.jpg)
Mane (កណ្ដាល) ស៊ុតបញ្ចូលទីឱ្យ Liverpool នាំមុខ Leeds ៣-០ អំឡុងការប្រកួត នៅ Premier League កាលពីថ្ងៃអាទិត្យ។ រូប AFP
ក្រុងលីដ៖ គ្រាប់ទី ១០០ របស់ខ្សែប្រយុទ្ធ Mohamed Salah ក្នុងក្របខ័ណ្ឌ Premier League បានរួមចំណែកជួយឱ្យក្រុមហង្សក្រហម Liverpool មានជ័យជម្នះ ៣-០ លើក្រុមម្ចាស់ផ្ទះ Leeds United ដែលសល់គ្នាតែ ១០ នាក់ អំឡុងការប្រកួត ដែលត្រូវបានបាំងបិទដោយរបួសភ្លាត់កជើងរបស់កីឡាករវ័យក្មេង Harvey Elliott កាលពីថ្ងៃអាទិត្យ។
បន្ទាប់ពីចាប់ផ្ដើមហ្គេមយ៉ាងលឿន Salah បានក្លាយជាកីឡាករទី ៣០ ក្នុងការចូលរួមជាមួយកីឡាករ ដែលរកបាន ១០០ គ្រាប់ ឱ្យក្លិបរបស់ Premier League ក្នុងនាទីទី២០ ដោយការទម្លុះសំណាញ់ទីឱ្យក្រុមហង្សក្រហម នាំមុខ ពេលខ្សែការពារ Trent Alexander-Arnold បញ្ជូនបាល់កាត់ចូលមកក្នុងតំបន់គ្រោះថ្នាក់។
ក្រុមភ្ញៀវ Liverpool បណ្ដោយឱ្យឱកាសជាច្រើនបាត់បង់ ក្នុងការបាននាំមុខ ២-០ ក្នុងវគ្គទី១ មុនពេលខ្សែបម្រើ Fabinho បង្កើតឱ្យមាននូវគ្រាប់បាល់នោះ នៅដើមវគ្គទី២ ដើម្បីជួយឱ្យក្រុមរបស់លោក Juergen Klopp ធ្វើដំណើរលើវិថី នៃការដណ្ដើមបាន ៣ ពិន្ទុ ពីក្រុមក្នុងតំបន់ Yorkshire ខាងលិច។
តែយ៉ាងណា ជាមួយនឹងភាពរីករាយ នៃការនាំមុខនោះ ក៏មាននូវសញ្ញាគួរឱ្យបារម្ភ កើតមានឡើងផងដែរ ខណៈដែលខ្សែបម្រើ Elliott ចាំបាច់ត្រូវព្យាបាលយ៉ាងយូរ នៅលើទីលាន បន្ទាប់ពីត្រូវបានផ្ដួលខ្លួនយកបាល់ពីក្រោយ ដោយកីឡាករ Pascal Struijk របស់ក្រុម Leeds ដែលកីឡាករបម្រុងរូបនេះ ត្រូវអាជ្ញាកណ្ដាលផ្ដល់កាតក្រហម ដោយត្រង់តែម្ដង ព្រោះការប្រព្រឹត្តកំហុសនោះ អាចបង្កគ្រោះថ្នាក់ធ្ងន់ធ្ងរដល់គូបដិបក្ខ។
កីឡាករវ័យ ១៨ ឆ្នាំ Elliott ត្រូវបានសែងចេញពីទីលាន ដោយមានការទះដៃផ្ដល់កម្លាំងចិត្ត ពីអ្នកគាំទ្ររបស់ក្រុម Leeds ពេលរូបគេ ត្រូវបានដាក់ចុះ នៅកន្លែងខ្សែបន្ទាត់នៃទីលាន។
«វាពាក់ព័ន្ធ នឹងកជើងរបស់គេ។ ខ្ញុំត្រូវបានប្រាប់ថា វាជាការភ្លាត់ជើង ហើយពួកគេ មិនអាចទាញវាឱ្យដូចដើមវិញបាន ហើយរូបគេពេលនេះ កំពុងនៅមន្ទីរពេទ្យ»។ នេះជាការប្រាប់ឱ្យដឹងសំណាក់គ្រូបង្វឹករបស់ក្រុម Liverpool លោក Klopp។
កីឡាករ Elliott បានផូស្ត នៅលើបណ្ដាញសង្គម Instagram របស់ខ្លួន មុនការប្រកួតបញ្ចប់ថា «អរគុណសម្រាប់សារលើកទឹកចិត្ត។ ផ្លូវឆ្ពោះទៅរកការជាសះស្បើយឡើងវិញ។ YNWA (You''ll Never Walk Alone) (អ្នកនឹងមិនធ្វើដំណើរតែឯកឯងឡើយ)»។
ក្រុម Liverpool បានធ្វើឱ្យភាពស្ងប់ស្ងាត់ ដោយសារការមានរបួសនោះ ចាប់ផ្ដើមមានភាពអឺងកងឡើងវិញ ជាមួយនឹងគ្រាប់បាល់ទី៣ ក្នុងម៉ោងបន្ថែមបង្គ្រប់ តាមរយៈខ្សែប្រយុទ្ធ Sadio Mane ដើម្បីធានានូវជ័យជម្នះ ដែលនាំឱ្យពួកគេ រំកិលឡើងទៅឈរលំដាប់ទី៣ ពីលើក្រុមជើងឯកចាស់ Manchester City ខណៈដែលក្រុម Leeds នៅលំដាប់ទី១៧ ជាមួយនឹងការមិនឈ្នះសូម្បី ១ ដង ក្រោយបញ្ចប់ ៤ ហ្គេម ក្នុងលីគ នារដូវកាលនេះ៕ AFP/VN
