ក្រុងឡុងដ៍៖ ក្រុមតោខៀវ Chelsea បានបំបាក់ក្រុម Aston Villa ៣-០ កាលពីថ្ងៃសៅរ៍ ហើយជ័យជម្នះលើកទី ៦០០ របស់ពួកគេ នៅក្របខ័ណ្ឌ Premier League នេះ បានជួយឱ្យពួកគេ ឡើងទៅឈរនៅទីកំពូល ក្នុងតារាងពិន្ទុរួមជាមួយក្រុមបិសាចក្រហម Manchester United ខណៈដែលកីឡាករ Romelu Lukaku និង Mateo Kovacic អាចបំប៉ោងសំណាញ់លើកដំបូងបាន ក្នុងការប្រកួត នៅកីឡដ្ឋាន Stamford Bridge។
ខ្សែប្រយុទ្ធ Lukaku ដែលកាលពីមុន ក្នុងទឹកដីអង់គ្លេសនេះ បានលេងឱ្យក្រុម Man United, Everton និង West Bromwich Albion មិនដែលធ្លាប់ស៊ុតបញ្ចូលទី ក្នុងទឹកដីនេះទេ ដោយសូម្បីពេលរួមអាជីពលើកទី១ ជាមួយក្រុម Chelsea តែកីឡាករអន្តរជាតិបែលហ្ស៊ិករូបនេះ ទីបំផុត ធ្វើបានសម្រេចហើយ ជាមួយនឹងការបង្ហាញខ្លួនលើកទី ១៥ របស់ខ្លួន ដោយការស៊ុតគ្រាប់បាល់បើកឆាកឱ្យក្រុមម្ចាស់ផ្ទះ។
នៅនាទីទី១៥ ខ្សែបម្រើ Kovacic បានធ្វើការបញ្ជូនបាល់កាត់តំបន់កណ្ដាលរបស់ក្រុម Villa ហើយបាល់រត់យ៉ាងរលូនតម្រង់ទៅកីឡាករ Lukaku ដែលទទួលបាល់បានយ៉ាងល្អ មុននឹងបណ្ដើរបាល់ទៅស៊ុតបញ្ចូលទី ដោយការញាក់ផុតខ្សែការពារ Axel Tuanzebe។
កីឡាករ Lukaku ធ្វើបានសម្រេចគ្រាប់ទី២ ពីការប្រកួតនេះ ក្នុងម៉ោងបន្ថែមបង្គ្រប់មានរបួសនៃវគ្គទី២ នៅពេលដែលខ្សែការពារ Cesar Azpilicueta មើលឃើញរូបគេ នៅមុខប្រអប់គ្រោះថ្នាក់ ហើយក៏បញ្ជូនបាល់ទៅឱ្យ ខណៈដែលខ្សែប្រយុទ្ធវ័យ ២៨ ឆ្នាំ ទទួលបាល់ ហើយក៏ស៊ុតដោយជើងឆ្វេងរបស់ខ្លួន ទម្លុះសំណាញ់ទីយ៉ាងអស្ចារ្យ ជួយឱ្យក្រុម Chelsea នាំមុខ ៣-០។
«Lukaku ពោរពេញទៅដោយទំនុកចិត្ត និងដឹងច្បាស់យ៉ាងច្បាស់លាស់នូវអ្វី ដែលគេចង់ធ្វើ។ រូបគេជាអ្នកធ្វើការសម្រេចចិត្តចុងក្រោយ ហើយមានភាពជឿជាក់ល្អណាស់ ក្នុងការស៊ុតបញ្ចូលទី ដូច្នេះ គេបានជួយពួកយើងច្រើនណាស់។ យើងគេចមិនផុតពីការមានលទ្ធផលល្អឥតខ្ជោះ ពេលល្ងាចដ៏ល្អខ្ជោះឡើយ សម្រាប់ខ្សែប្រយុទ្ធរបស់យើង»។ នេះជាប្រសាសន៍របស់គ្រូបង្វឹកក្រុម Chelsea លោក Thomas Tuchel ដែលបានប្រាប់ទៅទូរទស្សន៍ Sky Sports។
ដោយឡែកសម្រាប់កីឡាករ Kovacic អាចមានឈ្មោះរបស់ខ្លួន នៅលើផ្ទាំងដាក់ពិន្ទុបាន ដោយសារបានឆក់ឱកាសពីការភ្លាត់ស្នៀតរបស់ខ្សែការពារ Tyrone Mings ដែលមានបំណងបញ្ជូនបាល់ទៅឱ្យអ្នកចាំទី Jed Steer តែសំណាងមិនល្អ ត្រូវខ្សែបម្រើសសញ្ជាតិក្រូអាស៊ី រូបនេះឆាបបាល់បាន ហើយស៊ុតគ្រាប់ទី២ ឱ្យក្រុមម្ចាស់ផ្ទះបានសម្រេច។
ក្រោយបញ្ចប់ហ្គេមទី៤ របស់ខ្លួន ក្រុម Chelsea ឈរនៅលេខរៀងទី២ ក្នុងតារាងពិន្ទុរបស់ក្របខ័ណ្ឌ Premier League ដោយមាន ១០ ពិន្ទុ ស្មើនឹងក្រុមលេខ ១ Man United៕ AFP/VN