ភ្នំពេញ៖ កីឡាករជើងខ្លាំងវ័យក្មេង អេ អាំម៉ារីនភូថង និងជើងចាស់ វេង សុភ័ក្រ ដែលកំពុងទទួលបានជោគជ័យកាន់តែខ្លាំង តាមរយៈការដណ្តើមបានខ្សែក្រវាត់ និងប្រាក់រង្វាន់ធំៗជាបន្តបន្ទាប់ នៅក្នុងអំឡុងការប្រកួតបិទទ្វារ នាបរិបទជំងឺកូវីដ ១៩ នេះ ត្រូវបានផ្គូផ្គងដាក់ឱ្យជួបគ្នាជាលើកដំបូង ក្នុងកម្មវិធីម៉ាសហ្វៃ ១ ទឹកមាន ៩ នាទី នៅលើសង្វៀនថោន នាថ្ងៃអាទិត្យ ចុងសប្តាហ៍នេះ។
វត្តមានរបស់កីឡាករជើងថ្មី អេ អាំម៉ារីនភូថង ដែលធ្លាប់ឈ្នះខ្សែក្រវាត់ អមដោយប្រាក់រង្វាន់ ១ ម៉ឺនដុល្លារ ពីសង្វៀនហង្សមាសប្រកួតជាមួយកីឡាករចាស់វស្សា វេង សុភ័ក្រ មកពីក្លិបបញ្ជាការដ្ឋានពិសេស ដែលធ្លាប់ឈ្នះប្រាក់លានចំនួន ៤ ដង នៅសង្វៀនថោននេះ វាបានក្លាយជាជំនួបដ៏ទាក់ទាញ ហើយអ្នករៀបចំកម្មវិធីបានអះអាងថា ការប្រកួតរបស់អ្នកទាំង ២ នេះ នឹងកក្រើកសង្វៀនថោនជាមិនខាន។
តាមប្រវត្តិប្រកួត គឺអ្នកទាំង ២ នេះ មិនធ្លាប់ប្រកួតគ្នាទេ ព្រោះខុសជំនាន់គ្នា ដោយក្នុងនោះ វេង សុភ័ក្រ មានបទពិសោធប្រកួតច្រើនជាង អេ អាំម៉ារីន ចំនួនទ្វេដងឯណោះ។ អាំម៉ារីន ទើបប្រកួត ៣០ ដង ឈ្នះ ២៣ ចាញ់ ៥ និងស្មើ ២ ដង ក្នុងនោះធ្លាប់ផ្តួលដៃគូឱ្យសន្លប់បាន ១២ ដង ហើយអ្វីដែលគួរឱ្យកត់សម្គាល់ និងជាការប្រកួតដ៏អស្ចារ្យនោះ គឺ អេ អាំម៉ារីន យកឈ្នះ ម៉ន សាម៉េត នៅវគ្គផ្តាច់ព្រាត់នៅសង្វៀនហង្សមាស ដើម្បីក្លាយជាម្ចាស់ខ្សែក្រវាត់ អមដោយប្រាក់ ១ ម៉ឺនដុល្លារ។
លោកស្រី សាំង សុម៉ាលី ជាម្តាយ និងគ្រប់គ្រងផ្ទាល់ទៅលើកីឡាករ អេ អាំម៉ារីនភូថង បាននិយាយថា៖ «ចាប់តាំងពីឈ្នះខ្សែក្រវាត់រួចមក អាំម៉ារីន ទើបបានប្រកួត ១ លើក ជាមួយកីឡាករ បឺត សង្ឃឹម នៅសង្វៀនថោននេះ ដោយបានលទ្ធផលស្មើគ្នា។ ចំណែកការប៉ះជាមួយ វេង សុភ័ក្រ នៅអាទិត្យនេះ បានត្រៀមរួចហើយ គឺហ្វឹកហាត់រាល់ថ្ងៃ ប៉ុន្តែលទ្ធផលខ្ញុំមិនទាន់ហ៊ាននិយាយទេ គឺរំពឹងឈ្នះត្រឹម ៥០ ភាគរយប៉ុណ្ណោះ»។
ចំណែកប្រវត្តិប្រកួតរបស់កីឡាករ វេង សុភ័ក្រ មានបទពិសោធចំនួន ៧៨ ដង ឈ្នះ ៦៣ ចាញ់ ១៣ ស្មើ ២ ដង ក្នុងនោះផ្តួលដៃគូឱ្យសន្លប់បានចំនួន ២៥ លើក។ ចំណុចគួរឱ្យចាប់អារម្មណ៍ខ្លាំងនោះ វេង សុភ័ក្រ ធ្លាប់ឈ្នះប្រាក់លាន នៅសង្វៀនថោននេះ ចំនួន ៤ លើក ហើយក៏ធ្លាប់ឈ្នះប្រាក់បន្ថែមពីកម្មវិធីម៉ាសហ្វៃតាមរយៈការផ្តួលដៃគូឱ្យសន្លប់ផងដែរ។
កីឡាករ វេង សុភ័ក្រ បានឈ្នះប្រាក់លាន ៣,៤ លានរៀល ជាលើកទី១ ពីការប្រកួតម៉ារ៉ាតុងនៅលើសង្វៀនថោននេះ ក្រោយបានយកឈ្នះ សុខ សាវិន នៅវគ្គផ្តាច់ព្រ័ត្រ ហើយលើកទី២ បានឈ្នះកីឡាករ សូត្រ ខេវិន លើកទី៣ បានឈ្នះកីឡាករ ឡុង ជិន និងឈ្នះប្រាក់លាន លើកទី៤ ក្រោយឈ្នះ សោម វិឆ័យ រីឯការឈ្នះប្រាក់រង្វាន់បន្ថែមពីម៉ាសហ្វៃ គឺក្នុងពេល សុភ័ក្រ បានផ្តួលកីឡាករ ផាន រះ ឱ្យសន្លប់។
ចំពោះការជួប អេ អាំម៉ារីនភូថង លើកនេះ លោក ឡៅ ស៊ីណាត គ្រូបង្វឹកជំនួយ វេង សុភ័ក្រ បាននិយាយថា៖ «វេង សុភ័ក្រ មានប្រៀបឈ្នះច្រើនជាង គឺសង្ឃឹមឈ្នះ ៧០ ភាគរយ ប៉ុន្តែវាលំបាកវ៉ៃដែរ ដោយសារកីឡាករ អេ អាំងម៉ារីន មានកម្ពស់ខ្ពស់ជាង ពិបាកចូលវាយណាស់»។ ស៊ីណាត បានបន្ថែមថា៖ «បើចូលវាយសម្រុកខ្លាំងដូចគ្នា ធានាឈ្នះ ប៉ុន្តែបើវាយរបៀបដកថយស្រង់យកពិន្ទុ គឺពិតជាលំបាក ព្រោះគេចាំស្រង់យកពិន្ទុ គេខ្ពស់ អាចធាក់ចេញ គឺជាបញ្ហាលំបាក»។
ចំណែកឯលោក ជួប វុត្ថា អ្នកផ្គូផ្គងប្រចាំនៅសង្វៀនថោនបាននិយាយថា៖ «សម្រាប់ការប្រកួត ១ គូនេះ គឺពិតជាកក្រើកសង្វៀនទៀតហើយ។ អ្វីដែលសង្វៀនយើង ទទួលបានជោគជ័យ គឺការប្រកួតប្រចាំសប្តាហ៍នេះ យើងរៀបចំបានល្អ ដោយគណៈកម្មការផ្គូផ្គងមាន ៣ ភាគី គឺខាងមន្ត្រីសហព័ន្ធ ខាងម្ចាស់សង្វៀន និងខាងតំណាងស្ប៉នស័រ សហការគ្នាល្អ ហេតុនេះការប្រកួតរបស់សង្វៀនយើង ទទួលបានការគាំទ្រ និងមានអ្នកនិយមចូលចិត្តទស្សនាយ៉ាងច្រើនបំផុត»៕