.jpg)
ក្មេងៗក្រីក្រ ដែលអង្គការផ្កាយសមុទ្រកម្ពុជា បានយកមកបណ្តុះបណ្តាល បានបង្ហាញភាពសប្បាយរីករាយ ក្រោយពេលលេងបាត់ទាត់។ រូបថត សហការី
ភ្នំពេញ៖ អង្គការផ្កាយសមុទ្រកម្ពុជា (ISF) ដែលផ្តោតលើការអប់រំ និងការលេងកីឡាបាល់ទាត់ សម្រាប់កុមារាកុមារី គ្មានទីពឹង ឬគ្មានលទ្ធភាពចូលសាលារៀននោះ បានជាប់ជាបេក្ខភាពសម្រាំង ១ ក្នុងចំណោមបេក្ខភាពអង្គការក្រៅរដ្ឋាភិបាលចំនួន ១៦ ដែលត្រូវប្រកួតប្រជែងក្នុងកម្មវិធីពានរង្វាន់អន្តរជាតិ មានឈ្មោះថា People’s Choice Awards ហេតុនេះ ISF កំពុងត្រូវការសំឡេង បោះឆ្នោតពីប្រជាជនកម្ពុជា ដើម្បីអាចឈានទៅរកការឈ្នះពានរង្វាន់កម្រិតអន្តរជាតិមួយនេះ។
តាមរយៈការធ្វើសកម្មភាព និងប្រតិបត្តិការ អស់រយៈពេល ១៥ ឆ្នាំមកនេះ ISF បានជួយកូនខ្មែរក្រីក្រឱ្យបានចូលរៀន និងបណ្តុះបណ្តាលផ្នែកកីឡាបាល់ទាត់បានជាង ៣០០០ នាក់។ ជាមួយគ្នានេះ អង្គការក្រៅរដ្ឋាភិបាល ជុំវិញពិភពលោក បានស្រង់ទិន្នន័យសកម្មភាពការងាររបស់ ISF ហើយបានដាក់ជាអង្គការកំពូលទាំង ១៦ ដែលត្រូវបោះឆ្នោតជ្រើសរើសចំណាត់ថ្នាក់លេខ ១ ខណៈកម្មវិធីនេះ តម្រូវឱ្យប្រជាជនខ្មែរ ចូលរួមបោះឆ្នោត និងបរិច្ចាគតាមប្រព័ន្ធអនឡាញ ចាប់ពីថ្ងៃទី ១៣ ដល់ថ្ងៃទី ១៧ ខែ កញ្ញា ឆ្នាំ ២០២១ ដើម្បីសម្តែងមតិគាំទ្រ ប្រជែងក្នុង ១៦ អង្គការ នៅលើពិភពលោក។
កញ្ញា ជួប វិច្ឆិកា នាយិការអង្គការផ្កាយសមុទ្រកម្ពុជា ដែលធ្លាប់ឆ្លងកាត់ការងារនេះ តាំងពីបុគ្គលិកតូចតាច រហូតមានតួនាទីជាអ្នកគ្រប់គ្រងជាន់ខ្ពស់នោះ បានប្រាប់ថា៖ «អង្គការ ISF កម្ពុជា ដំបូងគេបង្អស់ បានជាប់ជាបេក្ខភាពសម្រាំង ក្នុងកម្មវិធីពានរង្វាន់អន្តរជាតិ People’s Choice Awards សម្រាប់អង្គការល្អបំផុត ក្នុងប្រភេទពានរង្វាន់អង្គការក្រៅរដ្ឋាភិបាល ឬអង្គការមិនរកប្រាក់ចំណេញ»។
នៅក្នុងចំណោមអង្គការទាំង ១៦ ដែលបានជាប់ជាបេក្ខភាព ត្រូវប្រកួតប្រជែងគ្នានោះ ក៏មានអង្គការ Dubai Economy, The Turkish Technology Foundation and California State និង USA ផងដែរ ចំណែកម្ចាស់ជយលាភី នឹងត្រូវសម្រេចតាមរយៈការបោះឆ្នោតជាសាធារណៈ ហើយជាមួយគ្នានេះ អង្គការផ្កាយសមុទ្រកម្ពុជា បានអំពាវនាវដល់ប្រជាជនខ្មែរទាំងអស់ ឱ្យចូលរួមបោះឆ្នោតទាំងអស់គ្នា។
កញ្ញា ជួប វិច្ឆិកា បានបញ្ជាក់ថា ការបោះឆ្នោតចំណាយពេលតិចជាងមួយនាទីប៉ុណ្ណោះ ដោយលោកអ្នក គ្រាន់តែចុចលើតំណភ្ជាប់ទៅវេបសាយ www.bit.ly/voteISF ហើយបញ្ចូលលេខកូដ Y129V រួចមើលតាមការណែនាំជាការស្រេច។ លោកអ្នកអាចធ្វើការបោះឆ្នោត ដោយមិនបាច់ចុះឈ្មោះក្នុងបញ្ជីអ៊ីម៉ែលនោះទេ។
«បន្ថែមពីលើនេះ អង្គការផ្កាយសមុទ្រកម្ពុជា ក៏កំពុងតែប្រារព្ធខួបលើកទី ១៥ ឆ្នាំរបស់ខ្លួន ដោយអំពាវនាវឱ្យមានការចូលរួមក្នុងកម្មវិធីបរិច្ចាគ ដែលរាល់ការបរិច្ចាគថវិកា ចាប់ពី ៥០ដុល្លារ ឡើងទៅនៅលើគេហទំព័រ www.bit.ly/giveISF ខណៈកម្មវិធីនេះ នឹងចាប់ផ្តើមនៅថ្ងៃទី ១៣ ដល់ថ្ងៃទី ១៧ ខែ កញ្ញា ២០២១ នេះ»។ កញ្ញា ជួប វិច្ឆិកា បានបញ្ជាក់បន្ថែម។
ចំណែកលោក យិន សាមឌី អ្នកសម្របសម្រួលអង្គការផ្កាយសមុទ្រកម្ពុជា បានឱ្យដឹងថា៖ «បើទោះបីជា រយៈពេល ១៨ ខែ ចុងក្រោយនេះ ជាពេលវេលាមួយដ៏លំបាក ដោយសារបញ្ហាកូវីដ ១៩ ក៏ពិតមែន ប៉ុន្តែក្រុមការងាររបស់អង្គការផ្កាយសមុទ្រកម្ពុជា នៅតែបន្តដំណើរការបាល់ទាត់របស់ខ្លួន ជាបន្តបន្ទាប់»។
លោកបានបន្ថែមថា៖ «ចំណែកការជាប់ជាអង្គការក្រៅរដ្ឋាភិបាលល្បី របស់ ISF ក្នុងចំណោមអង្គការ ១៦ លើកនេះ គឺមោទនភាពខ្លាំងណាស់ សម្រាប់មុខមាត់កម្ពុជា ក្នុងការបណ្តុះបណ្តាលកុមារផ្នែកអប់រំ និងបណ្តុះបណ្តាលលេងបាល់ទាត់ ស្របទៅនឹងខួប ១៥ ឆ្នាំផងដែរដូច្នេះ យើងសូមថ្លែងអំណរគុណដល់អ្នកទាំងអស់គ្នា ចំពោះការគាំទ្រប្រកបដោយសមានចិត្តអស់រយៈពេលជាង ១៥ ឆ្នាំមកនេះ គឺជួយកូនខ្មែរបានច្រើនណាស់»។
គួរបញ្ជាក់ថា ការជាប់ជាបេក្ខភាពសម្រាំង កម្មវិធីពានរង្វាន់នេះ គឺសម្រាប់តែអង្គការក្រៅរដ្ឋាភិបាល ដែលធ្លាប់ឈ្នះពានរង្វាន់ Stevie International Business Award រួចហើយតែប៉ុណ្ណោះ។ ជាមួយគ្នានេះ អង្គការផ្កាយសមុទ្រ ធ្លាប់បានទទួលពានរង្វាន់ប្រាក់ សម្រាប់អង្គការក្រៅរដ្ឋាភិបាលគំរូ ដែលធ្វើឱ្យអង្គការនេះ មានឈ្មោះដោយស្វ័យប្រវត្តិ ក្នុងកម្មវិធីពានរង្វាន់ People’sChoice Awards នេះ។
យោងតាមឯកសារ សម្មភាពការងាររបស់អង្គការផ្កាយសមុទ្រកម្ពុជា គឺអង្គការមួយនេះ ត្រូវបានបង្កើតឡើង ក្នុងឆ្នាំ ២០០៦ ក្នុងគោលបំណងបង្កើតឱកាសថ្មីៗ សម្រាប់កុមារាកុមារី ក្រីក្រ នៅកម្ពុជា ដែលកំពុងរស់នៅក្នុងតំបន់អនាធិបតេយ្យនៅទីក្រុងភ្នំពេញ។
ជាមួយគ្នានេះ អង្គការផ្កាយសមុទ្រកម្ពុជា ផ្តោតទៅលើកម្មវិធីចំនួន ២ គឺ ទី១ កម្មវិធីអប់រំ ជួយដល់កុមារ ដែលគ្មានលទ្ធភាព ទទួលបានការរៀនសូត្រ និងផ្តល់ការអប់រំពន្លឿន ដែលជួយពួកគេឱ្យអាចរៀនទាន់កម្មវិធីអប់រំរបស់សាលារដ្ឋបាន ហើយទី២ កម្មវិធីបណ្តុះបណ្តាលបាល់ទាត់ ដែលផ្តល់ឱ្យកុមារាកុមារីក្រីក្រជាច្រើន នៅទូទាំងប្រទេសកម្ពុជា នូវឱកាសលេងកម្សាន្ត រៀនសូត្រ និងពង្រឹងទំនុកចិត្តរបស់ពួកគេ ដោយមានកីឡាករកីឡាការនីចំនួន ៣ ០០០ នាក់៕
