ញូវយ៉ក៖ កីឡាការិនីវ័យ ១៨ ឆ្នាំ Emma Raducanu របស់ចក្រភពអង់គ្លេស បានក្លាយជាអ្នកឆ្លងកាត់ការប្រកួតជម្រុះទី១ ដែលឈ្នះពានរង្វាន់លំដាប់ Grand Slam ដោយការផ្ដួលកីឡាការិនីសញ្ជាតិកាណាដា Leylah Fernandez វ័យ ១៩ ឆ្នាំ កាលពីថ្ងៃសៅរ៍ ក្នុងវគ្គផ្ដាច់ព្រ័ត្រនៃការប្រកួតវាយកូនបាល់ (តិន្នីស) ក្នុងកម្មវិធី US Open 2021 ផ្នែកនារី។
កីឡាការិនី Raducanu ដែលមានចំណាត់ថ្នាក់លេខ ១៥០ ពិភពលោក គឺជាស្ត្រីរបស់ចក្រភពអង់គ្លេសដំបូងគេ ក្នុងរយៈពេល ៤៤ ឆ្នាំ ដែលអាចគ្រងជើងឯកពានក្នុងកម្មវិធីលំដាប់ Grand Slam បែបនេះបាន បន្ទាប់ពីបានយកឈ្នះកីឡាការិនីចំណាត់ថ្នាក់លេខ ៧៣ ពិភពលោក Fernandez ដែលមានជំនាញដៃឆ្វេងក្នុងលទ្ធផល ៦-៤ និង ៦-៣។
មិនមានរាប់តាំងពីអតីតកីឡាការិនី Virginia Wade ក្នុងព្រឹត្តិការណ៍ Wimbledon កាលពីឆ្នាំ ១៩៧៧ ដែលស្ត្រីរបស់ចក្រភពអង់គ្លេសបានឈ្នះពានលំដាប់ Grand Slam បែបនេះ ដោយកីឡាការិនី Raducanu ជាអត្តពលិកអង់គ្លេសទី១ ដែលអាចដណ្ដើមពាន US Open មកគ្រប់គ្រងរាប់តាំងពីអតីតកីឡាការិនី Wade ធ្វើបានក្នុងឆ្នាំ ១៩៦៨។
ការប្រកួតរវាងកីឡាការិនីដ៏មានទេពកោសល្យដ៏អស្ចារ្យនេះ ជាលើកដំបូង ដែលក្នុងវគ្គផ្ដាច់ព្រ័ត្រនៃកម្មវិធី Grand Slam មានសុទ្ធតែអត្តពលិកវ័យក្មេងទាំងអស់រាប់តាំងពីកីឡាការិនីវ័យ ១៧ ឆ្នាំ Serena Williams យកឈ្នះ Martina Hingis វ័យ ១៨ ឆ្នាំ លើកពាន US Open ក្នុងឆ្នាំ ១៩៩៩។
កីឡាការិនី Raducanu គឺជាអ្នកគ្រងជើងឯកកម្មវិធី US Open វ័យក្មេងបំផុតជាងគេ គិតចាប់ពីកីឡាការិនី Williams ក្នុងឆ្នាំ ១៩៩៩ មក ហើយក៏ជាអ្នកឈ្នះពាន US Open ដំបូងគេដែរ ដែលមិនភា្លត់ចាញ់ ១ សិត តាំងពីកីឡាការិនី Williams ធ្វើបានក្នុងលទ្ធផលបែបហ្នឹងក្នុងឆ្នាំ ២០១៤។
«ខ្ញុំដឹងថា ខ្ញុំនឹងត្រូវតែចូលឱ្យជ្រៅជាងនេះ។ វាជាការប្រកួតដ៏តានតឹងពិតមែន តែខ្ញុំគិតថា កម្រិត គឺពិតជាខ្ពស់ណាស់។ ខ្ញុំត្រូវតែប្រឹងប្រែងវាយតិន្នីស ជាមួយនឹងទម្រង់លេងដ៏ល្អបំផុត»។ នេះជាសម្ដីរបស់កីឡាការិនី Raducanu ដែលបាននិយាយ បន្ទាប់ពីបានឈ្នះពានរង្វាន់អមដោយប្រាក់រង្វាន់ចំនួន ២,៥ លានដុល្លារសហរដ្ឋអាមេរិក៕ AFP/VN