.jpg)
កីឡាកររបស់ក្រុមអាហ្សង់ទីន (ស្ដាំ) និងរបស់កក្រុមប្រេស៊ីល កំពុងឈរក្បែរមន្ត្រីរបស់ ANVISA ក្រោយការប្រកួតត្រូវផ្អាក កាលពីថ្ងៃអាទិត្យ។
ក្រុងឡូសាន: សហព័ន្ធបាល់ទាត់ពិភពលោក (FIFA) កាលពីថ្ងៃចន្ទ បានសម្ដែងនូវការសោកស្ដាយចំពោះទិដ្ឋភាពចលាចល ដែលកើតមានរហូតដល់ការប្រកួតវគ្គជម្រុះ World Cup ប្រចាំតំបន់អាមេរិកឡាទីន (CONMEBOL) រវាងក្រុមម្ចាស់ផ្ទះប្រេស៊ីល និងអាហ្សង់ទីន ត្រូវបានផ្អាក ហើយសហព័ន្ធបានប្រាប់ថា ការសម្រេចចំពោះវិធានការផ្នែកវិន័យ ដែលអាចនឹងកើតមាន នឹងត្រូវធ្វើឡើង ក្នុងពេលវេលាសមរម្យណាមួយ។
ការប្រកួត នៅឯកីឡដ្ឋាន Neo Quimica Arena ក្នុងក្រុងសៅប៉ូឡូ កាលពីថ្ងៃអាទិត្យ ត្រូវបានបញ្ឈប់ភ្លាមៗ បន្ទាប់ពីចាប់ផ្ដើមបានប៉ុន្មាននាទី ដោយសារមានមន្ត្រីសុខាភិបាលរបស់ប្រេស៊ីល រត់ចូលទីលាន រហូតបង្កឱ្យមានភាពរញ៉េរញ៉ៃកើតឡើងពីសំណាក់មន្ត្រី និងកីឡាកររបស់ក្រុមទាំង ២។
ការចូលមកកាត់ចង្វាក់នៃការប្រកួតពីក្រុមមន្ត្រីនេះ បានកើតឡើងតែប៉ុន្មានម៉ោង បន្ទាប់ពីអាជ្ញាធរសុខាភិបាល ក្នុងប្រទេសប្រេស៊ីល បានប្រាប់ឱ្យបដឹងថា កីឡាកររបស់ក្រុមជម្រើសជាតិអាហ្សង់ទីន ៤ រូប ដែលលេងឱ្យក្លិបអាជីព នៅប្រទេសអង់គ្លេស គួរតែត្រូវធ្វើចត្តាឡីស័កជាបន្ទាន់ ដោយសារបានបំពានវិធានការទប់ស្កាត់ជំងឺកូវីដ ១៩។
«FIFA មានការសោកស្ដាយចំពោះទិដ្ឋភាព ដែលកើតមានមុនការផ្អាកនៃការប្រកួតរវាងក្រុមប្រេស៊ីល និងអាហ្សង់ទីន សម្រាប់វគ្គជម្រុះ FIFA World Cup 2022 ប្រចាំតំបន់ CONMEBOL ដែលនាំឱ្យអ្នកគាំទ្ររាប់លាននាក់មិនអាចរីករាយនឹងការមើលនូវហ្គេមដ៏ធំ រវាងក្រុមមហាអំណាចបាល់ទាត់ ២ របស់ពិភពលោក»។ នេះជាការលើកឡើងរបស់ស្ថាប័នគ្រប់គ្រងបាល់ទាត់ពិភពលោក ក្នុងសេចក្ដីប្រកាសរបស់ខ្លួន។
Montiel (ឆ្វេង) របស់អាហ្សង់ទីន និង Neymar របស់ប្រេស៊ីល ប្រជែងគ្នាយកបាល់ ពេលការប្រកួតកំពុងដំណើរការ។
តាមរយៈសេចក្ដីប្រកាសនោះ FIFA បានបន្ថែមថា៖ «របាយការណ៍ផ្លូវការការប្រកួតដំបូង បានផ្ញើមកដល់ FIFA ហើយ។ ព័ត៌មាននេះ នឹងត្រូវបានយកទៅធ្វើការវិភាគដោយស្ថាប័នផ្នែកវិន័យ ហើយការសម្រេចណាមួយ នឹងត្រូវធ្វើឡើង ក្នុងពេលវេលាសមរម្យ»។
ស្ថាប័នតាមដានសុខភាពរបស់ប្រេស៊ីល (ANVISA) បានឱ្យដឹងថា កីឡាកររបស់អាហ្សង់ទីន ដែលមានដូចជា Giovani Lo Celso និង Cristian Romero របស់ក្រុម Tottenham ព្រមទាំងកីឡាករ Emiliano Martinez និង Emiliano Buendia របស់ក្រុម Aston Villaបានផ្ដល់ព័ត៌មានក្លែងក្លាយ ពេលពួកគេមកដល់ប្រទេសប្រេស៊ីល។
កីឡាករ ៣ រូប Romero, Lo Celso និង Martinez សុទ្ធតែបានចូលលេងក្នុងជម្រើសដំបូងទាំងអស់ ក្នុងហ្គេម កាលពីថ្ងៃអាទិត្យនោះ ដោយនាំឱ្យមានការចូលមករំខានពីសំណាក់មន្ត្រីរបស់ ANVISA នោះ។
ក្នុងទិដ្ឋភាពដ៏រញ៉ែរញ៉ៃនៅលើទីលាននោះ ប្រធានក្រុមអាហ្សង់ទីន កីឡាករ Lionel Messi និងមិត្តរួមក្រុម បាននាំគ្នាចាកចេញ ខណៈដែលក្រុមប្រេស៊ីល ទៅចាប់ផ្ដើមហាត់សមវិញ៕ AFP/VN
