ក្រុងបាសេឡូណា: ក្រុម Bayern Munich ផ្ដល់ឱ្យក្រុម Barcelona នូវរូបភាពដ៏ឃោរឃៅមួយ ដើម្បីបង្ហាញឱ្យឃើញថា តើក្រុមគូប្រជែងរបស់ពួកគេបានធ្លាក់ចុះដល់កម្រិតណា ដោយការយកឈ្នះជាមួយនឹងលទ្ធផល ៣-០ ពីការប្រកួតដំបូង ក្នុងវគ្គសន្សំពិន្ទុតាមពូលនៃក្របខ័ណ្ឌ Champions League កាលពីថ្ងៃអង្គារ ដោយក្នុងនោះកីឡាករ Robert Lewandowski ទម្លុះសំណាញ់ទី ២ គ្រាប់ម្នាក់ឯង។
ជាមួយនឹងការលេងដោយមិនមានស៊ុបភើស្តារ Lionel Messi ជាលើកដំបូង សម្រាប់យុទ្ធនាការនៅអឺរ៉ុប ចាប់តាំងពីឆ្នាំ ២០០៣ មក ក្រុម Barca ត្រូវបានគ្របដោយក្រុមភ្ញៀវ Bayern ដែលគួរតែមានគ្រាប់បាល់ច្រើនជាងនេះ តែចុងក្រោយ ធ្វើសម្រេចបានត្រឹមតែ ៣ គ្រាប់ ដែលមកពីការស៊ុតគ្រាប់បាល់បើកឆាកដំបូង ដោយកីឡាករ Thomas Mueller និង ២ គ្រាប់បន្ថែមពីលើទៀតរបស់ខ្សែប្រយុទ្ធ Lewandowski។
នៅពេលដែលកីឡាករអន្តរជាតិប៉ូឡូញ Lewandowski ជួយឱ្យក្រុមភ្ញៀវនាំមុខ ២-០ នៅនាទីទី៥៦ ភាពអាចទៅរួចនៃការកើតមាននូវភាពអាម៉ាស់ ១ ផ្សេងទៀតពីរូបភាពបរាជ័យចាស់ជាមួយលទ្ធផល ៨-២ កាលពីឆ្នាំមុន នៅក្រុងលីសបោន ក្រោមថ្វីជើងរបស់គូបដិបក្ខដដែលនេះ មានអារម្មណ៍ថា ហាក់ជិតក្លាយជាការពិតមែនទែនហើយ។
លើសពីនេះ ក្រុម Bayern ប្រហែលបានបង្កើតឱ្យមាននូវសារមួយដែលខ្លាំងជាងមុននូវគម្លាតនៃកម្រិតខុសគ្នារវាងក្រុមទាំង ២ ដោយការបន្ថែម ១ គ្រាប់ទៀត នៅដំណាក់កាលចុងក្រោយ ខណៈដែលអ្នកគាំទ្ររបស់ក្រុមម្ចាស់ផ្ទះ Barca បានសម្ដែងចេញនូវកំហឹងក្រេវក្រោធ ការខកបំណង និងចុងក្រោយ អារម្មណ៍ចង់ឱ្យមានការចុះចេញពីតំណែង។
ខ្សែការពារ Gerard Pique របស់ Barca និយាយថា៖ «អ្វីដែលប្រុងកើត វានឹងកើត។ យើងមិនអាចកែប្រែបាននោះឡើយ។ នោះជាការពិត»។
ក្រុមអ្នកមានបុណ្យ មិនអាចស៊ុតឱ្យចំគោលដៅសូម្បីម្ដង និងបញ្ជូនបាល់ឱ្យគ្នាបានតិច-តួច ពោលគឺជាអ្វី ដែលស្ទើរតែមិនធ្លាប់កើតមានទាល់តែសោះ សម្រាប់ការប្រកួត នៅកីឡដ្ឋាន Camp Nou នេះ ហើយពេលនេះ ពួកគេបានរបូតគ្រាប់បាល់ដល់ទៅ ១០ គ្រាប់ហើយ ក្នុងចំណោមការប្រកួតនៅអឺរ៉ុប ៣ លើកចុងក្រោយ ក្នុងផ្ទះខ្លួនឯង។
គ្រូបង្វឹករបស់ក្រុម Barca លោក Ronald Koeman បានថ្លែងថា៖ «ដោយជាក់-ស្ដែង ពួកយើងពិតជាចង់ធ្វើការប្រកួតប្រជែងឱ្យល្អជាងនេះណាស់ តែវាជាអ្វីដែលយើងមាន។ ខ្ញុំមិនអាចបន្ទោសចំពោះការប្រឹងប្រែងរបស់កីឡាករគ្រប់រូបនោះឡើយ»។
ការចាប់ផ្ដើមដ៏ខ្លាំងរបស់លោក Nagelsmann ក្នុងតួនាទីថ្មី កំពុងបន្តដំណើរទៅមុខជាមួយនឹងការមានជោគជ័យ ៦ លើកបន្តបន្ទាប់គ្នា តែក្រុម Bayern របស់លោកនឹងត្រូវប្រឈមជាមួយការប្រកួតប្រជែងដ៏តានតឹងជាងនេះ នៅ Champions League នេះ ប្រហែលជាសូម្បីតែ ក្នុងហ្គេមប្រចាំពូល E ដែលពួកគេត្រូវប៉ះក្រុមមិនធម្មតា ២ ផ្សេងទៀត គឺ Benfica និង Dynamo Kiev។
ដូច្នេះ ឃើញថា ក្រុមយក្សអាល្លឺម៉ង់ Bayern ឈរទី១ បណ្ដោះអាសន្ន ក្នុងពូល E ក្រោយដណ្ដើមបាន ៣ ពិន្ទុ ពីហ្គេមដំបូងនេះ ខណៈក្រុមលេខ ៣ Benfica និងក្រុមលេខ ៤ Dynamo មាន ១ពិន្ទុដូចគ្នា ក្រោយពីមិនអាចស៊ុតបញ្ចូលទីគ្នាបាន សម្រាប់ការប៉ះគ្នា ក្នុងក្រុងកៀវ រីឯ Barca នៅបាតពូល៕ AFP/VN