.jpg)
ក្រុមអត្តពលិកប្រដាល់សកលកម្ពុជា ថតជាមួយម្ចាស់ឧបត្ថម្ភ និងថ្នាក់ដឹកនាំ នៅក្នុងសន្និសីទសារព័ត៌មាន។ រូបថត សហការី
ភ្នំពេញ: សហព័ន្ធកីឡាប្រដាល់សកលកម្ពុជារកឃើញច្រក ដើម្បីបើកការប្រកួតទៅតាមផែនការរបស់ខ្លួនហើយ ក្នុងការពង្រឹងសមត្ថភាពក្រុមអត្តពលិក ពិសេសក្រុមជម្រើសជាតិកម្ពុជា សម្រាប់ត្រៀមចេញទៅប្រកួតអន្តរជាតិនានា ជាពិសេសស៊ីហ្គេម លើកទី៣២ ឆ្នាំ ២០២៣ នៅកម្ពុជា ឱ្យទទួលបានលទ្ធផលល្អ បន្ទាប់ពីសហព័ន្ធនេះ ទទួលបានការគាំទ្រជាលើកដំបូង គឺដៃគូស្ពនស័រ លោក ខេ ស៊ីបាណេត នាយកវិទ្យាស្ថានខេមអេដ និងមានលោក ស៊ន អេលីត អ្នកគ្រប់គ្រងក្លិបនាយកដ្ឋានអង្គរក្សជាអ្នកផ្តល់សង្វៀនប្រកួត។
ក្នុងសន្និសីទសារព័ត៌មាននៅស្នាក់ការ NOCC កាលពីព្រឹកថ្ងៃទី ១៥ ខែ កញ្ញា ឆ្នាំ ២០២១ លោក ប៊ុយ សុភ័ណ្ឌ អគ្គលេខាធិការសហព័ន្ធកីឡាប្រដាល់សកលកម្ពុជា បានប្រាប់ថាយើងទទួលបានការឧបត្ថម្ភគាំទ្រថវិកាមួយចំនួនពីលោក ខេ ស៊ីបាណេត នាយកវិទ្យាស្ថានខេមអេដ និងសហការជាមួយដៃគូមួយចំនួនមានក្លិបប្រដាល់នាយកដ្ឋានអង្គរក្សរបស់លោក ស៊ន អេលីត ជួយផ្តល់ទីតាំងសង្វៀនសម្រាប់ប្រកួត ដោយក្នុងការប្រកួតនោះមិនអនុញ្ញាតឱ្យមានអ្នកទស្សនាផ្ទាល់ទេ ព្រោះគោរពតាមគោលការណ៍ក្រសួងសុខាភិបាល។
លោក ប៊ុយ សុភ័ណ្ឌ បន្ថែមថា៖ «គម្រោងប្រកួតជាបឋមយើងត្រៀមការប្រកួតប្រហែល ៦ លើក ក្នុងនោះយើងប្រកួតចំនួន ២ សប្តាហ៍ម្តង ដោយចាប់ផ្តើមពីថ្ងៃអាទិត្យទី ១៩ ខែ កញ្ញា ឆ្នាំ ២០២១ នេះទៅ វេលាម៉ោង ៦ ដល់ ម៉ោង ៨ យប់។ ជាមួយគ្នានេះ សហព័ន្ធនឹងស្នើសុំទៅសមាគមប្រដាល់សកលអន្តរជាតិ (AIBA) ដើម្បីជួយគាំទ្រផងដែរ ចំណែកតម្លៃខ្លួនរបស់កីឡាករ-កីឡាការិនី ដែលឡើងប្រកួតសហព័ន្ធខិតខំប្រឹងប្រែងឱ្យមានចំនួនប្រសើរ ដើម្បីជំរុញឱ្យអត្តពលិកយើងសប្បាយចិត្តនិងប្រឹងប្រែងប្រកួត»។
ចំណែកលោក ឆឹង យ៉ៅយ៉េន ប្រធានសហព័ន្ធកីឡាប្រដាល់សកលកម្ពុជានិយាយថា៖ «ការស្វែងរកដៃគូសហការនេះ គឺសហព័ន្ធបានព្យាយាមច្រើនឆ្នាំមកហើយ ប៉ុន្តែយើងលំបាកផ្នែកទីផ្សារគាំទ្រឱ្យមានការប្រកួតណាស់ ហើយការចំណាយក្នុងមួយប្រកួតមានចំនួនច្រើនផងដែរ។ ជាមួយគ្នានេះ វិស័យឯកជន ដែលគាំទ្រប្រដាល់សកលនៅមិនទាន់មានប្រិយភាពល្អដូចប្រដាល់គុនខ្មែរទេ។ តែយ៉ាងណាក្ដី ការប្រឹងប្រែងនេះ ទទួលបានការគាំទ្រជាដំបូងពីលោក ខេ ស៊ីបាណេត ក្នុងកម្រិតចាប់ផ្តើមនៅឡើយ ហើយសូមអំពាវនាវរកការគាំទ្របន្ថែមទៀត ព្រោះនេះគឺជាទិសដៅពង្រឹងសមត្ថភាពអត្តពលិក ដើម្បីឈានទៅចូលរួមប្រកួត ក្នុងព្រឹត្តិការណ៍អន្តរជាតិនានា ពិសេស ស៊ីហ្គេមលើកទី៣២ ឆ្នាំ ២០២៣ នៅកម្ពុជាយើង»។
លោក ខេ ស៊ីបាណេត នាយកវិទ្យាស្ថានខេមអេដ ដែលជាអ្នកឧបត្ថម្ភមានប្រសាសន៍ថា៖ «ខ្ញុំមើលឃើញពីប្រដាល់សកលមានប្រិយភាព ហើយខ្វះការគាំទ្រ និងលើកទឹកចិត្តពីខាងឯកជន ហេតុនេះខ្ញុំខិតខំ ដើម្បីឱ្យមានការប្រកួត។ នេះជាវិធីសាស្ត្រល្អ ដែលបានបើកការប្រកួតនៅចុងឆ្នាំនេះ ហើយវានឹងមានការរីកចម្រើនល្អ ក្នុងការរៀបចំប្រកួតស៊ីហ្គេមលើកទី៣២ ឆ្នាំ ២០២៣ នៅកម្ពុជា ចំណែកអត្តពលិកប្រដាល់សកល នឹងដណ្តើមបានមេដាយច្រើនតាមផែនការមិនខាន»។
តាមកម្មវិធីរៀបចំប្រកួតនៅសប្តាហ៍នេះ គណៈកម្មការរបស់សហព័ន្ធ បានត្រៀមសមាសភាពចំនួន ៦ គូ ក្នុងនោះមានប្រភេទទម្ងន់ចំនួន ៥ គឺទម្ងន់ ៤៩ គីឡូក្រាម ចំនួន ២ គូ ទម្ងន់ ៥២គីឡូក្រាម ចំនួន ១ គូ និងគូជម្រើសជាតិ មាន ៣ គូ ក្នុងនោះកីឡាករ អ៊ូច ធារិទ្ធ ត្រូវជួប ពេជ្រ សំរិទ្ធ ក្នុងទម្ងន់ ៥៦ គីឡូក្រាម ចំណែកកីឡាករ ទូច ដេវីដ ប្រកួតជាមួយស៊ឹម ពិសិដ្ឋ ក្នុងប្រភេទទម្ងន់ ៦០ គីឡូក្រាម ហើយកីឡាករ សេក សារិទ្ធ ត្រូវប៉ះ ម៉ាង ព្រហ្មម៉ាញ ក្នុងប្រភេទទម្ងន់ ៦៤ គីឡូគ្រាម៕
