.jpg)
ភ្នំពេញ៖ កីឡាករវ័យក្មេង កំពុងល្បីល្បាញលេចធ្លោខ្លាំង ក្នុងចំណោមអ្នកប្រដាល់ជំនាន់ក្រោយ លន់ សៀកឡេង របស់ក្លិបថ្នល់ទទឹងគុនខ្មែរ និង អេលីត ឡុងឡី មកពីក្លិបនាយកដ្ឋានអង្គរក្ស នឹងត្រូវបង្ហាញមុខរួមគ្នានៅលើសង្វៀនបាយ័នស្ទឹងមានជ័យ នាយប់ថ្ងៃសៅរ៍ ហើយវត្តមានរបស់ពួកគេបាន និងកំពុងធ្វើឱ្យជើងចាស់ សេន កុលស និង ឯម សុធី ដែលជាដៃគូ មានការបារម្ភ ដោយពួកគេ អះអាងថា វាជាការប្រកួតដ៏លំបាក ចំណែកសិស្សរួមក្លិបរបស់ ឡុងឡី គឺ អេលីត កែវឡុង ក៏ត្រូវប៉ះជើងខ្លាំងវ័យក្មេងដូចគ្នា គឺ ធន់ វណ្ណា ក្នុងថ្ងៃជាមួយគ្នានោះផងដែរ។
សម្រាប់ជំនួប ដែលមានការចាប់អារម្មណ៍ខ្លាំងនេះ ជើងថ្មីកំពុងសាងភាពល្បី លន់ សៀកឡេង ត្រូវដាក់ឱ្យប្រកួតដណ្តើមប្រាក់លានជាមួយ សេន កុសល ក្នុងទម្ងន់ ៥៧ គ.ក ចំណែក អេលីត ឡុងឡី ត្រូវប្រឈមនឹង ឯម សុធី ក្នុងទម្ងន់ ៦០ គ.ក។
ជុំវិញការផ្គូផ្គងអ្នកទាំង ៦ ឱ្យជួបគ្នានេះ លោក ធន់ សុភា ជំនួយការផ្គូផ្គងប្រចាំសង្វៀនបាយ័នប្រាប់ថា៖ «ការផ្គូផ្គងកីឡាករបច្ចុប្បន្ននេះ គឺមហាជនគេនិយមចូលចិត្តកីឡាករវ័យក្មេងៗ ដែលមានទឹកចិត្តប្រកួតបែបវាយសម្រុកខ្លាំងៗ អស់ពីកម្លាំងកាយចិត្ត ព្រោះជើងចាស់មួយចំនួនភាគច្រើនស្គាល់គ្នា វ៉ៃមិនសូវអស់ពីសមត្ថភាពទេ»។
អតីតជើងខ្លាំង ធន់ សុភា បន្ថែមថា៖ «ចំណែកអ្នកប្រដាល់ទាំង ៣ គូ នៅសប្តាហ៍នេះ គឺជាការផ្គូផ្គងជម្រើស ដែលកីឡាករជើងថ្មីល្បីបំផុត ដូចជា លន់ សៀកឡេង នេះ ធ្លាប់ផ្តួល សេន កុសល ឱ្យសន្លប់ អ៊ីចឹងសប្តាហ៍នេះ ជាការប្រកួតសងសឹក រីឯ ២ គូទៀត គឺសុទ្ធតែជាគូជក់ចិត្តជាមិនខាន»។
លោក ស៊ន អេលីត គ្រូបង្វឹក និងជាអ្នកគ្រប់គ្រងប្រចាំក្លិបនាយកដ្ឋានអង្គរក្សប្រាប់ថា៖ «កូនសិស្សខ្ញុំ អេលីត កែវឡុង ប៉ះ ធន់ វណ្ណា ពិតជាលំបាកឈ្នះណាស់ ព្រោះនៅខ្ចីវស្សាជាងបន្តិច ដោយខ្ញុំមានទំនុកចិត្តឈ្នះ ៦០ ភាគរយប៉ុណ្ណោះ ព្រោះ ធន់ វណ្ណា មួយរយៈនេះ កំពុងតែល្អដែរ ចំណែក អេលីត ឡុងឡី ជាមួយជើងចាស់ ឯម សុធី វិញ ខ្ញុំគិតថា ម៉្យាងម្នាក់ទេ។ យើងមានបទពិសោធតិចជាងតែកម្លាំង និងការហ្វឹកហាត់ ត្រៀមបានល្អ អ៊ីចឹងខ្ញុំរំពឹងឈ្នះ ៧០ ភាគរយ»។
ចំណែក សេន កុសល ដែលធ្លាប់សន្លប់ក្រោមស្នៀតជើង និងកណ្តាប់ដៃរបស់ លន់ សៀកឡេង នោះ ហាក់មិនរំពឹងថា អាចសងសឹកបានឡើយ ដោយនិយាយថា៖ «ខ្ញុំសង្ឃឹមឈ្នះ ៥០ ភាគរយ ក្នុងការប្រកួតសងសឹកនេះ ព្រោះគេកម្លាំងល្អជាង ក្នុងជំនួប ៥ ទឹក ដោយខ្ញុំអាចលំបាកផ្នែកកម្លាំងនៅចុងទឹក អ៊ីចឹងហើយការជួបគ្នាលើកនេះ ខ្ញុំមានការបារម្ភខ្លាំងដែរ»។
ដោយឡែក កីឡាករជើងចាស់ ឯម សុធី ដែលហាក់ធ្លាក់សមត្ថភាពជាងមុននោះ ក៏គិតថា លំបាកទប់ជើងថ្មី អេលីត ឡុងឡី ដែរ។ សុធី បាននិយាយថា៖ «ខ្ញុំមិនហ៊ានអះអាងមុនទេ ព្រោះការប្រកួតនេះ វាលំបាកទប់ទល់ណាស់ ប៉ុន្តែខ្ញុំធានាប្រើបច្ចេកទេសឱ្យបានច្រើនជាងកម្លាំង ដោយសារការវាយតទល់គ្នា ពិតជាចាញ់ប្រៀបផ្នែកកម្លាំងគេមិនខាន ហេតុនេះខ្ញុំសង្ឃឹមត្រឹមពាក់កណ្តាល គឺ ៥០ ភាគរយឈ្នះ»៕
