.jpg)
អតីតកីឡាករចំណាត់ថ្នាក់លេខ ១ ពិភពលោក Rafael Nadal របស់អេស្ប៉ាញ ក្នុងការប្រកួតនាពេលកន្លងមក។ រូបថត AFP
ក្រុងប៉ារីស៖ អតីតកីឡាករចំណាត់ថ្នាក់លេខ ១ ពិភពលោក Rafael Nadal របស់អេស្ប៉ាញបានធ្លាក់ចេញពីក្នុងចំណោមកីឡាករនៅទីកំពូលទាំង ៥ ក្នុងតារាងចាត់ចំណាត់ថ្នាក់របស់សហព័ន្ធវាយកូនបាល់ (តិន្នីស) អន្តរជាតិ (ATP) ដែលបានបញ្ចេញ កាលពីថ្ងៃចន្ទ ខណៈដែលកីឡាកររួមជាតិវ័យក្មេង Carlos Alcaraz ដែលត្រូវបានគេមើលឃើញថា ជាអ្នកស្នងតំណែងរបស់គេនាពេលអនាគត ផ្លោះ ១៧ លេខ ដោយឡើងរហូតដល់លំដាប់ទី៣៨។
កីឡាករ Nadal វ័យ ៣៥ ឆ្នាំ មិនបានធ្វើការប្រកួតឡើយចាប់តាំងពីចាញ់កីឡាករលេខ ១ ពិភពលោក Novak Djokovic ក្នុងវគ្គ ៤ នាក់ចុងក្រោយនៃកម្មវិធី French Open ព្រោះមានរបួសប្រអប់ជើង ហើយពេលនេះ បានធ្លាក់ទៅដល់ចំណាត់ថ្នាក់ទី៦ ពិភពលោក។
ចំណែកកីឡាកររបស់ស៊ែប៊ី Djokovic នៅតែរក្សាបាននូវចំណាត់ថ្នាក់ទី១ របស់ខ្លួន ទោះបីជាបានរងបរាជ័យ ក្រោមថ្វីដៃរបស់កីឡាករលំដាប់លេខ ២ ពិភពលោក Daniil Medvedev របស់រុស្ស៊ី ក្នុងវគ្គផ្ដាច់ព្រ័ត្រក្នុងកម្មវិធី US Open នៅសហរដ្ឋអាមេរិក កាលពីថ្ងៃអាទិត្យ ក៏ដោយ។
អ្នកគ្រងជើងឯកនៅ US Open ឆ្នាំមុន គឺកីឡាករ Dominic Thiem ក៏ធ្លាក់ចំណាត់ថ្នាក់ដូចគ្នាដែរ ដោយធ្លាក់ពីលេខ ៦ ទៅលេខ ៨ ខណៈដែលការមានរបួសកដៃ បានក្លាយជាឧបសគ្គរារាំងកីឡាករអូទ្រីស មិនអាចធ្វើយុទ្ធនាការការពារតំណែងជើងឯកខ្លួនបាន។
កីឡាករ Alcaraz ដែលទើបមានវ័យ ១៨ ឆ្នាំ បានចាប់ផ្ដើមរះឡើងនៅឯព្រឹត្តិការណ៍ US Open នាឆ្នាំនេះ ដោយគេបានបង្ហាញថា រូបគេអាចមានថាមពលមួយ ដែលគ្មានអ្នកណាស្មានដល់ ដោយការបានក្លាយជាអត្តពលិកវ័យក្មេងបំផុតនៅ US Open ក្នុងវគ្គ ៨ នាក់ចុងក្រោយ ផ្នែកបុរសក្នុងរយៈពេល ៥៨ ឆ្នាំ តែរបួសភ្លៅបាននាំឱ្យដំណើរផ្លូវរបស់គេត្រូវបញ្ចប់ជាមួយនឹងការសុំដកខ្លួន ហើយប្រគល់ជ័យជម្នះឱ្យទៅគូប្រកួត Felix Auger-Aliassime។
កីឡាករកាណាដា Auger-Aliassime រំកិលបាន ៤ លេខ ដោយឡើងដល់លេខ ១១ ខណៈដែលក្រសែភ្នែកទាំងឡាយ កំពុងសម្លឹងមើលតារាកំពុងរះ ២ រូបផ្សេងទៀត ដែលឡើងដល់វគ្គ ៨ នាក់ សម្រាប់ការប្រកួតដណ្ដើមពានលំដាប់ Grand Slam ប្រចាំឆ្នាំនេះ នោះគឺកីឡាករអាហ្វ្រិកខាងត្បូង Lloyd Harris ដែលឡើងដល់ចំណាត់ថ្នាក់ទី១៥ ដោយផ្លោះ ១៥ លេខ និងកីឡាករហូឡង់ Botic van de Zandschulp ដែលហក់ដល់លំដាប់ទី៦២ ដោយឡើងបាន ៥៥ លេខ៕ AFP/VN
