.jpg)
ទិដ្ឋភាពពហុកីឡដ្ឋានជាតិមរតកតេជោ កាលពីថ្ងៃអាទិត្យម្សិលមិញ។ រូបថត យូសុះ អាប់ឌុលរ៉ាស់ហ៊ីម
ភ្នំពេញ៖ ពហុកីឡដ្ឋានជាតិមរតកតេជោ ដែលជាសមិទ្ធផលធំល្អប្រណីតទំនើប ក្រោមជំនួយឧបត្ថម្ភពីសាធារណរដ្ឋប្រជាមានិតចិនចំពោះកម្ពុជា ស្មើនឹងទឹកប្រាក់ប្រមាណជា ១៥០ លានដុល្លារនោះ ត្រូវបានរៀបចំពិធីប្រគល់-ទទួល ក្រោមអធិបតីភាព លោកនាយករដ្ឋមន្ត្រី ហ៊ុន សែន និង លោក វ៉ាង យី ទីប្រឹក្សារដ្ឋ និងជារដ្ឋមន្ត្រីក្រសួងការបរទេសចិន កាលពីថ្ងៃអាទិត្យ ហើយពហុកីឡដ្ឋានថ្មី ដែលស្ថិតនៅសង្កាត់ព្រែកតាសេក ខណ្ឌឫស្សីកែវ ខាងជើងវត្តភ្នំ ចម្ងាយ ១២ គីឡូម៉ែត្រនេះ ត្រូវបានសាងសង់នៅលើផ្ទៃដីទំហំ ៨៥ ហិកតា និង ៣៥ អា។
លោកនាយករដ្ឋមន្រ្តី ហ៊ុន សែន បានថ្លែងថា៖ «ថ្ងៃនេះ ខ្ញុំពិតជាមានសេចក្តីសោមនស្សរីករាយ ដែលបានចូលរួមជាមួយឯកឧត្តម វ៉ាង យី ដើម្បីធ្វើពិធីប្រគល់ និងទទួល នៅវិមានកីឡដ្ឋាននៃពហុកីឡដ្ឋានជាតិមរតកតេជោ ដែលជាជំនួយឥតសំណងរបស់សាធារណរដ្ឋប្រជាមានិតចិន ហើយបញ្ហាទាំងអស់នេះ វាបានកើតឡើងដោយការខិតខំប្រឹងប្រែងនៅក្នុងទំនាក់ទំនងរវាងព្រះរាជាណាចក្រកម្ពុជា និងសាធារណរដ្ឋប្រជាមានិតចិន»។
លោកបានបញ្ជាក់ថា៖ «ថ្ងៃនេះ ជាកំណត់ត្រាថ្មីមួយទៀត នៃទំនាក់ទំនងដែកថែបរវាងកម្ពុជា និងចិន ដោយយើងទទួលបានជំនួយមួយ ដែលយើងមិននឹកស្មាន សូម្បីតែ ខ្លួនខ្ញុំផ្ទាល់ គឺឆ្នាំ ២០០០ ទៅហើយ ក៏ខ្ញុំមិនដែលនឹកស្មានថា យើងនឹងមានពហុកីឡដ្ឋានដ៏ល្អមួយនៅទីនេះនោះទេ ប៉ុន្តែក្រោមជំនួយឥតសំណងរបស់សាធារណរដ្ឋចិន យើងមានឱកាសដូចពេលនេះ។ ថ្ងៃនេះគ្រាន់តែពិធី ដើម្បីប្រគល់ និងទទួល ប៉ុណ្ណោះ ប៉ុន្តែយើងនឹងរៀបចំពិធីសម្ពោធមួយទៀត ហើយសង្ឃឹមថា មានថ្នាក់ដឹកនាំជាន់ខ្ពស់របស់ចិន ដើម្បីអបអរសាទរនូវសមិទ្ធផល ដែលកើតចេញពីការខិតខំប្រឹងប្រែង និងផ្លែផ្កា នៃចំណងមិត្តភាពរវាងកម្ពុជា-ចិន»។
លោក ថោង ខុន ប្រធានគណៈកម្មាធិការជាតិអូឡាំពិកកម្ពុជា (CNCC) និងជាអនុប្រធានអចិន្ត្រៃយ៍ CAMSOC ថ្លែងថា៖ «ពហុកីឡដ្ឋានមរតកតេជោ ជាពហុកីឡដ្ឋានទំនើបបំផុត ត្រូវបានអនុញ្ញាតឱ្យសាងសង់ចាប់តាំងពីថ្ងៃទី ១២ ខែ មេសា ឆ្នាំ ២០១៣ និងបានបញ្ចប់នៅថ្ងៃទី ៣១ ខែ សីហា ឆ្នាំ ២០២១ ដោយឆ្លងកាត់ការសាងសង់ជា ៣ ដំណាក់កាល ហើយពហុកីឡដ្ឋាននេះ មានសក្តានុពល ដែលបំពេញសេចក្តីត្រូវការសម្រាប់កីឡាគ្រប់ប្រភេទបាន និងត្រៀមទទួលរៀបចំសម្រាប់ព្រឹត្តិការណ៍អន្តរជាតិធំៗ ពិសេសក្នុងព្រឹត្តិការណ៍ស៊ីហ្គេមលើកទី៣២ ឆ្នាំ ២០២៣ ជាប្រវត្តិសាស្ត្រនៅកម្ពុជា»។
លោក ថោង ខុន បានបន្តថា វិសាលភាពនៃពហុកីឡដ្ឋានជាតិមរតកតេជោ គឺជាលំដាប់ខ្នាតល្អបំផុត នៅក្នុងតំបន់អាស៊ាន ដែលក្នុងនោះ មានមណ្ឌលហែលទឹក, មណ្ឌលកីឡាក្នុងសាល, អគារស្នាក់នៅ និងអាហារដ្ឋាន សម្រាប់អត្តពលិក និងគ្រូបង្វឹក, អគារហាត់ក្រៅសាល, តារាងបាល់ទះ បាល់បោះ និងបាល់ទាត់ វាលស្មៅធម្មជាតិ។ ចំណែកឯវិមានកីឡា ដែលសង់លើទំហំ ១៦ ហិកតា ៤ អា អាចផ្ទុកមនុស្សបាន ៦០ ០០០ នាក់ គឺអាចប្រើប្រាស់ជាពិធីបើកបិទកីឡាធំៗដូចជាស៊ីហ្គេម។
រដ្ឋមន្រ្តីក្រសួងទេសចរណ៍ លោក ថោង ខុន បន្ថែមថា៖ «សាលវិមាន ឬកីឡា ក្នុងសាលនេះ អាចលេងបានច្រើនប្រភេទកីឡា ខណៈដែលប្លង់សាងសង់រក្សាបាននូវប្រព័ន្ធអេកូឡូស៊ី និងបរិស្ថានខ្យល់ចេញចូលល្អ។ ជាមួយគ្នានេះ មានអគារចំនួន ៣៤ ហាងទំនិញសម្ភារ និងឧបករណ៍កីឡាគ្រប់ប្រភេទ, សាលហាត់កីឡា និងចំណតរថយន្តបាន ២៥ ០០០ គ្រឿង ជាពិសេសបច្ចេកវិទ្យាល្អ បើមានហេតុការណ៍អ្វីកើតឡើង គឺអាចរំដោះមនុស្សចេញចំនួន ៦០ ០០០ នាក់ ក្នុងរយៈពេលតែ ៧ នាទី ដោយសុវត្ថិភាព»៕
វីដេអូ៖
