ក្រុងម៉ាឌ្រីដ៖ ខ្សែប្រយុទ្ធ Karim Benzema បំប៉ោងសំណាញ់ទី៣ គ្រាប់ ខណៈដែលក្រុមអធិរាជស Real Madrid វិលមកកាន់កីឡដ្ឋានជួសជុលថ្មី Santiago Bernabeu ជាមួយនឹងការវាយបកយកជ័យជម្នះលើក្រុមភ្ញៀវ Celta Vigo ៥-២ ពីការប្រកួត ក្នុងក្របខ័ណ្ឌ La Liga កាលពីថ្ងៃអាទិត្យ។
កីឡាករសញ្ជាតិបារាំង Benzema មិនបានចូលលេងជាច្រើនដង ខណៈដែលក្រុម Real ធ្វើការប្រកួត ដោយមានវត្តមានអ្នកគាំទ្រឡើងវិញ ដែលជាលើកដំបូង គិតតាំងពីថ្ងៃទី ១ ខែ មីនា ឆ្នាំ ២០២០ មក។
តែយ៉ាងណា អ្នកគាំទ្របានស្រឡាំងកាំង នឹងគ្រាប់បាល់របស់កីឡាករ Santi Mina ដែលជួយឱ្យក្រុមភ្ញៀវនាំមុខមុន ត្រឹមតែ ៤ នាទីប៉ុណ្ណោះ។ ក្រុម Real តបតវិញបានល្អ ដោយគៀបសង្កត់ និងដាក់សម្ពាធរឿយៗ ទៅលើ Celta វិញ រហូតតាមស្មើបាន នៅនាទីទី ២៤ នៅពេលកីឡាករ Benzema ធ្វើបានសម្រេច ក្រោយខ្សែបម្រើ Federico Valverde បញ្ជូនមកឱ្យ។
កីឡាករ Franco Cervi ជួយឱ្យក្រុម Celta នាំមុខជាថ្មី នៅ ៧ នាទីបន្ទាប់ ខណៈដែលក្រុមម្ចាស់ផ្ទះ តាមពីក្រោយ ២-១ ពេលសម្រាកតង់ទី ១។ ចូលវគ្គទី២ ត្រឹមតែ ២ នាទី កីឡាករ Benzema ជួយឱ្យក្រុម Real តាមស្មើជាថ្មី ហើយក្រោយមក បានរួមសហការជួយឱ្យខ្សែប្រយុទ្ធ Vinicius Junior ទម្លុះសំណាញ់ ដើម្បីឱ្យក្រុមរបស់លោក Carlo Ancelotti ជាអ្នកនាំមុខវិញម្ដង។
កីឡាករចំណូលថ្មី Eduardo Camavinga ដែលដូរចូលជំនួស Eden Hazard នៅនាទីទី៦៦ បានស៊ុតបញ្ចូលទី នៅថ្ងៃបង្ហាញខ្លួនដំបូង ដើម្បីបន្ថែមនាំមុខឱ្យក្រុមអធិរាជស ខណៈដែលក្រោយមក ខ្សែបម្រើវ័យក្មេងសញ្ជាតិបារាំងរូបនេះ ជាអ្នកធ្វើឱ្យក្រុមទទួលបានបាល់ពិន័យ ១១ ម៉ែត្រ ហើយកីឡាករ Benzema មិនបណ្ដោយឱ្យឱកាសនេះបាត់បង់ជាមួយនឹងការស៊ុតសម្រេចគ្រាប់ទី៣ របស់ខ្លួនពីការប្រកួតនេះ។
គ្រាប់បាល់ហ៊ែតទ្រិកនេះ នាំឱ្យកីឡាករ Benzema មានគ្រាប់បាល់ចំនួន ៥ គ្រាប់ហើយពីការចូលលេង ៤ ហ្គេមដំបូង នៃរដូវកាលនេះ។
គ្រូបង្វឹករបស់ក្រុម Real លោក Ancelotti មានប្រសាសន៍ថា៖ «ក្រុមមានគុណភាបល្អណាស់ នៅតំបន់ប្រយុទ្ធ នោះគឺច្បាស់ណាស់។ អ្វី ដែលនៅមិនទាន់ប្រសើរ នោះគឺតំបន់ការពារ ដែលត្រូវតែធ្វើការកែលម្អ»។
យ៉ាងណា ក្រោយបញ្ចប់ប្រកួតទី៤ នេះ ក្រុមយក្សនៅក្រុងម៉ាឌ្រីដ កំពុងឈរទី១ ក្នុងតារាងពិន្ទុរបស់ La Liga ដោយមាន ១០ ពិន្ទុ ស្មើជាមួយក្រុមលេខ ២ Valencia និងក្រុមលេខ ៣ Atletico Madrid ដែលជាក្រុមការពារជើងឯក៕ AFP/VN