.jpg)
Rabiot (ស្ដាំ) របស់បារាំង លោតតែតបាល់ទល់នឹង Pohjanpalo របស់ហ្វាំងឡង់។ AFP
ក្រុងប៉ារីស៖ ក្រុមម្ចាស់ជើងឯកបារាំងបានយកឈ្នះក្រុមហ្វាំងឡង់ ២-០ ពីការប្រកួតជម្រុះ World Cup (WC) ប្រចាំទ្វីបអឺរ៉ុប កាលពីថ្ងៃអង្គារ ដោយសារគ្រាប់បាល់របស់ខ្សែប្រយុទ្ធ Antoine Griezmann តែម្នាក់ឯង ដែលលទ្ធផលនេះ បានជួយឱ្យក្រុមរបស់លោក Didier Deschamps បញ្ចប់ការប្រកួតមិនឈ្នះសោះ ៥ ហ្គេមរបស់ខ្លួន។
ក្រុមជម្រើសជាតិបារាំងទទួលបាននូវសំឡេងហ៊ោកញ្ជ្រៀវយ៉ាងទ្រហឹងអឺងកងពីទស្សនិកជនចំនួន ៥៧ ០០០ នាក់ សម្រាប់ការប្រកួតក្នុងក្រុងលីយ៉ុង ដែលកីឡាករ Griezmann រួមសហការគ្នាយ៉ាងល្អជាមួយដៃគូប្រយុទ្ធ Karim Benzema ខណៈដែលក្រុមរបស់ពួកគេ ជម្នះនូវការលេងមិនសូវជាស៊ីចង្វាក់គ្នា ក្នុងការចាប់ផ្ដើមពីដំបូង។
ការបញ្ជូនបាល់ ដោយកែងជើងយ៉ាងស្អាតរបស់កីឡាករចាស់វស្សា Benzema តម្រង់ទៅកីឡាករ Griezmann ដែលរត់ទៅចាំក្នុងតំបន់គ្រោះថ្នាក់រួចជាស្រេច និងធ្វើការស៊ុតបញ្ចូលទីយ៉ាងអស្ចារ្យ ជួយឱ្យក្រុមម្ចាស់ផ្ទះនាំមុខនៅនាទីទី២៥។
កីឡាករ Griezmann វ័យ ៣០ ឆ្នាំ ដែលទើបបញ្ចប់ពេលវេលាមិនសូវរីករាយរបស់ខ្លួននៅក្រុម Barcelona ដោយការវិលទៅចូលរួមជាមួយក្រុមចាស់ Atletico Madrid ក្នុងលក្ខខណ្ឌខ្ចីជើង បានរត់ទៅឆក់បាល់យ៉ាងលឿន ពេលកីឡាករ Leo Dubois បញ្ជូនចូលប្រអប់គ្រោះថ្នាក់ ហើយក៏ស៊ុតគ្រាប់ទី៤១ ឱ្យក្រុមជម្រើសជាតិ ក៏ដូចជាជួយឱ្យក្រុមមាន់គកនាំមុខ ២-០ នៅនាទីទី៥៣។
ក្រោយខកចិត្តនឹងលទ្ធផលស្មើ ១-១ ជាមួយក្រុមម្ចាស់ផ្ទះអ៊ុយក្រែន ក្នុងជំនួបចុងក្រោយនៃវគ្គជម្រុះរបស់ក្រុមទាំង ២ ជោគជ័យនេះ គឺជាកម្លាំងជំរុញជាទីគាប់ចិត្តសម្រាប់ក្រុមបារាំង ដែលនៅតែមានការលេងប្រកបដោយភាពវៃឆ្លាត ក្រោយធ្លាក់ចេញពីព្រឹត្តិការណ៍ Euro 2020 ក្នុងវគ្គ ១៦ ក្រុមចុងក្រោយ នៅរដូវក្ដៅនេះ។
គ្រូបង្វឹករបស់ក្រុមបារាំង លោក Deschamps បានថ្លែងថា៖ «យើងមិនបានធ្វើឱ្យប្រសើរគ្រប់យ៉ាងនោះទេ តែយើងបានរកឃើញនូវទំនុកចិត្តរបស់ពួកយើងមកវិញ។ លទ្ធផលនេះ បានធ្វើឱ្យយើងកំណត់ជោគវាសនារបស់យើង នៅក្នុងដៃខ្លួនឯង ហើយយើងត្រូវតែបញ្ចប់ភារកិច្ចនេះ ក្នុងខែវិច្ឆិកាឱ្យបាន»។
ជាមួយនឹងការប្រកួតបញ្ចប់ទៅ ៦ លើក ក្រុមបារាំង កំពុងឈរទី១ ក្នុងពូល D ដោយមាន ១២ ពិន្ទុ ពោលគឺនាំមុខក្រុមលេខ ២ អ៊ុយក្រែន ដែលលេងតិចជាង ១ ហ្គេម ចំនួន ៧ ពិន្ទុ។ រីឯក្រុមហ្វាំងឡង់ ស្ថិតនៅចំណាត់ថ្នាក់ទី៣ ជាមួយនឹង ៤ ពិន្ទុ ហើយក្រុមលេខ ៤ បូស្ន៊ី មាន ៣ ពិន្ទុ តែទាំង ២ ក្រុមនេះ ទើបប្រកួតបាន ៤ លើកប៉ុណ្ណោះ ខណៈដែលក្រុមបាតពូលកាហ្សាក់ស្ថាន ចាញ់ទាំងអស់ពីការប្រកួត ៥ ដងរបស់ខ្លួន៕ AFP/VN
