ភ្នំពេញ៖ អតីតអ្នកប្រដាល់ជើងខ្លាំង លោក ធន់ សុភា ត្រូវបានគេចាត់ទុកថា ជាអ្នកដែលទទួលបានជោគជ័យនៅលើវិថីកីឡាប្រដាល់គុនខ្មែរ តាំងពីនៅជាកីឡាកររហូតដល់បច្ចុប្បន្ន ដោយលោកបានវិវឌ្ឍខ្លួនទៅជាអាជ្ញាកណ្ដាលចៅក្រម និងគ្រូបង្វឹកដ៏មានស្នាដៃម្នាក់ នៅសមាគមកីឡាប្រដាល់កងយោធពលខេមរភូមិន្ទ ជាមួយការមានឋានៈជាវរសេនីយ៍ត្រី (ស័ក្តិ ៤) ហើយ ធន់ សុភា ក៏ជាជំនួយការផ្គូផ្គងកីឡាប្រដាល់ឱ្យសង្វៀនបាយ័នផងដែរ។
ជាមួយការបានជោគជ័យ ក្នុងវិស័យកីឡានេះ ធន់ សុភា ធ្លាប់បានស្នាដៃ ជាកីឡាករឆ្នើមម្នាក់ ដោយធ្លាប់ឈ្នះខ្សែក្រវាត់ចំនួន ៣ ស្ថាប័ន និងមេដាយមាសថ្នាក់ជាតិ ១ ផងដែរ ខណៈរូបលោកផ្ទាល់ ត្រូវមជ្ឃដ្ឋានទូទៅស្គាល់ថា ជាមនុស្សមានចរិតស្លូតបូត មិនចេះនិយាយច្រើន មិនចេះផឹកស្រា ពិសាបារី ប៉ុន្តែលើសង្វៀនវិញ ទម្ងន់ជើងគ្មានមេត្តាចំពោះដៃគូប្រកួតឡើយ។
ពេលរំឭកពីប្រវត្តិ កាលនៅជាកីឡាករ បុរសវ័យ ៣៩ ឆ្នាំ និងកម្ពស់ ១,៧១ ដែលមានស្រុកកំណើតនៅភូមិទួលសាលា ឃុំពពេន ស្រុករំដួល ខេត្តស្វាយរៀង ប្រាប់ថា៖ «បើរំឭកពីបទពិសោធ កាលនៅជាកីឡាករ ខ្ញុំធ្លាប់ប្រកួត ១៩០ ដង ស្មើ ៩ ដង និងចាញ់តែ ៧ ដងទេ ក្រៅពីនេះឈ្នះទាំងអស់ ក្នុងនោះ ខ្ញុំឈ្នះបានខ្សែក្រវាត់ចំនួន ៣ និងមេដាយមាសថ្នាក់ជាតិ ១ ទុកជាមរតកឱ្យកូនមើលដែរ»។
លោក ធន់ សុភា ចូលប្រឡូកជាកីឡាករ ក្នុងឆ្នាំ ១៩៩៥ និងឈប់វិញក្នុងឆ្នាំ ២០១១។ ក្នុងបទពិសោធដ៏ជោគជាំនេះ ធន់ សុភា ឈ្នះខ្សែក្រវាត់ដំបូង ក្នុងឆ្នាំ ២០០០ ក្រោយឈ្នះ នួន សូរិយា ក្នុងវគ្គផ្តាច់ព្រ័ត្រ នៅសង្វៀនប៉ុស្តិ៍លេខ ៣ ហើយ ខ្សែក្រវាត់ទី២ យកបានក្នុងឆ្នាំ ២០០២ នៅសង្វៀនប៉ុស្តិ៍លេខ ៥ ក្រោយឈ្នះ ជ័យ កុសល ឯខ្សែក្រវាត់ទី៣ សុភា នៅសង្វៀន CTN ក្នុងឆ្នាំ ២០០៧ ដោយឈ្នះសិស្សរួមក្លិប មាស ចន្ថា ដែលបច្ចុបន្នរស់នៅអូស្ត្រាលី។
ដោយមានបទពិសោធជាកីឡាករឆ្នើម ដែលមានការគោរពស្រឡាញ់ពីសិស្ស ហើយបច្ចុប្បន្នជាគ្រូល្អ ជាមួយការងារជាចៅក្រមអាជ្ញាកណ្តាល និងមានជំនាញផ្គូផ្គងឱ្យសង្វៀនបាយ័នផងនោះ ធន់ សុភា បានទម្លាយពីមូលដ្ឋានគ្រឹះនៃភាពជោគជ័យនេះ ដល់អ្នកជំនាន់ក្រោយ ដើម្បីទុកជាមេរៀន សម្រាប់ស្វែងរកជោគជ័យក្នុងវិស័យកីឡានេះផងដែរ។
លោក ធន់ សុភា ថា៖ «ខ្ញុំមិនជោគជ័យធំដុំអ្វីទេ តែអាជីពប្រដាល់នេះ បើយើងគោរពវិន័យ ខិតខំហាត់ឱ្យល្អ ប្រកួតបានល្អ គឺមានចំណូលព្រមទាំងជីវភាពប្រសើរ ពិសេសកុំដើរលេងច្រើន ឬផឹកស្រា ជក់បារី គឺមានបងប្អូនរាប់អានច្រើន។ លើសពីនេះ ការមានសីលធម៌ល្អ គឺមេៗ គាត់យកចិត្តទុកដាក់ជួយច្រើនណាស់ ហើយជាមួយគ្នា ខ្ញុំនៅតែអរគុណដល់លោកអ៊ំ តែម ម៉ឺន ដែលជួយផ្តល់ការអប់រំល្អៗ ទើបខ្ញុំមានថ្ងៃនេះ»។
លោក តែម ម៉ឺន ប្រធានសហព័ន្ធកីឡាប្រដាល់គុនខ្មែរ និងជានាយកមជ្ឈមណ្ឌលកីឡាកងយោធពលខេមរភូមិន្ទ បានថ្លែងថា៖ «អតីតកីឡាករ ធន់ សុភា តាំងពីដើមមក គោរពវិន័យល្អណាស់ ហើយឥឡូវទទួលបានការងារល្អៗ។ នៅសមាគមប្រដាល់កងយោធពលខេមរភូមិន្ទ មានឋានៈជាវរសេនីយ៍ត្រី ជាគ្រូបង្វឹកមើលការខុសត្រូវបង្វឹកកីឡាករផ្ទាល់ដៃ និងគ្រប់គ្រងកីឡាករប្រដាល់គុនខ្មែរចំនួន ៥១ នាក់ ហើយកីឡាករល្អៗមួយចំនួន ដែលមានស្នាដៃល្អ យើងពិនិត្យបញ្ចូលក្របខ័ណ្ឌ តាមគោលការណ៍របស់ក្រុមប្រឹក្សាកីឡាកងយោធពលខេមរភូមិន្ទនៃក្រសួងការពារជាតិ»៕