.jpg)
Guerreiro (ស្ដាំ) របស់ព័រទុយហ្គាល់ ប្រជែងយកបាល់ជាមួយ Mahmudov របស់អាស៊ែបៃហ្សង់ អំឡុងការប្រកួតជម្រុះ World Cup កាលពីថ្ងៃអង្គារ។
ក្រុងបាគូ: ក្រុមជម្រើសជាតិព័រទុយហ្គាល់ មិនសូវជាលំបាកប៉ុន្មានឡើយ ក្នុងការយកឈ្នះក្រុមអាស៊ែបៃហ្សង់ នៅផ្ទះខ្លួនឯង ជាមួយនឹងលទ្ធផល ៣-០ ពីការប្រកួតនៃវគ្គជម្រុះ World Cup ប្រចាំទ្វីបអឺរ៉ុប កាលពីថ្ងៃអង្គារ ហើយពួកគេបានឡើងទៅឈរជាប្រធានពូល តែពួកគេមិនទាន់ប្រាកដថា នឹងបានសិទ្ធិឡើងស្វ័យប្រវត្តិនោះឡើយ។
ក្រោយបញ្ចប់ហ្គេមទី៥ នេះ ក្រុមព័រទុយហ្គាល់ នាំមុខដាច់ ២ ពិន្ទុ លើក្រុមស៊ែប៊ី ដែលគួរឱ្យសោកស្ដាយពីការបាត់ឱកាស ក្នុងការឡើងទៅឈរទី១ ក្នុងពូល A ដោយសារតែគ្រាប់បាល់ ដែលកើតឡើងពីការធ្វើឱ្យចូលទីខ្លួនឯង បាននាំឱ្យក្រុមម្ចាស់ផ្ទះសាធារណរដ្ឋអៀរឡង់ តាមស្មើ ១-១ អំឡុងការប្រកួតក្នុងពេលជាមួយគ្នា។
ទោះគ្មានវត្តមានស៊ុបភើស្តារ Cristiano Ronaldo ដែលរងការពិន័យក៏ដោយ ក៏ក្រុមព័រទុយហ្គាល់ នៅតែមិនមានទម្រង់លេងធ្លាក់ចុះឡើយ ខណៈដែលកីឡាករ Bernardo Silva ស៊ុតគ្រាប់នាំមុខដំបូងឱ្យក្រុមភ្ញៀវនៅនាទីទី២៦ មុននឹង Andre Silva ថែមគ្រាប់ទី ២ នៅ ៥នាទីបន្ទាប់ ហើយខ្សែប្រយុទ្ធ Diogo Jota បង្ហើយគ្រាប់ទី៣ ដោយការតែតបានសម្រេច នៅនាទីទី៧៥។
កីឡាកររបស់ក្រុមព័រទុយហ្គាល់ នាំគ្នាអបអរ ក្រោយស៊ុតបញ្ចូលទី នាំមុខអាស៊ែបៃហ្សង់ អំឡុងការប្រកួតជម្រុះ World Cup កាលពីថ្ងៃអង្គារ។
កីឡាករចំណូលថ្មីរបស់ក្រុម Manchester United គឺខ្សែប្រយុទ្ធ Ronaldo ដែលទើបបានក្លាយជាអ្នកស៊ុតបញ្ចូលទីបានច្រើនជាងបំផុតឱ្យក្រុមជម្រើសជាតិ ជាមួយនឹងគ្រាប់បាល់ ២គ្រាប់ទល់នឹងក្រុមសា.អៀរឡង់ កាលពីសប្ដាហ៍មុន មិនបានចូលលេងនោះទេ ដោយសារជាប់ពិន័យ ក្រោយទទួលបានកាតលឿងជាលើកទី២ ក្នុងយុទ្ធនាការទាត់ជម្រុះនេះ ពេលរូបគេបានដោះអាវសម្ដែងការអបអរចំពោះគ្រាប់បាល់ទី២ ក្នុងហ្គេមនោះ។
ក្រុមព័រទុយហ្គាល់ នឹងប្រឈមជាមួយក្រុមលេខ ៣ លុចសំបួ សម្រាប់ហ្គេមនាពេលបន្ទាប់របស់ពួកគេ នៅថ្ងៃទី ១២ ខែតុលា ក្នុងទឹកដីខ្លួនឯង៕ AFP/VN
