ភ្នំពេញ៖ អ្នកលេងកណ្តាប់ដៃធ្ងន់ និងជាកីឡាករចិត្តធំវ៉ៃមិនចេះដកថយ អេលីត សាន់ របស់ក្លិបនាយកដ្ឋានអង្គរក្ស ត្រូវបានដាក់ឱ្យប្រកួតសងសឹកជាមួយអ្នកលេងស្នៀតជង្គង់ជើងចាស់ ឡុង ជិន របស់ក្លិបខ្លារខិនមានរិទ្ធ ក្នុងប្រភេទទម្ងន់ ៦០ គីឡូក្រាម ក្នុងឋានៈជាគូឯកនៅលើសង្វៀន PNN នាថ្ងៃអាទិត្យនេះ។
សម្រាប់ការជួបគ្នា ២ លើក កន្លងមក អេលីត សាន់ ចាញ់ ឡុង ជិន ទាំង ២ លើក តែទោះជាយ៉ាងនេះក្តី សម្រាប់ការសងសឹកក្នុងឋានៈជាគូឯក ដែលមានតម្លៃខ្លួនខ្ពស់លើកនេះ អេលីត សាន់ ពេញចិត្ត និងប្តេជ្ញាខ្ពស់ថា ត្រូវសងសឹកឱ្យបាន ប៉ុន្តែ ឡុង ជិន អះអាងថា រូបគេមិនបារម្ភនោះទេ ហើយគេនឹងរក្សាជ័យជម្នះជាលើកទី៣ នេះ ឱ្យបានដដែល។
លោក ស៊ន អេលីត គ្រូបង្វឹក អេលីត សាន់ និយាយថា៖ «អេលីត សាន់ ធ្លាប់បានប្រកួតចាញ់ ឡុង ជិន នៅសង្វៀន CNC ដោយបោះបង់ការប្រកួត ព្រោះឈឺដៃ ហើយការប្រកួតគ្នាលើកទី២ នៅកម្មវិធីអលស្តារ គេបានបន្តចាញ់ដោយពិន្ទុទៀត។ ចំណែកការប្រកួតសងសឹកលើកទី៣ នេះ ខ្ញុំមិនហ៊ានអួតទេ ព្រោះយើងធ្លាប់ចាញ់គេចំនួន ២ លើកហើយនោះ ប៉ុន្តែការប្រឹងហ្វឹកហាត់ និងឡើងប្រកួត គឺចង់ឈ្នះ ដើម្បីស្តារកិត្តិយស និងមុខមាត់ឡើងវិញ»។
គ្រូបង្វឹក ដែលកំពុងមាន ប្រជាប្រិយខ្លាំងរូបនេះ បានបន្ថែមថា៖ «ខ្ញុំ និងកូនសិស្ស ពិតជាពេញចិត្ត ក្នុងការឡើងប្រកួត ព្រោះតម្លៃខ្លួន នៅសង្វៀន PNN នេះ ១ ប្រកួតបានដល់ ៤០០ ដុល្លារ អ៊ីចឹងយើងធានាវ៉ៃអស់ពីសមត្ថភាពមិនឱ្យមហាជនខកចិត្តនោះទេ តែខ្ញុំសង្ឃឹមឈ្នះត្រឹម ៥០ ភាគរយ»។ ចំណែកកីឡាករ អេលីត សាន់ និយាយថា៖ «ខ្ញុំពិតជាចង់ឈ្នះ ហើយលើកនេះហាត់ល្អជាងមុន នឹងប្រកួតឱ្យបានល្អជាងមុន»។
បើនិយាយពីបច្ចេកទេសប្រកួតវិញ ក្បាច់ប្រកួតរបស់កីឡាករ ឡុង ជិន មានស្នៀតជង្គង់ល្អជាង មានកម្ពស់ល្អជាង និងចាស់វស្សាជាង ដោយមានបទពិសោធប្រកួតនៅលើសង្វៀនក៏ច្រើនជាងផងដែរ។ ឡុង ជិន ធ្លាប់ប្រកួតបាន ១២៦ ដង ឈ្នះ ៩០ ចាញ់ ៣៣ ស្មើ ៣ ដង ក្នុងនោះផ្តួលដៃគូឱ្យសន្លប់បាន ២០ ដង។
ចំណែក អេលីត សាន់ មានចំណុចល្អ ដោយអាចមានប្រៀប ផ្នែកកណ្តាប់ដៃ និងមានចិត្តក្លាហាន ស្មារតីប្រយុទ្ធល្អ ខណៈដែលការប្រកួតនៅលើសង្វៀន ពិតជាបញ្ចេញអស់ពីសមត្ថភាពដោយរបៀបវាយរបស់គេ ទាក់ទាញ ពោលគឺមិនចេះដកថយ ឬធ្វើឱ្យអ្នកទស្សនាធុញទ្រាន់នោះឡើយ។ អេលីត សាន់ ធ្លាប់ប្រកួតបាន ៥៨ ដង ឈ្នះ ៤៦ ចាញ់ ១២ ដង ក្នុងនោះផ្តួលដៃគូឱ្យសន្លប់បាន ២៨ ដង។
យ៉ាងណាក៏ដោយ ក៏ ឡុង ជិន មិនបានបង្ហាញនូវការបារម្ភចំពោះការសងសឹករបស់ អេលីត សាន់ នោះទេ ដោយបាននិយាយថា៖ «ខ្ញុំមិនសូវបារម្ភរឿងចាញ់នោះទេ ព្រោះបើបិទកណ្តាប់ដៃជាប់ពេលចូលឱបឡើងជង្គង់ គឺខ្ញុំមានជំនឿឈ្នះច្រើន។ ទោះយ៉ាងណា ខ្ញុំបារម្ភផ្នែកកម្លាំង នៅចុងទឹកដែរ ព្រោះគេនៅក្មេងជាងកម្លាំងល្អជាងដែរ ប៉ុន្តែខ្ញុំសង្ឃឹមរក្សាជ័យជម្នះបន្តទៀតបាន ដោយសង្ឃឹមឈ្នះ ៧០ ភាគរយ»៕