាត់ ចំរើន បានបញ្ជាក់បន្ថែម។
ចំណែកព្រឹទ្ធាចារ្យ សេង ប៊ុនសុង បានថ្លែងថា៖ «ខ្ញុំមកពីសហរដ្ឋអាមេរិក បានជាង ៣ ខែហើយ ដោយរង់ចាំទទួលការងារបង្វឹកកីឡាប្រយុទ្ធនេះ ក្រោមការចង្អុលបង្ហាពពីឯកឧត្តម វ៉ាត់ចំរើន ប៉ុន្តែយើងនៅមានឧបសគ្គ ដោយសារតែកូវីដ ១៩ នេះ មិនទាន់ជួបជុំគ្នា បាននៅឡើយ។ទោះជាយ៉ាងណា ខ្ញុំនៅតែឆ្លៀតឱកាសបានទៅសំណេះសំណាលជាមួយក្លិបល្បីៗមួយចំនួន និងបានបង្ហាញពីបច្ចេកទេសមួយចំនួន ដូចជាក្បាច់ចាប់ ក្បាច់ឱប ឬក្លេបោក ជាដើម ដល់កីឡាករល្បីៗមួយចំនួនរបស់យើង»។
លោកគ្រូ សេង ប៊ុនសុង បានបន្ថែមថា៖ «មួយរយៈនេះ ខ្ញុំបានទៅបង្ហាញក្បាច់គុន នៅសាលាគុនស៊ិនត្រាល់ នៅខេត្តបាត់ដំបងរបស់លោកគ្រូហេង ដែលមានហាត់ភាគច្រើនលើប្រភេទកីឡាប្រយុទ្ធហាប់ឡីដូ បន្ទាប់មកខ្ញុំចេញទៅបង្ហាញក្បាច់គុន នៅសាលាគុនល្បុក្កតោខេត្តសៀមរាបរបស់លោកគ្រូ សេរី ដែលគាត់ទើបតែស្លាប់ថ្មីៗនេះ រួចខ្ញុំបន្តមកបង្ហាញក្បាច់គុន នៅក្លិបនាយកដ្ឋានអង្គរក្ស របស់លោកគ្រូ ស៊ន អេលីត នៅភ្នំពេញ និងបានទៅបង្ហាញបច្ចេកទេសនៅក្លិបគុនចម្រុះ MMA Cambodia Top Team នៅទួលទំពូងផងដែរ»។
ព្រឹទ្ធាចារ្យកីឡាគុនចម្រុះដ៏មានទេពកោសល្យរូបនេះ បានបញ្ជាក់ថា៖ «ទោះជាបញ្ហាកូវីដ១៩ មិនទាន់ធូរស្បើយ ហើយការប្រជុំធ្វើមហាសន្និបាទជាផ្លូវការ មិនទាន់បានជួបជុំគ្នាផ្ទាល់ តែយើងប្រជុំស្គាល់គ្នាតាមប្រព័ន្ធ ZOOM ដើម្បីសម្របសម្រួលការងារឱ្យបានយល់ពីទិសដៅជាបណ្តើរៗ»។
ចំណែកលោក ហ៊ុន ចាន់រាជ ម្ចាស់ក្លិប Cambodia Top Team និងជាគ្រូបង្វឹក MMAដែលបានដឹកនាំកីឡាករកម្ពុជា ចេញទៅប្រកួត នៅលើឆាកអន្តរជាតិ បានជាច្រើនលើកនោះ បាននិយាយថា៖ «វត្តមានរបស់លោកគ្រូ សេង ប៊ុនសុង គឺបាននាំមកនូវបច្ចេកទេសល្អៗ ពង្រឹងបន្ថែមដល់កីឡាករយើង ដើម្បីចេញទៅប្រកួតមានលទ្ធផលល្អជ័យជម្នះ សម្រាប់កម្ពុជាយើង»៕