.jpg)
ឡៅ ចន្ទ្រា និង ឈួន រិទ្ធី នឹងត្រូវប្រកួតគ្នាជាលើកទី៣ នៅសង្វៀនបារ័ន ដើម្បីរកឱ្យឃើញ ជើងខ្លាំងដ៏ពិតប្រាកដ។ រូប បាយ័ន
ភ្នំពេញ៖ មានការចាប់អារម្មណ៍ខ្លាំង ចំពោះវត្តមានកីឡាករប្រដាល់គុនខ្មែរ ទម្ងន់ធ្ងន់ ឡៅ ចន្ទ្រា និង ឈួន រិទ្ធី (ថៃ រិទ្ធី) ដែលត្រូវដាក់ឱ្យប្រកួតគ្នាជាថ្មីម្តងទៀត នៅលើសង្វៀនបាយ័ន នាល្ងាចថ្ងៃអាទិត្យនេះ ហើយជំនួបរវាងអ្នកប្រយុទ្ធមានឈ្មោះល្បីល្បាញទាំង ២ រូបនេះ ធ្វើឱ្យមហាជនភាគច្រើនរង់ចាំទស្សនាយ៉ាងអន្ទះសារ ព្រោះការជួបគ្នា ២ លើក កន្លងមកនៅតែមិនដាច់ស្រេច និងមិនអស់ចិត្ត។
សម្រាប់ការជួបគ្នា ជាលើកទី១ នៅលើសង្វៀនបាយ័ននេះដូចគ្នា ឈួន រិទ្ធី របស់សមាគមប្រដាល់កីឡាកងយោធពលខេមរភូមិន្ទ បានប្រើកណ្តាប់ដៃផ្តួល ឡៅ ចន្ទ្រា ឱ្យសន្លប់ធំ នៅទឹកទី៣ ដោយជ័យជម្នះនោះ អាចចាត់ទុកថា ជារឿងដ៏កម្របំផុត សម្រាប់អាជីពប្រដាល់របស់ ចន្ទ្រា ព្រោះកន្លងមក គ្មានកីឡាករខ្មែររូបណាមួយ អាចវាយឱ្យគេសន្លប់ យ៉ាងនេះឡើយ។
បន្ថែមពីលើកនេះកាលពីរសប្តាហ៍មុន សង្វៀនបាយ័ន បានរៀបចំឱ្យមានការប្រកួតសងសឹកម្តងទៀត ជាលើកទី២ ប៉ុន្តែការប្រកួតនោះ ត្រូវបានគេមិនប្រកាសលទ្ធផល ដោយសារតែ ឡៅ ចន្ទ្រា ទាត់ខុសបច្ចេកទេសចូលពងស្វាស នាំឱ្យ ឈួន រិទ្ធី ឈឺមិនអាចបន្តការប្រកួតបាន។ ចំណុចនេះ ច្បាប់របស់សហព័ន្ធកីឡាប្រដាល់គុនខ្មែរ នៅតែមិនទាន់អនុវត្តបានល្អនៅឡើយព្រោះកន្លងមកកីឡាករទាត់ខុសបច្ចេកទេសខ្លះ ត្រូវបានពិន័យឱ្យចាញ់ គូខ្លះឱ្យឈ្នះ និងមានគូខ្លះទៀត ត្រូវទុកជាមោឃ មិនប្រកាសលទ្ធផល។
យ៉ាងណាមិញ សម្រាប់ការជួបគ្នា លើកនេះ ឈួន រិទ្ធី បាននិយាយថា៖ «លើកនេះ ខ្ញុំគ្មានភ័យ ឬតក់ស្លុតអ្វីទេ កណ្តាប់ដៃខ្ញុំ មិនញញើត ហើយត្រូវវាយចេញឱ្យអស់ពីសមត្ថភាព ដើម្បីរក្សាជ័យជម្នះនេះឱ្យបាន។ ទោះជាយ៉ាងណា ការប្រកួតនេះ មិនអាចទស្សន៍ទាយបានមុនទេ ព្រោះទម្ងន់ធ្ងន់ វាយចូលគោលដៅល្អ គឺមិនអាចគេចពីសន្លប់បានឡើយ។ ខ្ញុំទទួលស្គាល់ថា ក្បាច់ទាត់របស់ ចន្ទ្រា គឺធ្ងន់ៗ ប៉ុន្តែបើប្តូរជាមួយកណ្តាប់ដៃ គឺមិនដឹងថា នរណាទៅមុននោះឡើយ»។
លោក នាង ស៊ីវុត្ថា បានឡើងណែនាំឈួន រិទ្ធី និង ឡៅ ចន្ទ្រា ដល់លើសង្វៀន នាជំនួបរបស់អ្នកទាំង២នេះ កន្លងមក។ រូប សហការី
ចំណែកលោក ធន់ សុភា ជាគ្រូបង្វឹក បាននិយាយថា៖ «ខ្ញុំរំពឹងថា រិទ្ធី នឹងឈ្នះមិនខាន។បើវាយប្តូរគ្នា កណ្តាប់ដៃធ្ងន់របស់ ឈួន រិទ្ធី គឺវាយចូលគោលដៅមុនការទាត់ស្កាត់របស់ ឡៅ ចន្ទ្រា ហេតុនេះខ្ញុំសង្ឃឹមច្រើន។ កីឡាករក្នុងស្រុកខ្មែរ មិនទាន់មាននរណាអាចផ្តួល ឡៅ ចន្ទ្រាបាន ក្រៅពី ឈួន រិទ្ធី នោះទេ ហើយលើកនេះ ស្រួលមិនស្រួល ចន្ទ្រា អាចសន្លប់ទៀតក៏ថាបានដែរ»។
ចំពោះ ឡៅ ចន្ទ្រា មិនអាចសុំសម្ភាសបានទេ ព្រោះជាប់រវល់ ដោយរូបគេ បានរុញទៅឱ្យសួរគ្រូជំនួយ ដែលជាបងប្រុសរបស់គេ ឡៅ ស៊ីណា ហើយ ស៊ីណាត បាននិយាយថា៖ «បើប្រើស្នៀតទាត់បាន ចន្ទ្រា ធានាឈ្នះតែម្តង គឺ ៨០ ភាគរយ ប៉ុន្តែយើងលំបាកគេចពីកណ្តាប់ដៃ របស់គេ ព្រោះបើគិតពីរឿងការការពារកណ្តាប់ដៃ ពីការវាយរបស់គេ គឺយើងមិនអាចទាត់ចេញ ដោយប្រើកម្លាំងបានអស់ ១០០ ភាគរយនោះឡើយ។ ទោះយ៉ាងណា ខ្ញុំគិតថា ចន្ទ្រា ឈ្នះ ព្រោះវាចេះគេចហើយ គឺយើងមិនឈរឱ្យគេវ៉ៃបានគ្រប់ដៃឯណា!»។
ជុំវិញការមិនប្រកាសលទ្ធផល នាជំនួបលើកទី២ របស់ ឡៅ ចន្ទ្រា និង ឈួន រិទ្ធី ត្រូវបានមន្ត្រីបច្ចេកទេសប្រដាល់មួយរូប ប្រាប់ដោយសុំមិនឱ្យបញ្ចេញឈ្មោះថា ការប្រកួតសងសឹក លើកទី២ កាលពីរសប្តាហ៍មុន ដែលប្រកួតមិនប្រកាសលទ្ធផលនោះ គឺលោក នាង ស៊ីវុត្ថា ប្រធានគ្រប់គ្រងការប្រកួតនៅបាយ័ន ចេញមកប្រកាសដោយខ្លួនឯងថា មិនឱ្យមានឈ្នះឬចាញ់ទេ គឺគ្មានលទ្ធផល។
ប្រភពដដែល បានអះអាងថា៖ «បញ្ហាខុស ឬ ត្រូវ ជាសមត្ថកិច្ចរបស់គណៈកម្មការបច្ចេកទេសរបស់សហព័ន្ធ មិនមែនម្ចាស់កម្មវិធីបញ្ជា ឬឡើងមកសម្តែងឫកបង្ហាញពីឥទ្ធិពលកាត់សេចក្តីខ្លួនឯងនោះឡើយ ហើយបើធ្វើបែបៗនេះ តើមន្ត្រីបច្ចេកទេសរបស់សហព័ន្ធកីឡាប្រដាល់គុនខ្មែរ យកមុខទៅលាក់ទុកនៅឯណា?»។
គួរបញ្ជាក់ថា លោក នាង ស៊ីវុត្ថា ប្រធានផ្គូផ្គង និងជាអ្នកមើលការខុសត្រូវ នៅសង្វៀនបាយ័ន តាំងពីបង្កើតកម្មវិធីនេះឡើង ក្នុងឆ្នាំ ២០០៨។ ឥទ្ធិពលរបស់លោក នាង ស៊ីវត្ថា ត្រូវបានគេកត់សម្គាល់ឃើញថា ពេលខ្លះបានលូកដៃចូលការងាររបស់ក្រុមបច្ចេកទេស ខណៈដែលមន្ត្រីសហព័ន្ធវិញខ្លបខ្លាច សុំតែសុខទេ។
បន្ថែមពីលើនេះ ចៅក្រមអាជ្ញាកណ្តាលមួយចំនួន ដែលធ្វើឱ្យលោក នាង ស៊ីវុត្ថា មិនសប្បាយចិត្ត ឬមិនចេះលត់ក្រាប ឬមិនត្រូវចិត្ត គឺត្រូវបាន គេដកចេញពីសង្វៀននេះ ជាច្រើននាក់មកហើយ។ អ្វីដែលជាគំរូអាក្រក់ កន្លងមកនោះ លោក នាង ស៊ីវុត្ថា ធ្លាប់ចងជើងកីឡាករល្បីៗមួយចំនួន ដោយមិនអនុញ្ញាតឱ្យចេញទៅប្រកួតនៅសង្វៀនដទៃទេ ដោយបានផ្តល់ជាថ្នូរឱ្យលុយក្រៅការប្រកួត មានដូចជាកីឡាករ កែវ រំចង់ ជាដើម៕
