.jpg)
ញូវយ៉ក៖ កីឡាករសញ្ជាតិអេស្ប៉ាញ Carlos Alcaraz ដែលជាបេក្ខភាពវ័យក្មេងជាងគេបំផុត ក្នុងវគ្គ ៨ នាក់ចុងក្រោយ រយៈពេល ៥៨ ឆ្នាំ ក្នុងព្រឹត្តិការណ៍ប្រកួតវាយកូនបាល់ (តិន្នីស) កម្មវិធី US Open នៅអាមេរិក ត្រូវបង្ខំចិត្តដកខ្លួនពីការប្រកួត ដែលកំពុងដំណើរការ កាលពីថ្ងៃអង្គារ ដោយសារមានរបួសភ្លៅខាងស្ដាំ។
កីឡាករកាណាដា Felix Auger-Aliassime បានឈ្នះសិតដំបូង ៦-៣ និងនាំមុខនៅសិតទី២ ក្នុងលទ្ធផល ៣-១ មុនពេលកីឡាករ Alcaraz វ័យ ១៨ ឆ្នាំ សុំដកខ្លួនពីការប្រកួតនេះ ដែលធ្វើឱ្យគូប្រកួតរបស់ខ្លួនវ័យ ២១ ឆ្នាំ ឆ្លងទៅវគ្គ ៤ នាក់ចុងក្រោយជាលើកដំបូង សម្រាប់កម្មវិធីប្រកួតលំដាប់ Grand Slam ដោយត្រូវទៅតទល់ជាមួយកីឡាករចំណាត់ថ្នាក់លេខ ២ ពិភពលោក Daniil Medvedev របស់រុស្ស៊ី។
«វាពិតជាតានតឹងណាស់ ដែលត្រូវមកបញ្ចប់ពីកម្មវិធីធំបែបនេះ។ ខ្ញុំគ្មានជម្រើសលេងបន្តនោះទេ។ ខ្ញុំត្រូវតែរក្សាកាយសម្បទាឱ្យនៅរឹងមាំ។ ខ្ញុំមិនមានអារម្មណ៍ស្រួលក្នុងការបន្តការប្រកួតឡើយ»។ នេះជាសម្ដីរបស់កីឡាករ Alcaraz។
កីឡាករចំណាត់ថ្នាក់លេខ ៥៥ ពិភពលោក Alcaraz ដែលបានទម្លាក់ Stefanos Tsitsipas របស់ក្រិក នៅជុំទី៣ អាចនឹងកា្លយជាកីឡាករវ័យក្មេងជាងគេបំផុតផ្នែកបុរសក្នុងវគ្គ ៤ នាក់ នៅអាមេរិកនេះ តាំងពីឆ្នាំ ១៩៦០ និងជាកីឡាករក្មេងជាងគេក្នុងកម្មវិធី Grand Slam ចាប់តាំងពី Michael Chang ឈ្នះពាន French Open កាលពីឆ្នាំ ១៩៨៩ ក្នុងវ័យតែ ១៨ ឆ្នាំ។
ជាមួយគ្នានេះ បើកុំជួបបញ្ហារបួសនេះ រូបគេក៏អាចនឹងក្លាយជាកីឡាករដំបូងគេផងដែរ ដែលបានឆ្លងដល់វគ្គពាក់កណ្ដាលផ្ដាច់ព្រ័ត្រ នៅ US Open ក្នុងការបង្ហាញខ្លួនដំបូង គិតតាំងពីអតីតកីឡាករ Eric Sturgess ក្នុងឆ្នាំ ១៩៤៨៕ AFP/VN
