ក្រុងវ៉ាសូវី៖ លោក Gareth Southgate បានប្រាប់ថា ក្រុមជម្រើសជាតិអង់គ្លេសរបស់លោកនៅមានការងារ ដែលត្រូវធ្វើទៀត សម្រាប់ការដណ្ដើមសិទ្ធិទៅលេងក្នុងព្រឹត្តិការណ៍ World Cup 2022 បន្ទាប់ពីភ្លាត់ឱ្យកីឡាករ Damian Szymanski តែតបញ្ចូលទីនៅក្នុងម៉ោងបន្ថែមមានរបួស ដែលជាគ្រាប់បាល់នាំឱ្យក្រុមប៉ូឡូញតាមស្មើ ១-១ ពីការប្រកួត កាលពីថ្ងៃពុធ ក្នុងក្រុងវ៉ាសូវី។
យ៉ាងណាក្ដី ក្រុមតោកំណាចអង់គ្លេសនៅតែឈរក្នុងទីតាំងល្អក្នុងការធានានូវចំណាត់ថ្នាក់់របស់ខ្លួន ដើម្បីបានធ្វើដំណើរទៅប្រទេសកាតា ក្នុងនាមជាក្រុមទី១ នៃពូល I ពីការប្រកួតជម្រុះប្រចាំទ្វីបអឺរ៉ុប ដោយមាន ១៦ ពិន្ទុ ពោលគឺកំពុងនាំមុខដាច់ ៤ ពិន្ទុ លើក្រុមលេខ ២ អាល់បានី និង ៥ ពិន្ទុលើក្រុមលេខ ៣ ប៉ូឡូញ។
ហ្គេម ដែលមិនសូវមានសកម្មភាពនៅមុខបង្គោលទីប៉ុន្មាន មើលទៅទំនងជាលម្អៀងទៅរកលទ្ធផលស្មើគ្នានោះ ស្រាប់តែនៅមុន ១៨ នាទី ចប់ម៉ោងធម្មតា ការសាកស៊ុតពីចម្ងាយរបស់ខ្សែប្រយុទ្ធ Harry Kane បានចូលទីយ៉ាងស្អាត ដែលគួរតែជាគ្រាប់បាល់ ជួយឱ្យក្រុមអង់គ្លេស ឈ្នះការប្រកួតនេះ។
តែកីឡាករបម្រុង Szymanski បានជួយសង្គ្រោះក្រុមប៉ូឡូញ ដោយការលោតតែតបាល់បញ្ចូលទីយ៉ាងរហ័សនៅពេលខ្សែប្រយុទ្ធ Robert Lewandowski លើកបាល់ចូលតំបន់គ្រោះថ្នាក់ ហើយអាចជាការបាន ១ ពិន្ទុ ដ៏សំខាន់ ដើម្បីរក្សាឱកាសក្នុងការដណ្ដើមចំណាត់ថ្នាក់លេខ ២ សម្រាប់ប្រកួតវគ្គចាញ់ធ្លាក់។
ដោយក្នុងប្រកួតនៅខាងមុខ ត្រូវប៉ះជាមួយក្រុមមិនសូវខ្លាំងអង់ដូរ៉ា និងសាំងម៉ារ៉ាំង ក្នុងចំណោម ៤ ហ្គេម ដែលនៅសល់ ដូច្នេះការដណ្ដើមបានសិទ្ធិស្វ័យប្រវត្តិទៅប្រទេសកាតា អាចនៅតែជាក្រុមរបស់លោក Southgate ដែលមានសង្ឃឹមខ្ពស់ជាងក្រុមណាទាំងអស់។
ទោះបីជាបានឡើងដល់វគ្គផ្ដាច់ព្រ័ត្រក្នុងព្រឹត្តិការណ៍ធំលក្ខណៈអន្តរជាតិជាលើកដំបូង ក្នុងរយៈពេល ៥៥ ឆ្នាំ លោក Southgate ត្រូវបានរិះគន់ អំឡុងពេលធ្វើយុទ្ធនាការនៅ Euro 2020 ចំពោះការ ដែលលោកមិនប្រើប្រាស់កម្លាំងឱ្យមានប្រយោជន៍យ៉ាងស៊ីជម្រៅ ដែលគាត់មានក្នុងដៃ។ នេះជាលើកដំបូងហើយ គិតតាំងពីវគ្គ ៤ ក្រុមចុងក្រោយ នៅ Euro 96 ដែលក្រុមអង់គ្លេស មិនធ្វើការផ្លាស់ប្ដូរកីឡាករសូម្បីតែម្នាក់។
តែយ៉ាងណា អ្នកចាត់ការក្រុមអង់គ្លេស លោក Southgate បានពោលថា៖ «យើងគ្រប់គ្រងហ្គេមនេះទាំងស្រុង។ អ្នកអាចឱ្យកីឡាករផ្សេងចូលលេង ក្នុងហ្គេមនោះ នៅពេលវាមិនជាស្រួលប៉ុន្មាន ក្នុងដំណាក់កាលចុងក្រោយ។ យើងដឹងច្បាស់ថា ប្រសិនបើយើងឈ្នះហ្គេមនេះ យើងនឹងមានភាពប្រសើរជាងនេះបន្តិចមិនខាន ក្នុងការបានទៅប្រទេសកាតា»។
លោក Southgate បានបន្ថែមថា៖ «នោះមិនជាបញ្ហានោះទេ យើងនៅមានការងារជាច្រើនធ្វើទៀត តែខ្ញុំមិនអាចបន្ទោសកីឡាករ តាមរយៈវិធីដែលពួកគេបានឆ្លើយតបនៅរដូវក្ដៅនេះនោះឡើយ»។
ក្រុមអង់គ្លេស បានលុបលាងយ៉ាងគួរឱ្យចាប់អារម្មណ៍នូវការខកចិត្ត កាលពីព្រឹត្តិការណ៍ Euro 2020 ជាមួយនឹងជ័យជម្នះ ៤-០ បន្តបន្ទាប់គ្នាលើក្រុមហុងគ្រី និងអង់ដូរ៉ា នៅដើមសប្ដាហ៍ តែពេលនេះ ហាក់រាងពិបាកជាងមុនបន្តិចក្នុងការប៉ះជាមួយក្រុមម្ចាស់ផ្ទះប៉ូឡូញ ដែលទំនងជាក្រុមគូប្រជែងដ៏តឹងតែងជាងគេ ក្នុងពូលរបស់ខ្លួននេះ៕ AFP/VN