ក្រុងប៊ែន: ១ គ្រាប់របស់កីឡាករបម្រុង Jordan Siebatcheu ដែលបានមកពីស៊ុត ១ ជើងចុងក្រោយនៃហ្គេម ធ្វើឱ្យក្រុមម្ចាស់ផ្ទះ Young Boys របស់ស្វ៊ីស មានជ័យជម្នះដ៏មានតម្លៃ ២-១ លើក្រុមខ្លាំង Manchester United ដែលសល់គ្នា ១០ នាក់ អំឡុងការប្រកួត នៅក្របខ័ណ្ឌ Champions League វគ្គសន្សំពិន្ទុតាមពូល កាលពីថ្ងៃអង្គារ។
ខ្សែប្រយុទ្ធអន្តរជាតិអាមេរិក Siebatcheu ឆក់ឱកាសពីការបញ្ជូនបាល់ទៅក្រោយដោយកីឡាករ Jesse Lingard របស់ក្រុមភ្ញៀវ Man United ដោយការរត់ទៅឆាបបាល់ ហើយស៊ុតផុតដៃអ្នកចាំទី David de Gea បញ្ចូលទីយ៉ាងល្អ នៅនាទីទី៩០+៥ ដែលធ្វើឱ្យអ្នកគាំទ្រ ក្នុងកីឡដ្ឋាន Wankdorf រំជួលចិត្តយ៉ាងខ្លាំងជាមួយនឹងគ្រាប់បាល់ជ័យជម្នះនេះ។
ខ្សែប្រយុទ្ធឆ្នើម Cristiano Ronaldo ជាអ្នកស៊ុតឱ្យក្រុម Man United នាំមុខមុន ដែលជាគ្រាប់ទី៣ របស់កីឡាករអន្តរជាតិព័រទុយហ្គាល់ ក្នុងចំណោមការចូលលេង ២ ហ្គេម គិតតាំងពីវិលមកប្រកបអាជីពនៅទឹកដី Old Trafford ជាថ្មី។
តែការប្រកួតបានចាប់ផ្ដើមប្រែប្រួល ពេលមានការបណ្ដេញខ្សែការពារ Aaron Wan-Bissaka នៅចុងវគ្គទី១ ដោយសាររត់ទៅប៉ះទង្គិច ដែលអាចបង្កគ្រោះថ្នាក់ ចំពោះកីឡាករ Christopher Martins ខណៈការមានសមាជិកលើសនេះ បានផ្ដល់ក្ដីសង្ឃឹមឱ្យក្រុម Young Boys។
ក្រុម Young Boys តាមស្មើនៅនាទីទី៦៦ ដោយខ្សែបម្រើ Nicolas Ngamaleu ខណៈ Siebatcheu ស៊ុតគ្រាប់ជ័យ-ជម្នះ នៅវិនាទីចុងក្រោយ។
«សម្រាប់ក្លិបកម្រិតដូចពួកយើង ដែលអាចមានព័ត៌មាននៅទំព័រមុខ ក្នុងរយៈពេល ១ ឬ ២ ថ្ងៃ នៅអឺរ៉ុប និងដែលអាចឈ្នះ Man United ពោលគឺជាក្លិប ១ ក្នុងចំណោមក្លិបយក្ស នៅអឺរ៉ុប វាពិតជាពិសេសមែនទែន»។ នេះជាសម្ដីរបស់គ្រូ-បង្វឹកក្រុម Young Boys លោក David Wagner។
វាជាការចាប់ផ្ដើមដ៏អាក្រក់សម្រាប់ក្រុម Man United របស់លោក Ole Gunnar Solskjaer ពីការប្រកួតប្រចាំពូល F នេះ ហើយជាពិសេសនោះ នៅមានតេស្តដ៏តឹងតែងជាងនេះទៀត នៅខាងមុខ ដោយត្រូវប៉ះក្រុម Atalanta របស់អុីតាលី និងក្រុមលំដាប់កំពូលអេស្ប៉ាញ Villarreal ដែលធ្លាប់ធ្វើពួកគេឈឺចាប់ក្នុងវគ្គផ្ដាច់ព្រ័ត្រ នៅក្របខ័ណ្ឌទី២ របស់អឺរ៉ុប នារដូវកាលមុន។
«នោះគឺជាការប្រកួតបាល់ទាត់ ក្នុងកម្រិតខ្ពស់បំផុត ការខ្វះនូវការផ្ចង់អារម្មណ៍ ការបង្កើតនូវកំហុស នោះអ្នកនឹងត្រូវគូប្រជែងដាក់ទោសភ្លាម»។ នេះជាលើកឡើងរបស់លោក Solskjaer ដែលនិយាយពីការ-មានកំហុស រហូតនាំឱ្យ Young Boys មានជ័យជម្នះ។
តែ Ronaldo យ៉ាងហោច-ណាស់ បានបន្ថែមស្ថិតិផ្ទាល់ខ្លួន ដោយកា្លយជាអ្នកកាន់កាប់កំណត់ត្រារបស់អ្នកស៊ុតបញ្ចូលទីបានច្រើនជាងគេនៅអឺរ៉ុបនេះ ជាមួយនឹងគ្រាប់បាល់ចំនួន ១៣៥គ្រាប់ ពោលគឺច្រើនជាងកីឡាករ Lionel Messi ១៥ គ្រាប់៕ AFP/VN