ភ្នំពេញៈ កីឡាករជើងខ្លាំងនិយមវាយសម្រុក ប៊ុន សុធា បានជួបនូវសំណាងមួយ គឺរូបគេត្រូវបានកំណត់ឱ្យឡើងទៅកាន់ការប្រកួតវគ្គពាក់កណ្តាលផ្តាច់ព្រ័ត្រ នៃការប្រកួតដណ្តើមខ្សែក្រវាត់នៅលើសង្វៀន PNN ដោយស្វ័យប្រវត្តិ ខណៈគូប្រកួតរបស់គេ គឺ ឡុង រ៉ាមី របស់ក្លិបប្រដាល់ខ្លារខិនមានរិទ្ធ មានបញ្ហាសុខភាពមិនល្អ មិនអាចឡើងប្រកួតទៅតាមកាលកំណត់ នាថ្ងៃអាទិត្យនេះ បាននោះ។
ទោះជាយ៉ាងនេះក្តី ប៊ុន សុធា ត្រូវបានដាក់ឱ្យប្រកួតជាមួយអតីតមិត្តរួមក្លិបកីឡាករ គង់ ហូវ មកពីក្លិបគុហារព្រហ្មជ័យខេត្តសៀមរាប ជាលក្ខណៈមិត្តភាពជំនួសវិញ ក្នុងនាមជាគូឯកប្រចាំសប្តាហ៍ ដែលត្រូវទទួលបានតម្លៃខ្លួនខ្ពស់ផងដែរ ហើយតាមប្រវត្តិ ប៊ុន សុធា និង គង់ ហូវ ធ្លាប់ជាសិស្សរួមគ្រូ ប៉ុន្តែបានផ្លាស់ប្តូរក្លិបបែកគ្នាយូរហើយ ខណៈកន្លងមក ពួកគេក៏ធ្លាប់ប្រកួតគ្នាចំនួន ៣ លើក ក្នុងនោះ ប៊ុន សុធា ឈ្នះ ២ លើក និង គង់ ហូវ ឈ្នះ ១ លើក។
ក្នុងជំនួបជាគូមិត្តភាព រវាងអតីតសិស្សរួមគ្រូ លើកនេះ អ្នកតាមដានកម្មវិធីប្រដាល់កំពុងរង់ចាំមើលថា ពួកគេវាយគ្នាអស់ពីសមត្ថភាព ឬក៏ឡើងគ្រាន់តែបង្គ្រប់កិច្ច ព្រោះតាមប្រភពច្បាស់ការពីគណៈកម្មការផ្គូផ្គងបានឱ្យតម្លៃខ្លួន អ្នកប្រដាល់ឆ្នើម ប៊ុន សុធា និង គង់ ហូវ ក្នុងម្នាក់ៗទទួលបាន ៤០០ ដុល្លារឯណោះ ក្នុងឋានៈជាគូឯកប្រចាំសប្តាហ៍។
ជុំវិញភាពមន្ទិលនេះ គង់ ហូវ បានប្រាប់ថា៖ «ខ្ញុំធានាវ៉ៃអស់ពីសមត្ថភាព មិនយោគយល់រឿងបញ្ហាស្គាល់គ្នានោះទេ ព្រោះបើធ្វើអ្វីមិនប្រក្រតី គេដេញចុះ មិនឱ្យតម្លៃខ្លួននោះឡើយ។ ខ្ញុំមិនហ៊ានអះអាងពីការឈ្នះទេ ព្រោះ សុធា ខ្លាំងផ្នែកជង្គង់ និងកម្លាំងល្អជាង ដោយខ្ញុំសង្ឃឹមឈ្នះត្រឹម ៥០ ភាគរយប៉ុណ្ណោះ តែរឿងប្រកួត គឺខ្ញុំមិនឱ្យអ្នកទស្សនាខកចិត្តនោះឡើយ»។
ចំណែក ប៊ុន សុធា បាននិយាយថា៖«ទោះបីខ្ញុំបានឈ្នះកក់កៅអីរួចហើយមែន ប៉ុន្តែខ្ញុំនឹងវ៉ៃឱ្យអស់ពីសមត្ថភាព ដោយគ្មានយោគយល់ជាមិត្តធ្លាប់នៅក្លិបជាមួយគ្នានោះឡើយ។ ការប្រកួតនេះ បើសិនជា ឡុង រ៉ាមី មិនបោះបង់ទេ គឺខ្ញុំមានឱកាសស៊ីផុយ ប៉ុន្តែការមកប៉ះជាមួយ គង់ ហូវ នេះគឺលំបាកជាង តឹងតែងជាង ព្រោះ គង់ ហូវ បច្ចេកទេសវាយជង្គង់ក៏ល្អដែរ តែទោះជាយ៉ាងណា ខ្ញុំត្រៀមបានល្អ សង្ឃឹមឈ្នះ ៧០ ភាគរយ»។
លោក តាំង លីហួរ មន្ត្រីសម្របសម្រួលផ្នែកកីឡា នៅសង្វៀន PNN បានប្រាប់ថា បេក្ខភាពកីឡាករ ប៊ុន សុធា ត្រូវបានគេមើលឃើញថា មានសក្តានុពលល្អជាងគេ និងសំណាងផងដែរខណៈដែលការប្រកួតជម្រុះយក ៤ នាក់ចុងក្រោយនេះ ប៊ុន សុធា ទទួលបានឱកាសល្អជាងគេ គឺបើកឆាកបានកក់កៅអីវគ្គពាក់កណ្តាលផ្តាច់ព្រ័ត្រមុនគេស្រេចទៅហើយ ទោះបីជាប្រកួតបង្គ្រប់កិច្ចមិត្តភាពនេះ ចាញ់ ឬឈ្នះ កីឡាករ គង់ ហូវ ក៏ដោយ៕