.jpg)
ការប្រកួតប្រដាល់គុនខ្មែរ អន្តរជាតិ ដែលបានរៀបចំនៅលើសង្វៀនឯកជន កន្លងមក។ ភ្នំពេញ ប៉ុស្តិ៍
ភ្នំពេញ៖ គម្រោងរៀបចំការប្រកួតកីឡាប្រដាល់គុនខ្មែរ ជើងឯកអាស៊ីអាគ្នេយ៍ ឆ្នាំ ២០២១ របស់សហព័ន្ធកីឡាប្រដាល់គុនខ្មែរ ក្រោមការសហការជាមួយ CAMSOC ហើយទទួលបានការអនុញ្ញាតពីរាជរដ្ឋាភិបាលតាមរយៈក្រសួងអប់រំ យុវជន និងកីឡានោះ ត្រូវបានផ្អាកការប្រកួតតែម្តងដោយបញ្ហាកូវីដ ១៩ នៅតែជាបញ្ហាកង្វល់ ហើយការផ្អាកនេះ នៅមិនទាន់មានតម្រុយថា នឹងបើកឱ្យមានការប្រកួតឡើងវិញ នៅពេលណានោះឡើយ តែអាចនៅក្នុងអំឡុងឆ្នាំ ២០២២។
តាមសេចក្ដីប្រកាសរបស់ក្រសួងអប់រំ យុវជន និងកីឡា ចុះហត្ថាលេខាដោយលោករដ្ឋមន្ត្រី ហង់ជួន ណារ៉ុន ដែលបានធ្វើឡើងតាំងពីថ្ងៃទី ១១ ខែ សីហា ២០២១ នោះ បានបញ្ជាក់ថា ការប្រកួតកីឡាប្រដាល់ជើងឯកអាស៊ាន ដែលសហព័ន្ធកីឡាប្រដាល់គុនខ្មែរគ្រោងរៀបចំនោះត្រូវបានសម្រេចឱ្យផ្អាកវិញហើយ។ ការផ្អាកនេះ គឺដោយសារតែការបន្តរីករាលដាលនៃជំងឺកូវីដ ១៩ នៅកម្ពុជា និងទាក់ទងទៅនឹងភាគីប្រទេសដទៃមួយចំនួនក្នុងតំបន់អាស៊ីអាគ្នេយ៍ដែលបានចុះឈ្មោះ ត្រៀមមកប្រកួតនេះ ក៏មានបញ្ហាកូវីដ ១៩ ស្រដៀងគ្នា។
លោក តែម ម៉ឺន អគ្គលេខាធិការរង គណៈកម្មាធិការជាតិអូឡាំពិកកម្ពុជា និងជាប្រធានសហព័ន្ធកីឡាប្រដាល់គុនខ្មែរ បានប្រាប់ថា៖ «សហព័ន្ធកីឡាប្រដាល់គុនខ្មែរ ទទួលបានលិខិតសុំផ្អាកការប្រកួតនេះរួចហើយ ដើម្បីជម្រាបជូនភាគីពាក់ព័ន្ធមានកីឡាករ គ្រូបង្វឹក និងបណ្តាក្លិប សមាគមមួយចំនួន ហើយយើងនៅមិនទាន់ដឹងថា នឹងបើកការប្រកួតវិញ នៅពេលណាមួយច្បាស់លាស់នៅឡើយទេ។ ចំពោះការផ្អាកនេះ ជាគោលការណ៍ដឹកនាំរបស់រាជរដ្ឋាភិបាលកម្ពុជា ដែលមានក្រសួងអប់រំ យុវជន និងកីឡា ជាសេនាធិការសម្របសម្រួល និងសម្រេចទៅតាមស្ថានភាពជាក់ស្តែង ព្រោះកូវីដ ១៩ ជាលក្ខណវិបត្តិសកលទៅហើយ»។
ចំណែកលោក វ៉ាត់ ចំរើន អគ្គលេខាធិការគណៈកម្មការរៀបចំប្រកួតស៊ីហ្គេម លើកទី៣២ ឆ្នាំ ២០២៣ (CAMSOC) បានប្រាប់ថា៖ «ការប្រកួតកីឡាជាច្រើនប្រភេទក្នុងកម្រិតអាស៊ាន ដែលរដ្ឋាភិបាលអនុញ្ញាតកាលពីលើកមុន ដើម្បីពង្រឹងសមត្ថភាពអត្តពលិកនោះ គឺសម្រេចផ្អាកទាំងអស់វិញ»។
លោកបានបញ្ជាក់ថា៖ «បញ្ហានេះ វាពាក់ព័ន្ធទៅនឹងប្រតិភូ និងអត្តពលិកនៃប្រទេសមួយចំនួន ដែលត្រូវចូលរួម មានបញ្ហាកូវីដ ១៩ ជាសកលដូចគ្នា ពិសេសការចេញចូលនៃប្រទេសនីមួយៗ ត្រូវធ្វើចត្តាឡីស័ក ១៤ ថ្ងៃទៀតនោះ ក៏ជាបញ្ហាលំបាកដែរ គឺវាស៊ីរយៈពេលច្រើន។ ម៉្យាងវិញទៀត នៅពេលប្រកួត ដែលមានការជួបជុំអត្តពលិក គ្រូបង្វឹកគណៈកម្មការផ្សេងៗជាច្រើននោះ គឺអាចជួបហានិភ័យច្រើន ហេតុនេះរាជរដ្ឋាភិបាលសម្រចផ្អាកនេះ គឺជាការត្រឹមត្រូវតាមវិធានការរបស់ក្រសួងសុខាភិបាល»។
ចំណែកលោក រាជ សុផែន អគ្គលេខាធិការរងសហព័ន្ធកីឡាប្រដាល់គុនខ្មែរ ទទួលបន្ទុកការងារបច្ចេកទេស និងព័ត៌មាន បានឱ្យដឹងថា៖ «ការសម្រេចផ្អាកនេះ នៅមិនទាន់ដឹងច្បាស់អំពីការបរិច្ឆេទថ្មីនៅពេលណា ឬក៏ពន្យារពេលដល់ឆ្នាំ ២០២២ ឬយ៉ាងណាឡើយ។ ជាមួយគ្នានេះសហព័ន្ធបានជូនដំណឹងដល់បណ្តាប្រទេសទាំងអស់ ក្នុងអាស៊ានអំពីការផ្អាកការប្រកួតនេះរួចរាល់ហើយ»៕
