.jpg)
Depay (លើ) សម្ដែងការអបអរជាមួយមិត្តរួមក្រុម ក្រោយស៊ុតបញ្ចូលទីឱ្យហូឡង់នាំមុខតួកគី អំឡុងការប្រកួតជម្រុះ World Cup កាលពីថ្ងៃអង្គារ។
ក្រុងអាំស្ទែរដាំ: ខ្សែប្រយុទ្ធ Memphis Depay នៅតែបន្តនូវទម្រង់លេងដ៏ល្អរបស់ខ្លួនទៀត ជាមួយនឹងការធ្វើបានហ៊ែតទ្រិក (ស៊ុត ៣ គ្រាប់) ដែលជាការរួមចំណែកយ៉ាងធំ ក្នុងជ័យជម្នះភ្លូកទឹកភ្លូកដី ៦-១ របស់ក្រុមហូឡង់លើក្រុមភ្ញៀវតួកគី ដែលសល់គ្នាតែ ១០ នាក់ អំឡុងការប្រកួត ក្នុងកីឡដ្ឋាន Amsterdam Arena កាលពីអង្គារ ដោយលទ្ធផលនេះ រុញឱ្យក្រុមហូឡង់ឡើងទីឈរទី ១ ក្នុងពូល G សម្រាប់យុទ្ធនាការទាត់ជម្រុះ World Cup (WC)។
វាជាការធ្វើបានហ៊ែតទ្រិកលក្ខណៈអន្តរជាតិលើកដំបូងរបស់កីឡាករ Depay វ័យ ២៧ ឆ្នាំ ខណៈដែលក្រុមហូឡង់ បានបង្ហាញឱ្យឃើញនូវជ័យជម្នះដ៏សំខាន់ជាលើកទី២ ក្នុងរយៈពេល ៤ ថ្ងៃ ដែលជាលទ្ធផលជួយឱ្យពួកគេ មាន ១៣ ពិន្ទុ ពីការប្រកួត ៦ ដង ហើយរារាំងក្រុមតួកគីមិនឱ្យឡើងទៅឈរប្រធានពូល ដោយខ្លួនឯងកាន់តំណែងនេះជំនួសនេះ។
កីឡាករ Depay បានបង្កើតឱកាសឱ្យខ្សែបម្រើ Davy Klaassen ស៊ុតគ្រាប់បើកឆាកសិន មុននឹងខ្លួនឯង ទម្លុះសំណាញ់ទី៣ គ្រាប់ផ្ទួនៗបន្ថែមពីលើ ហើយកីឡាករបម្រុង ២ រូប Guus Til និង Donyell Malen ក៏រួមចំណែកស៊ុតបញ្ចូលទីម្នាក់ ១ គ្រាប់ដែរ។ ក្រុមតួកគី ដែលត្រូវលេងគ្នា ១០ នាក់ ក្រោយខ្សែការពារ Caglar Soyuncu ត្រូវបណ្ដេញចេញ មានគ្រាប់បាល់ ១ គ្រាប់សងវិញ ដែលស៊ុតដោយកីឡាករ Cengiz Under។
Wijnaldum (ស្ដាំ) របស់ហូឡង់ ប្រជែងយកបាល់ជាមួយ Under (កណ្ដាល) របស់តួកគី អំឡុងការប្រកួតជម្រុះ World Cup កាលពីថ្ងៃអង្គារ។
ក្រោយក្រុមពណ៌ទឹកក្រូច ដណ្ដើមបាននូវជ័យជម្នះនេះ គ្រូបង្វឹកលោក Louis van Gaal ដែលចូលមកជំនួសលោក Frank de Boer បានលើកឡើងថា វានឹងមានតែភាពប្រសើរឡើងៗតែប៉ុណ្ណោះ។
លោក van Gaal បានថ្លែងថា៖ «ប្រសិនបើអ្នកឈ្នះ ៦-១ អ្នកអាចរំពឹងបាននូវការកោតសរសើរយ៉ាងច្រើន។ នេះជាអ្វី ដែលខ្ញុំបានរៀបចំបង្កើតសម្រាប់ការប្រកួតនេះ។ ខ្ញុំបានដាក់ទស្សនៈរបស់ខ្ញុំទៅក្នុងខ្លួនរបស់កីឡាករ។ ខ្ញុំបានធ្វើអ្វីជាច្រើន ដែលកីឡាករចង់បាន។ ខ្ញុំបាននិយាយ ក្រោយហ្គេមជាមួយន័រវែស និងម៉ុងតេណេហ្គ្រោថា នេះជាពូលដ៏ពិសេស ហើយខ្ញុំនិយាយពាក្យនោះម្ដងទៀត នាពេលនេះ»។
«ខ្ញុំកំពុងមាននូវក្រុមដ៏រីករាយមួយ។ ខ្ញុំបានឆ្លងផុតទ្វារទី១ ហើយ ហើយខ្ញុំពេញចិត្តណាស់។ ចាប់ពីពេលនេះតទៅ វានឹងមានតែភាពប្រសើរឡើងៗតែប៉ុណ្ណោះ តែយើងមិនត្រូវធ្វេសប្រហែសពេកនោះទេ»។ នេះជាការបន្ថែមរបស់អ្នកចាត់ការវ័យ ៧០ ឆ្នាំ៕ AFP/VN
