ក្រុងមេនឆេស្ទ័រ៖ Cristiano Ronaldo ទទួលបាននូវការវិលត្រឡប់ដ៏រីករាយក្នុងនាមជាកីឡាកររបស់ក្រុម Manchester United (United) ដោយការស៊ុតបញ្ចូលទី ២ គ្រាប់ រួមចំណែកជួយឱ្យក្រុមបិសាចក្រហមឈ្នះ Newcastle ៤-១ នៅមុខអ្នកគាំទ្រ ដែលហ៊ោកញ្ជ្រៀវយ៉ាងកងរំពងពេញកីឡដ្ឋាន Old Trafford កាលពីថ្ងៃសៅរ៍។
ខ្សែប្រយុទ្ធ Ronaldo ឥឡូវនេះ មាន ១២០ គ្រាប់ហើយ ជាមួយក្រុម United តែជាការស៊ុតបញ្ចូលទីលើកដំបូង គិតតាំងពីបានចាកចេញទៅចូលរួមជាមួយក្លិប Real Madrid កាលពី ១២ ឆ្នាំកន្លងទៅ ហើយក៏ជាគ្រាប់បាល់ ក្នុងការមានសួនរួម ដើម្បីជួយរុញក្រុមរបស់លោក Gunnar Solskjaer ឡើងទៅឈរនៅទីកំពូលនៃតារាងពិន្ទុរបស់ក្របខ័ណ្ឌ Premier League។
«រូបគេ នៅតែជាអ្នកស៊ុតបញ្ចូលទីគួរឱ្យខ្លាចរអា និងពិសេសដោយឡែក។ រូបគេដឹងពីចង្វាក់ពេលវេលាសំខាន់ៗ នៅពេលមានបាល់ក្បែរៗខ្លួន»។ គ្រូបង្វឹកក្រុម United លោក Solskjaer បានលើកឡើង។
ក្រុម United ត្រូវបានសាងឡើង ដើម្បីធ្វើការប្រឹងប្រែងឱ្យខ្លាំងជាជាងការរំពឹងត្រឹម ៣ ពិន្ទុ តែអាចពឹងលើសញ្ជាតិញ្ញាណអ្នកប្រមាញ់របស់ Ronaldo ដែលបានបំប៉ោងសំណាញ់ទីឱ្យក្រុមម្ចាស់ផ្ទះនាំមុខ ២ ដង បន្ទាប់ពីគ្រាប់ដំបូង ត្រូវក្រុមសារិកាព្រៃតាមស្មើ ដោយសារការស៊ុតយ៉ាងស្អាតរបស់ខ្សែការពារស្លាប Javier Manquillo។
ក្រោយមក ខ្សែបម្រើ Bruno Fernandes ធ្វើឱ្យការប្រកួតសប្ដាហ៍ទី៤ របស់លីគកំពូលអង់គ្លេសនេះ ជាថ្ងៃ ដែលកីឡាករសញ្ជាតិព័រទុយហ្គាល់លេចធ្លោយ៉ាងខ្លាំង ជាមួយនឹងការស៊ុតពីចម្ងាយទម្លុះសំណាញ់ទីយ៉ាងស្អាត មុន ១០ នាទី ដែលហ្គេមត្រូវបញ្ចប់ ហើយកីឡាករបម្រុង Jesse Lingard ក៏សុំរួមចំណែក ១ គ្រាប់ពីជ័យជម្នះនេះដែរ ក្នុងម៉ោងបន្ថែមបង្គ្រប់មានរបួស។
ជោគជតារបស់ក្រុម United នៅលើទីលាន បានធ្លាក់ចុះយ៉ាងខ្លាំង គិតតាំងពីការចាកចេញរបស់កីឡាករ Ronaldo ដោយគ្មានភាពជោគជ័យឡើយ មិនថា នៅក្របខ័ណ្ឌ Premier League ឬ Champions League រាប់ចាប់ពីលោក Alex Ferguson ចូលនិវត្តន៍ពីតំណែងអ្នកចាត់ការក្រុម កាលពីឆ្នាំ ២០១៣។
ការវិលត្រឡប់របស់កីឡាករវ័យ ៣៦ ឆ្នាំនេះ គឺគ្រប់គ្រាន់បង្កើតបាននូវបរិយាកាសដ៏រំជួលចិត្តក្នុងចំណោមអ្នកគាំទ្រ ៧៤ ០០០ នាក់ ដែលមិនធ្លាប់មានក្នុងកីឡដ្ឋាន Old Trafford ជាច្រើនឆ្នាំមកហើយ។
«បរិយាកាសនៅជុំវិញក្លិប មានភាពរស់រវើកណាស់។ អ្នកគាំទ្រ ពិតជាមានភាពរីករាយណាស់រយៈពេល ១០ ថ្ងៃចុងក្រោយ ឬច្រើនជាងហ្នឹង។ មានការរំពឹងទុកលើរូបគេ (Ronaldo) និងក្រុមយ៉ាងខ្លាំង ហើយរូបគេធ្វើបានជោគជ័យ»។ លោក Solskjaer បានបន្ថែម។
យ៉ាងណាជាមួយនឹងជ័យជម្នះនេះ ក្រុម United ឡើងទៅឈរលេខ ១ បណ្ដោះអាសន្នក្នុងតារាងពិន្ទុរបស់ Premier League ក្រោយបញ្ចប់ការប្រកួត ៤ លើក ដោយមាន ១០ ពិន្ទុ ស្មើជាមួយក្រុមលេខ ២ Chelsea ដែលឈ្នះ Aston Villa ៣-០ ក្នុងហ្គេមបន្ទាប់ ខណៈដែលក្រុមជើងឯកចាស់ Manchester City នៅលេខ ៣ ជាមួយនឹង ៩ ពិន្ទុ៕ AFP/VN